30 Hari(Bahasa Iban)

Tusun 6

~~~~~~~~~~~~~~~~~~~~~~~
"Flowers grow back. Even after the harshest winters, you will too." — Jennae Cecelia
~~~~~~~~~~~~~~~~~~~~~~~
🌈Hari ke-5

Jane benung gagau natuk2 kalkulator ngira stok barang ba butik iya. Iya benung ngira stok barang ba butik iya laban maioh nerima peminta ari bala customer tetap iya. Makin sari makin mujur butik Jane. Makin enda chukup jari Jane ngurus ke butik iya nya.
Butik Jane bisi 2 iko staf aja ianya Jill enggau Jwen. Iya sigi enda beguna ke staf maioh laban kena iya jimat kos. Jill enggau Jwen endang udah lama gawa enggau iya dia. Tambah mega Jane sigi rindu ke pengawa seduai ia.

Umbas iya ga urang datai tama ngagai butik Jane hari minggu nya. Laban ke agi ba ujung minggu, sigi hari endur urang belelak serta bejalai enggau diri sebilik. Ni ke bisi sulu, bebai diting.Enda rugi Jane nambah ke koleksi gari ke baru ba butik iya.

Benung Jane kisuk2 natuk ke kalkulator iya, Jane tekenyit ngasai ke bisi urang bediri depan kaunter endur iya duduk. Angkat ke iya pala ka nemu sapa urang nya.

"Joel!" ko Jane alu ngeleka ke kalkulator iya. Joel depan iya semina tuchum2 aja. Enda bepadah tudah Joel, peda2 nyau ba depan iya.

"Bendar nuan Jane, nyau pukul 12 ngalih hari tok. Udah makai nuan ka?" ko Joel nanya. Ninga Joel madah udah pukul 12 ngalih hari, Jane pan alu nilik jam ba jari iya.

"Amai endar neh Joel. Mayuh customer saritu Joel." ko Jane nempik kening iya. Nyau enda berasai ga hari bai kelalu bendar gawa. Nyau enda tepakai ke diri empu tudah Jane.

"Nuan bisi gastrik enti enda silap aku neh. Manah nuan ngintu diri diatu. Aram. Aku pan ka makai tok." ko Joel bejaku.

"Bah, aram meh."Ko Jane alu angkat ngambi beg iya. Sepengudah Jane mesan ngagai Jill enggau Jwen ngasuh dua iko nya nyaga butik iya enda lama, Jane alu nitih ke Joel pansut.

Jane enggau Joel ngiga endur seduai iya deka makai. Joel mai Jane nepan kereta iya. Jane nitih ke Joel aja. Dalam kereta macham meh randau seduai iya laban lama enda berandau bakanya sekumbang udah mai diri empu nitih ke pengawa diri. Joel sigi udah nemu Jane jadi enggau Jack. Laban iya bisi ngenatai kediri maya rami kawin Jane enggau Jack 10 taun suba.

"Keni nuan tau nemu butik aku ditu deh Joel?" ko Jane nanya Joel. Nyau enda ingat ga iya ka nanya Joel tadi. Ketemu iya, iya nadai madah ngagai Joel dini endur butik iya nya. Jane pan enda ingat nanya nama pengawa Joel.

"Kan nuan meri aku kad bisnes nuan kemari. Enda patut nuan enda ingat." ko Joel nyaut, jari iya megai stereng kereta. Mata iya nyeling2 Jane ba penuduk sepiak iya. 'Makin bajik Jane diatu tang sayau udah bini urang.' ko Joel dalam ati. Tudah Joel endang udah lama nyimpan ati ngagai Jane. Jane nganggap Joel semina kaban aja. Kaban sama belajar ba universiti. Enda lebih ari nya. Tang ukai ulih ditagang ati siko2 mensia pama udah ka labuh pengerindu enggau kitai.

Jane alu ketawa laban ngasai kediri nyau lalek enda teringat ke diri bisi meri Joel kad bisness iya kemari. Kelalu maioh runding tudah Jane. Macham utai ke bemain ba runding iya. Ni ke pasal bisnes iya ke kadang2 bisi nurun niki. Ni ke pasal rumah tangga seduai iya Jack. Enti nyema dalam kandang 30 hari seduai iya Jack enda ulih nyelamatka rumah tangga seduai iya, Jane nitih aja meh enti nyema Jack ka neruska seduai iya sarak. Begulai pan seduai iya, nadai meh guna enti penyayau enggau pengerindu seduai iya nyau lela.

Pemuas tudah Joel musin2 ke kereta iya ngiga alai endur makai, Joel pan alu ngetu ke kereta iya ba siti kedai makai.

"Ba ditu tua makai Jane. Nyamai utai empa ditu." ko Joel alu parking ke kereta iya. Jane pemaik Joel aja.  Seduai iya pan milih endur duduk alu mesan pemakai seduai iya.

Benung Jane enggau Joel rancak berandau, peda bisi urang mansang ngagai  mija seduai iya.