30 Hari(Bahasa Iban)

Tusun 11

~~~~~~~~~~~~~~~~~~~~~~~
"There are worse things than a broken heart. Like the love that you don't explore."-Dawson'S Creek
~~~~~~~~~~~~~~~~~~~~~~~
Hari-10

Jane enda nurun muka butik iya saritu. Iya udah madah ngagai Jill enggau Jwen, butik iya deka cuti 3 hari. Jill enggau Jwen pan nitih aja. Seduai iya enda mayuh tanya. Laban Jane ke ngasuh cuti jadi gaji seduai iya tetap bejalai. Jane ngiga pengelantang ati iya empu. Sepengudah utai ke nyadi demalam. Ati Jane chukup pedis. Enggau mata iya empu meda Jack mai Jessy ba bilik iya. Ba atas tilam iya. Bakani meh iya deka nerus ka tempoh 30 hari? Berasai panjai meh hari nya sepi iya. Jane deka nyurut kediri, tang iya udah tepejuh besemaya enggau Jack.

'Enda ngawa Jane. Nuan anang ngalah dulu. Tunjuk ke sida nuan kering ati!' ko Jane bejaku kediri.

Enti semina penusah ba rumah tangga iya ketegal seduai iya Jack nadai persefahaman agi, iya agi ulih nerima. Jane mega agi ulih nerima enti iya nemu Jack bisi indu bukai ba belakang iya. Tang Jane enda ulih nerima enti bisi urang bukai nguji deka masuk champur dalam rumah tangga iya enggau Jack. Jane chukup ensiban ati ngenang chara indai Jack ngelayan iya. Jane chukup sinu ngenang siko mensia ke bepangkat indai nguji deka ngeruntuh ke rumah tangga anak diri empu. Udah ga rumah tangga seduai iya Jack mina nganti maya aja deka runtuh, di tambah agi champur tangan ari entua iya.

Jane ngambi pemutus bemalam ba hotel aja sepengudah iya pansut ari rumah demalam. Diau ba rumah diri empu asai baka diau ba neraka. Telipun bincing Jane pan dipadam ke iya. Laban iya enggai digiga Jack. Jane deka ngelantang ke ati iya empu.

Jane angkat ari katil. Jingkau iya telipun bincing iya. Idup ke iya. Peda alu teruduh mesej enggau call ari Jack. Baca Jane siti2 mesej ari Jack. Jack merayu ngagai Jane ngasuh Jane pulai. Sinu ga ati Jane meda usaha Jack minta iya pulai. Ai mata iya enda mukai2 alu labuh. Benung iya maca2 mesej ari Jack, peda Jack bisi call iya. Jane alu nekan saut.

📲"Jane? Dini nuan diatu? Jane, pulai meh nuan au." ko Jack bejaku ba ujung din. Dinga nyawa Jack baka ke benat idung. Baka ke baru udah nyabak.

Jane enda bejaku. Iya ngelak ke Jack aja bejaku.

📲"Nama nuan enda bejaku sayau? Padah ke aku dini endur nuan? Aku deka nitih ke nuan." ko Jack enggau sesabak bejaku.

Jane pan alu sinu. Enda iya sanggup ringat enggau Jack lama2.

📲"Jack, enti nuan deka nyelamatka rumah tangga tua, nuan kitu." ko Jane bejaku. Ai mata iya majak naya.

Jane pan alu madah ngagai Jack dini alai hotel endur iya diau. Iya deka ngasuh Jack enggau iya bemalam dia. Engka ba rumah maioh urang deka ngacau seduai iya. Seduai iya nguji ngiga pengelantang seduai iya kediri. Jane tetap enggai alah ari entua iya. Enggai alah ari Jessy. Alang2 ngenggam bara api, biar nyadi abu. Jaku nya dipegai Jane. Jalai pengidup rumah tangga iya ukai ba jari sida tang Petara ke ngatur.

'Nuan Jessy enda ngasuh ati aku lemik!' ko Jane.

🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸

Sepengudah Jack pulai gawa, Jack alu tama ke bilik pangking. Iya ngambi siti beg gari, alu simpan iya gari enggau keresa iya. Jack udah minta cuti nadai gaji 3 hari. Tambah pagila hari enam. Jack besemaya deka mai Jane becuti ke tempat bukai. Nya meh siti usaha Jack deka nyelamatka rumah tangga seduai iya Jane.

