30 Hari(Bahasa Iban)

Tusun 18

~~~~~~~~~~~~~~~~~~~~~~~
"The wrong person makes u beg for attention, affection, love and commitment. The right person give u these things because they love u."
~~~~~~~~~~~~~~~~~~~~~~~

Hari-17

Jack duduk ensugau ba atas katil. Dani iya pagi ensepi pala iya pedis. Pedis penapat. Tegu iya ga pala iya. Baru sedar ke kening iya bisi telih. Telih dipangka ke iya ba dinding demalam. Mata Jack gegining nijau segenap bilik nya. Ati iya balat tusah. Tusah ditinggal ke Jane, bini iya. Mata iya berasai angat bai iya nyabak ngemendar nya demalam. Perening Jack jam ba dinding, udah manggai pukul 8 pagi. Tang Jack nadai ati deka nurun gawa. Runding Jack kusung. Semina ngenang ke Jane aja. Kini meh penunga Jane? Ai mata Jack labuh. Nesal amai meh asai Jack.  Nesal deka mai Jane sarak, nesal begila enggau Jessy, nesal nyau telanjur enggau Jessy, nesal ke semua utai. Tambah iya ngenang ke Jane benung bisi tubuh. Petara semampai ninga sampi Jane. Jane tetap sabar dikeji indai Jack punas. Diatu bukti, Jane enda punas.

Jack nyingkau telipun bincing ya ba atas mija. Buka iya, kesuh ke iya belubah seput iya. Kena ngelantang ke dada iya  sendat. Peda iya nadai ga mesej tauka kangau telipun ari Jane. Semuti enda datai ratus iti mesej whatsapps di anjung Jack ngagai Jane. Tang siti nadai meh dabal tick. Nya tanda Jane enda muka telipun iya din. Jack nguji call, sama mega. Indu operator nya ke nyaut. Tusah amai ati Jack. Enda ga Jack terunding deka nanya entua iya, apai indai Jane.

Jack nekan numur telipun opis endur iya gawa.

"Hello, Santi. Aku cuti saritu. Enti Mr. Bong nanya ke aku, padah ke nuan aku ngambi cuti." ko Jack bejaku enggau kerani opis iya dedin. Sepengudah iya berandau enggau Santi, iya alu nekan numur Jane. Tekan iya call, indu operator nya ga nyaut belama. Bisi puluh kali kini iya nguji call. Tetap meh sebaka, indu operator ke nyaut.

'Kini meh nuan Jane?' ko Jack. Jack nimpai ke telipun bincing iya ba atas tilam. Iya pan alu angkat, jingkau iya kain tula mandi sebedau pansut. Jack besemaya deka ngusung ke butik Jane. Nyangka ke Jane bisi dia legi.

"Enda gawa nuan saritu pia jang?" ko apai iya nanya. Indai iya enggai bejaku enggau Jack. Ketegal seduai iya ke betimbal jaku demalam. Indai iya pedis ati diperak Jack. Berani Jack nganu iya ketegal Jane. Bebulu meh ati indai Jack enti ngenang ke Jane nya. Jack merening indai iya ke duduk ngirup kopi. Tang indai iya nyau melintuk malas perening Jack.

"Enda apai. Aku cuti. Aku deka ngiga Jane." ko saut Jack ngagai apai iya. Jack nuang ke ai kopi ba cangkir. Irup iya belubah meh ai kopi nya.

"Belik udu meh nuan anak. Kiruh deh nuan ka ngiga iya. Kapa meh nuan bangat nunduk ke iya? Nuan sanggup minta cuti ketegal deka ngiga iya? Enti nuan kena buai keja, sapa rugi?" ko indai Jack. Jack enda nyaut seleka. Malas iya deka betimbal jaku enggau indai iya nya. Jack alu angkat deka ke bilik mandi.

🌸🌸🌸🌸🌸🌸🌸🌸🌸🌸🌸🌸🌸

Jack udah datai ba butik Jane. Jack alu tama ke dalam. Jill enggau Jwen tekenyit meda penatai iya kia.

"Selamat pagi Mr. Jack." ko seduai iya serentak. Jack tuchum kelat aja. Mata iya gegining ngiga ayas Jane.

"Jane bisi ditu?" ko Jack nanya.

" Nadai bos. Iya cuti. Iya ngasuh kami duai nyaga kedai iya. " ko Jill nyaut Jack.

Jack alu tusah ati. Kini agi iya deka ngiga Jane?

"Jane bisi madah iya kini?" ko Jack enda puas ati. Tang disaut Jill enggau Jwen ngena giling pala aja tanda seduai iya enda nemu kini penunga Jane.

Jack alu pansut ari butik Jane. Iya murus mua iya. Runding iya balat tusut.

"Joel?" ko Jack baru teringat ke Joel. Iya besemaya deka betemu enggau Joel. Laban Joel rapat kaul enggau Jack. Enda nyamai ati Jack. Bisi amai utai ba runding iya maya nya. Tambah runding ke benung tusut nya. Macam meh utai dirunding iya.

