30 Hari(Bahasa Iban)

Tusun 12

~~~~~~~~~~~~~~~~~~~~~~~
"Relationships are like glass. Sometimes it's better to leave them broken than to try to put them back together and end up hurting yourself."-unknown
~~~~~~~~~~~~~~~~~~~~~~~

Hari-11

Pagi nya, Jessy sesalat bejalai belah bilik. Sepengudah seduai iya Jane ke bebibat lebuh nya, Jessy alu mai Joyce pulai ke rumah seduai iya malam nya mega. Taja iya gaga rancangan iya mujur, tang iya pedis ati. Pedis ati laban tok nyau dua hari iya enda ulih contact numur telipun Jack. Setiap kali iya nguji deka telipun ngagai Jack, telipun Jack ditutup.

'Hishh! Kini penunga Jack tok.' ko Jessy mucau kediri. Selalu ujung minggu bakanya, Jack bisi datai ke rumah ngusung iya. Jack ngemai seduai iya Joyce brjalai maya ujung minggu. Tang saritu, Jack langsung nadai telipun iya. Sepengudah nama utai ke nyadi empai lama, Jack alu nadai bisi contact iya

"Mummy, nama uncle Jack nadai kitu." ko Joyce nanya indai iya ke benung enda terenah duduk baka belut ke benung angat nya. Jessy malik ngagai Joyce ke benung manggum botol susu iya. Jessy nemu kaul Joyce enggau Jack ke baka apai enggau anak nya. Joyce chukup rapat enggau Jack. Jessy semina murus2 pala anak iya aja, iya enda nyaut tanya ari Joyce. Jessy enggai bula ke anak iya.

'Manah aku nguji telipun ngagai ibo, indai Jack empu.' ko Jessy bejaku kediri. Jingkau iya telipun bincing iya ke telempai atas mija, giga iya numur indai Jack. Tekan iya call. Lama diri ga bedering enda besaut. Uji ke Jessy baru.

📲"Hello, ibo. Aku tok Jessy."ko Jesy.

📲"Hello, nuan endu Jessy. Nama utai?" ko saut indai Jack ba ujung din.

📲"Ibo, Jack bisi dia ka? Nama aku nguji deka telipun iya, enggai nyadi. Dua hari tok udah Jack enda telipun aku. Joyce majak tatuk nanya ke iya." ko Jessy bejaku. Gaga iya sinu munyi nyawa iya.

📲"Enggai bula ke nuan aku endu. Jack nadai ditu. Kitu nuan ke rumah kitu. Bisi utai deka dikerandau ke aku enggau nuan." ko indai Jack.

Jessy alu madam ke telipun iya. Iya deka ke rumah Jack. Tang iya enggai mai Joyce.

"Joyce, nuan ibun inik sepiak au. Mummy ka gawa dulu." ko Jessy bula ke anak iya. Joyce ngangguk ke pala aja.

Jessy alu beradu. Joyce di anjung iya ke rumah ibo ke nguan Joyce. Sepiak rumah iya aja.

🌸🌸🌸🌸🌸🌸🌸🌸🌸🌸🌸🌸🌸

Jane dani pagi nya alu tuchum meda Jack bisi ba sepiak iya. Jack agi mejam ke mata tinduk. Jari iya ngayam2 buk Jack. Tegu iya mata Jack, idung Jack serta mulut Jack. Lantang ati iya ba hotel nya enggau Jack. Nadai sapa ngacau seduai iya dia. Nadai ninga entua iya nyindir, nadai meda Jessy kia ngiga Jack. Serta nadai sapa nemu dini endur seduai iya. Tang sampai kemaya seduai iya deka diau ba hotel? Rumah nyin tetap rumah seduai iya. Jane enggai alu ngelak ke rumah iya digaga urang peneka ati.

Jack agi tinduk jenak. Tinduk jenak baka peninduk anak mit. Jane tuchum. Jane naruh pengarap ke tinggi ngambi ke rumah tangga seduai iya Jack mujur. Jane enda ulih putus pengarap kelalu tumu. Jane enggai alah. Biar nyawa ba ujung tanduk, Jane tetap deka terus ngetan ke rumah tangga iya enggau Jack. Taja empai bisi rejeki anak beri petara. Tang Jane arap ke atur ari Petara. Baru hari ke-10. Jane ngarap ke bisi ajih dalam 30 hari seduai iya Jack nguji ngetan ke rumah tangga seduai iya. Nadai siko urang deka meda rumah tangga ke udah betaun didiri ka nyau runtuh baka nya aja. Bungai pengerindu ke majak layu, ulih di tanjah ngena ai kesabaran. Di tanjah enda leju ninting ari, bungai ke layu nya nemu bebali ngerembai nyadi bungai pengerindu ke baru. Asal ati anang mudah alah laban penguji.