Udah tembu besimpan ke keresa iya, Jack alu pansut ari bilik. Sekali tepeda ke indai iya ba bilik besai.

"Ka kini nuan Jang? Bebai ke beg gari!" ko Indai Jack nanya. Mata iya meda beg gari ba jari Jack.

"Aku deka enggau Jane." pandak aja saut Jack.

" Nama guna nuan nunduk ka indu jahanam baka Jane nya? Peda nuan iya lari ari rumah tok. Agi ga nuan nguna inda bansa nya! Nama utai udah diberi indu nya empa nuan nyentuk ke nuan tuyu baka tok!" ko Indai Jack bejaku. Nyawa iya ancik pemesai. Udah ga sigi tak pama.

"Indai, ulih nuan anang nyebut bini aku bakanya. Jane enda salah indai. Aku ke salah. Aku ke begila enggau Jessy. Tang diatu aku deka mutar ke penusah kami duai iya. Jadi indai, aku enggai kita majak masuk campur dalam hal kami duai iya." ko Jack alu bejalai muka pintu.

"Jack!!!! Sesingkang kaki nuan pansut ari tok, nuan nya anak derhaka! Indu sampah bakanya diguna nuan! puiiiii!" ko Indai Jack meradak ke nyawa iya. Iya alu ngeludah. Empa pemenci iya enggau Jane. Jack enda peduli ke indai iya. Iya alu pansut mai beg gari iya.

Simpan iya beg gari iya ba bonet kereta, udah nya setat ke iya kereta. Iya pan alu nyau.

🌸🌸🌸🌸🌸🌸🌸🌸🌸🌸🌸🌸🌸

Jane agi nganti penatai Jack ke hotel endur iya bemalam. Iya nganti Jack ba lobi hotel. Tilik iya jam ba jari iya semak pukul 7 lemai. Apin lama udah nya, peda iya Jack udah datai. Jari Jack mincing beg gari ke besai. Jane angkat napat ke Jack. Iya pan alu tuchum ngagai Jack.

Jack datai alu merap tubuh Jane. Enda iya malu dipeda bala ke gawa ba hotel nya. Sium iya kening Jane.

"Minta ampun ke nuan Jane!" ko Jack. Jane semina ngangguk ke pala aja. Seduai iya pan alu bejalai bepegai jari nuju bilik Jane.

"Simpan dalam lemari nya dulu beg nuan Jack. Nuan mandi dulu. Udah nya tua pansut makai." ko Jane.

"Aram. Enggau aku mandi!" ko Jack tetuchum merening Jane. Jane temalu kediri.Bedau nyaut Jane, enda mukai2 alu dikatung Jack tubuh Jane. Alu bai iya tama ke dalam bilik mandi. Jane alu nyerauh tekenyit. Rawan ati iya dikatung Jack bakanya.

Datai ba bilik mandi, Jack alu ngeleka ke Jane. Peda Jack mata Jane. Mata Jane bisi bangkung.

"Minta ampun Jane. Aku ngenusah ke nuan." ko Jack bejaku. Jari iya negu kuyu Jane. Ai mata Jane pan alu labuh. Sinu asai ati Jane. Sinu ngenang ke rumah tangga seduai iya. Sinu ngenang ke usaha seduai iya deka nyelamatka rumah tangga seduai iya. Bakani enti 30 hari nya hari kepenudi seduai iya begulai melaki bini. Jane alu nyabak sesedan sinu. Jack pan sama nyabak. Tarit Jack tubuh Jane. Alu berap iya.

Buka Jack ai paip pancur. Seduai iya pan basah  ba baruh pancur ai nya. Mata seduai iya bela beperening enggau pangan diri. Bisi tedai penyayau agi disimpan ba ati seduai iya. Enggau penuh pengerindu, mulut seduai iya betemu mantup ke pengelengau ngagai pangan diri. Seduai iya basah, basah laban pengerindu agi besarang dalam ati seduai. Jack enggau Jane enda nangi bisi urang ngacau seduai iya dia. Malam nya di empu seduai iya. Semina seduai iya…
~~~~~~~~~~~~~~~~~~~~~~
"One sweet, sad secret holds my heart in thrall; A mighty love within my breast has grown, Unseen, unspoken, and of no one known; And of my sweet, who gave it, least of all."- Felix Arvers
~~~~~~~~~~~~~~~~~~~~~~~
Betampung…🌸