🌸🌸🌸🌸🌸🌸🌸🌸🌸🌸🌸🌸🌸

Sepengudah Jane berandau enggau Jill ba telipun nanya ke kedai iya, Jane alu nurun ke baruh. Jane bisi meli siti simkad, dikena iya berhubung enggau sida Jill, Jwen enggau Joel aja.  Jack enda nemu numur Jane ke baru nya. Tula mandi dilempai ke iya ba bahu iya. Baru iya meh Jane dani laun. Empa penyamai iya tinduk ba dia. Ati iya lantang. Ninga apai enggau iya bebuti enggau pangan diri. Jane anak paling biak ari 3 iko menyadi. Dua iko menyadi tuai ari Jane bela udah belaki bebini. Bisi ruang bilik diri empu. Apai enggau indai iya aja meh ba rumah nya.

"Baru dani nuan Jane. Bakani tinduk nuan demalam?" pia ko indai Jane nanya. Jane malik ngagak jam ba dindung, udah pukul 10 pagi. Jane tuchum ngagai indai iya ke benung nusun capak ba dapur.

"Ukai selalu mak. Sekali sekala kan." ko Jane alu merap indai iya ari belakang. Apai iya mesti udah tadi nurun gawa.

"Mandi nuan. Bau kesing." ko indai iya nundi. Sekali dikelicik Jane indai iya. Nya meh indai iya nyau latah. Senang ati Jane meda indai iya. Lantang asai seput iya. Jane ngeleka ke berap jari iya ba indai iya. Iya alu duduk ba mija makai.

"Jane, nuan mesti madah ngagai laki nuan. Mesti iya tusah ati ngiga nuan din." ko indai Jane. Iya pan alu duduk nunga Jane. Jane enda nyaut. Enti ulih, iya enggai ninga nama Jack. Jane lelak.

"Biar aja mak. Aku deka sarak enggau iya." jaku Jane nya ngasuh indai iya ke benung ngirup ai kopi nyau sedekan. Nyau tebatuk2 meh tudah indai iya.

"Nama ko nuan anak? Sarak? Nuan mesti berunding panjai anak. Ukai nyamai jaku deka sarak. " ko indai iya bejaku pengudah seput iya lantang bekau sedekan tadi. Enda nyamai amai ati iya ninga jaku Jane deka sarak. Indai ni ka meda anak iya janda? Jane enda memunyi. Salah iya telanjur jaku tadi.

"Kami duai Jack nyau enda ulih begulai enggau pangan diri. Engka nadai selatan kami duai iya panjai begulai mak. Ati aku pan enggai nyadi dipansal agi." ko Jane nyau sesingut nyabak. Nyau enda alah ditagang iya agi meh ai mata iya nya. Indai iya sinu meda Jane ke nyau sesingut nyabak. Ai mata iya enda berasai labuh meda anak iya nya. Jane enda madah ke iya senentang Jack ke begila enggau Jessy. Laban iya enggai meri nama Jack jai ba mata indai iya.

Indai Jane angkat, alu merap Jane. Jane pan alu sesedan nyabak dalam berap indai iya. Emosi Jane mudah amai terganggu. Tambah iya benung betubuh dua. Sigi mudah ensiban ati.

🌸🌸🌸🌸🌸🌸🌸🌸🌸🌸🌸🌸🌸

Jessy duduk merap patung ba atas katil. Ai mata iya ari tadi majak naya nerutu masah ke kuyu iya. Ati iya pedis ngenang ke Jack mai iya putus. Jessy malik ngagai Joyce ke udah jenak tinduk sepiak iya. Jari iya murus2 buk anak iya nya. Sinu iya meda mua anak iya. Kelalu mit amai Joyce lenyau apai iya. Kelalu tumu amai Joyce badu ngasai ke pengasih siko apai. Sekumbang iya betemu enggau Jack, Joyce gaga amai. Joyce nganggap Jack nya apai iya.

Berapa hari tok Joyce majak nanya ke Jack. Nanya nama kebuah Jack nyau jarang betemu enggau iya. Jessy sinu. Mansang iya semak Joyce  benung jenak tinduk, sium iya kening Joyce. Ai mata iya nyau neritik kena mua Joyce. Bakani meh iya deka nyaut Joyce nyema Joyce nanya ke Jack ila?

'Enda. Aku enda ulih nyerah kalah. Sekali nuan udah ngepun Jack, anang arap nuan ulih lepas!' ko Jessy bejaku kediri.

Jessy nyingkau ke telipun bincing iya. Tekan iya numur indai Jack. Bisi 3 kali dering, indai Jack nyaut.

📲"Hello, ibo. Tua mesti ngiga cara bakani ngasuh Jack enda muai aku." ko Jessy nyabak.

📲"Nuan anang irau sekali endu. Jack tetap empu nuan. Nuan bisi cara?" ko indai Jack bejaku ba ujung talian.

📲"Aku bisi siti cara. Siti cara ngasuh Jack pecaya ke anak ba dalam perut Jane nya ukai ari benih Jack." ko Jessy ketawa.

Sepengudah iya madam ke telipun, iya pan alu ketawa kediri. Kediri ke rancangan ke benung bemain ba untak iya.

'Kali tok, nuan enda selamat Jane!' ko Jessy ngenggam penumbuk jari iya.

Nama rancangan Jessy ke sekali tok?
~~~~~~~~~~~~~~~~~~~~~~~
"A mistakes repeated more than once is a decision."
~~~~~~~~~~~~~~~~~~~~~~~

Betampung...🌸