30 Hari(Bahasa Iban)

Tusun 4

~~~~~~~~~~~~~~~~~~~~~~~
""A happy marriage is about three things: memories of togetherness, forgiveness of mistakes and a promise to never give up on each other."-Surabhi Surendra
~~~~~~~~~~~~~~~~~~~~~~~

Hari ke-3

Chukup pedis deka mulai ke penyayau serta pengerindu dalam pangan diri baka keterubah begulai suba. Dalam rumah tangga, kitai enda tau sesekali muka pintu ngagai urang ketiga tama. Enti udah telanjur muka, dia kitai deka bebagi pengerindu enggau urang ketiga ti datai tama ngenduh.

Udah abis cerita ba tv peda Jack, iya pan tama ke bilik pangking seduai ia Jane. Jane udah dulu tadi tama pangking. Tambah mega Jane agi ringat pasal Jack ke mungkir janji iya ti deka makai begulai tengah hari kemari. Buka Jack pintu pangking belubah2. Enggai ke ngacau Jane ke udah tinduk. Lampu bilik sigi udah dipadam ke Jane.

Jack ngelabuh ke tubuh iya gali sepiak Jane ke gali melakang ke ia. Jack ngalih ke mua iya nunga belakang Jane.
'Bakani agi tua ka mulai ke pemanis pengerindu tua suba Jane.' ko Jack bejaku kediri tang bunyi nyawa iya mit. Jack nyangka Jane udah tinduk jenak maya nya. Jauh ba ati Jack, iya sayau ke Jane tang ati iya nyau bebagi dua. Jack udah telanjur muka ati iya ngagai Jessy

Jessy indu ke kala ngisi ruang ba ati iya suba sebedau penatai Jane. Jessy datai baru ngagai Jack. Ketegal rumah tangga seduai iya Jane bisi penusah, Jack nerima Jessy pulai baru. Nyambung pengerindu seduai iya ke alang2 suba. Jack mega udah telanjur sayau ke Jessy. Jessy janda anak siko.

Mata Jack berasai agi regas. Puas iya bekalih kiba kanan ngulih ke asai. Pagila hari enam. Sida nadai gawa ujung minggu. Jack bisi ati deka mai Jane meda wayang ujung minggu. Lama udah seduai iya Jane enda keluar rindu ati diri bakanya. Tambah bisi pansut movie baru ba wayang pagila.

'Kada Jane ka bai aku pagila?!' ko Jack dalam ati. Jack bisi berunding, enti nyema Jane enggai dibai iya pagila, Jack deka mai Jessy. Jack gali telentang. Jari iya dipanggai ke iya ba kening.  Mata iya ga agi regas amai. Jeling iya ga Jane sepiak iya ke agi melakang ke iya.

Jack merati ke belakang Jane. Mata  iya merati ke segenap bentuk tubuh Jane ke benung gali nya. Jane semina ngena baju tinduk nipis warna merah celum alu betali mit.
'Seksi amai Jane malam tok.' ko Jack dalam ati. Ia alu nyingit ke tubuh iya nunga belakang Jane. Endang sigi sengaja ga Jane ngena baju tinduk seksi bakanya. Kena iya menggoda Jack ko iya.

Lama iya enda meda Jane ngena baju bakanya. Kulit belakang Jane ke alus burak nya narit ati Jack malam nya. Pancar lampu luar bisi nerang ke mimit bilik Jack enggau Jane. Belubah2 Jack ngangkat ke jari iya alu pegai iya buk Jane ke panjai nya. Sium iya buk Jane. Bau rengut ari buk Jane ngasuh ati Jack gidan. Iya lelengau ke Jane suba.
'Lama aku enda nyium bau rengut tu.' ko Jack dalam ati. Kayam2 serta purus  iya buk Jane.  Jane semina ngenat kediri aja. Mata agi dipejam ke iya rapit.

Kebendar iya, Jane ngaga diri tinduk maya Jack tama ke bilik tadi. Nyau penat diri tubuh iya ke majak gali singit melakang ke Jack bakanya. Jari Jack agi murus2 buk iya ari belakang. Lama iya enda ngasai ke jari Jack bayam buk iya baka nya. Enti suba, Jack sigi rindu ngayam buk iya. Jack madah rindu meda buk Jane ke panjai serta lurus nya. Diatu lain asai sepi Jane bila Jack ngayam buk iya bakanya baru.
Engka laban seduai iya Jack nyau lama enda tinduk sebilik bakanya.

Enda berasai tubuh Jack makin semak enggau tubuh Jane. Bantal gulin ke nyadi antara  seduai iya Jane di kalih ke Jack ke bukai. Jack megai bahu Jane belubah. Buk ke tutup pending serta pegu Jane di ari ke iya. Jane semina ngenat kediri aja. Mata iya dipejam ke iya rapit. Nyau tengekering tubuh Jane enda engkebut. Jantung Jane nyau dedegup kesal. Baka ke urang baru jadi nya. Jari Jane baka nama ngenggam pua iya.
'Nama aku tu tak kesal neh?' ko Jane bejaku dalam ati. Mata iya majak dipejam ke iya.