Jane ngangkat ke mua iya deka nyium kening Jack. Iya enda nemu nama ati iya majak sayau ke Jack maya dalam penguji tok. Engka nya kebuah Petara meri penguji, ngica ke ati mensia nemu menghargai erti penyayau serta pengerindu ke pangan diri. Idup ni enda di uji? Ari penguji, kitai tau kering angkat baru. Jane tuchum meda Jack jenak udu tinduk. Sepu iya mua Jack. Sekali Jack tekenyit alu tedani. Peda iya Jane benung tuchum sepiak iya. Jack pan alu sama tuchum. Lantang ati Jack maya tok. Laban semina bisi seduai iya Jane aja. Ukai seduai iya lari ari penguji, tang seduai iya lari ngiga pengelantang seduai iya empu.

"Selamat pagi, sulu." ko Jane alu micit idung Jack.

"Selamat pagi nuju nuan, sayau. Tuchum nuan sempama baka terang mata panas pagi tok." ko Jack nundi Jane.

Jack angkat alu merap Jane. Kucup iya bahu Jane. Lenyau meh semua penusah seduai iya. Asai ke dunya di empu seduai iya aja. Jane tuchum laban gaga dalam berap Jack. Asai ke baru keterubah jadi suba.

"Ka kini tua saritu Jack? Sampai kemaya tua deka betaban lari bakatok?" ko Jane nanya. Iya alu ketawa ninga jaku iya empu ke nyebut betaban lari nya.

"Aku bisi minta cuti 3 hari. Tua bejalai ke bukai. Bejalai nitih kini kedeka ati tua. Asal semina bisi nuan enggau aku aja" ko Jack bejaku. Berap iya ba tubuh Jane di rat ke iya agi. Asai enggai ngelepas ke Jane.

Jane enda nyaut. Iya ngalih ke tubuh iya nunga Jack. Mua seduai iya sama betunga. Mata seduai iya betemu. Semina ari perening mata seduai iya madah ke penyayau seduai iya alu nurun ke ati. Mulut seduai iya betemu. Betemu kena madu pengerindu. Jari seduai iya enggai melengka enggau pangan diri.   Adakah 30 hari nya patut ditarit Jack pulai?

🌸🌸🌸🌸🌸🌸🌸🌸🌸🌸🌸🌸🌸

Jessy alu ngenuduk ke diri ba atas sofa ba rumah Jack. Mata iya gegining ngiga Jack enggau Jane. Sekali datai indai Jack mincing dua iti cangkir ai teh. Sua iya ngagai Jessy cangkir ke siti.

"Kini Jack ibo?" ko Jessy nanya.

"Enda nemu aku tok endu. Kini enda iya nitih ke bini iya ke dadak nya! Sial indu nya. Antu enggai majuh indu nya. Salah gaga Petara kini indu baka Jane nya." ko indai Jack alu ngelabuh ke burit iya duduk ngerimbai Jessy. Pedis ati iya ngenang ke Jane.

"Jack enda tau ninggal ke aku ibo. Iya udah besemaya deka jadi enggau aku. Jack bisi besemaya deka sarak enggau Jane alu jadi enggau aku!" ko Jessy bejaku. Enda berasai tiun nyawa iya ditinggi ke iya. Nyau enda iya ngira indai Jack.

"Anang nuan irau ati endu. Ka bakani, Jane enda ulih ngaga nama2 laban aku tok indai Jack. Jack mesti ninga jako aku. Tua mesti ngiga rancangan endu! Anang tua alah laban indu antu Jane nya. Empai iya ngelala aku. Kumbai tau enggau iya memain aku." ko indai Jack bejaku. Enda ngasai kediri tuai meh indai Jack. Sema jaku kaki sepiak udah ngindik pintu sebayan. Penulah enda ngira tuai tauka biak. Kumbai iya penukah datai baka munyi guntur ba langit ko iya.

"Jack mesti jadi enggau aku enti nyema aku bisi tubuh ibo. Laban iya enggau Jane nadai anak. Jack sigi ngambi aku ke bini enti nyema aku ngandung ke anak iya." Jessy tetuchum ngagai indai Jack. Indai Jack pan alu tuchum laban nemu nama maksud jaku Jessy nya.

Dia seduai iya bulih rancangan seduai iya.

~~~~~~~~~~~~~~~~~~~~~~~
"You want me to act like we've never kissed, you want to forget; pretend we've never met, and I've tried and I've tried, but I haven't yet ... You walk by, and I fall to pieces." — Patsy Cline
~~~~~~~~~~~~~~~~~~~~~~~

Betampung…🌸