30 Hari(Bahasa Iban)

Tusun 17

~~~~~~~~~~~~~~~~~~~~~~~
"Most people cheat because they're paying more attention to what they're missing rather that to what they have."
~~~~~~~~~~~~~~~~~~~~~~~

Hari-16

Jack mai Jessy betemu ngalih hari nya. Laban bisi utai deka dikerandau ke iya enggau Jessy. Ati Jack pedis ngenang ke Jessy enda nemu nyimpan rahsia seduai iya. Jack enda nyangka Jessy bisi ngerikut ke video seduai iya ke beleman lebuh nya. Jack ngambi Jessy ari sekula endur Jessy ngajar.

"Kini tua sulu?" ko Jessy nanya. Payuk2 iya meh lengan Jack ke benung deriba. Jack enda nyaut. Mata Jack fokus enggau jalai alun. Tang ati iya din pedis amai ngenang ke ulah Jessy.

Jack alu nyangkai ke kereta iya ba tisi jalai. Tarit iya  panjai seput iya sebedau dikesuh ke iya belubah. Jessy sepiak iya rerising aja. Jack malik ngagai Jessy ba penuduk sepiak iya.

"Jessy, aku udah minta nuan anang mucur ke rahsia tua lebuh nya." ko Jack ngepun ke jaku. Jari iya ngenggam stereng kereta. Genggam iya rat. Iya nangi enggai ke iya enda ulih tat deka nampar mua Jessy. Mata iya tajam merening ke mua Jessy. Jessy semina tuchum aja ngagai Jack. Jessy udah nemu nama utai deka dikerandau ke Jack enggau iya. Engka Jane bisi nusi ngagai Jack nama utai ke nyadi demalam.

Jessy tuchum sinis.

"Oh, jadi Jane udah madah ngagai nuan nama utai ke nyadi demalam?" ko Jessy nanya Jack.

"Sampai nuan ngerikut ke video tua nya? Nama semua tok Jessy!!!" Jack merak Jessy. Jessy temati kutu ninga pemesai nyawa Jack. Empai kala iya meda Jack nganu bakanya.

"Nuan ninggi ke nyawa ba aku Jack?! Sigi aku sengaja madah ngagai Jane. Biar Jane nemu nama pengawa tua. Biar iya meda nuan ba dalam video nya, nuan benung nyamai enggau aku. Biar Jane meda aku lebih pandai ngelayan nuan." ko Jessy alu ketawa. Iya betempik jari.

'ppaappppp!' Jessy tekenyit ninga stereng kereta di tempap Jack. Udah nya gamal Jessy ensinat ensepi lengan iya diperuk Jack. Genggam Jack udu lengan Jessy.

"Nuan tok ati sitan! Nesal aku betemu enggau nuan!" Jack sekali agi merak Jessy. Pedis ati iya ninga jakh Jessy nya.

"Leka ke jari aku Jack! Leka. Udah laun nuan nesal Jack. Asi udah nyadi bubur. Salah nuan, salah nuan meri janji palsu ngagai aku. Nuan besemaya deka nyarak Jane. Nuan besemaya deka jadi enggau aku. Nuan udah besemaya enggau Joyce, nuan deka nyadi apai iya! Salah nuan Jack!" ko Jessy merak Jack. Ai mata iya labuh. Ukai iya deka sengaja ngeruntuh ke rumah tangga urang. Jari ke betempik sepiak aja, enda akan bemunyi. Bakanya meh Jessy. Enti Jack enda ngepun ke dulu, Jessy enda bakanya.

"Nuan baka ke enda sedar diri bisi bini. Nuan sengaja ngambi ati aku. Nuan empu mai aku nyambung ke pengerindu tua suba. Nuan madah deka sarak enggau Jane. Nuan meri janji palsu Jack!" ko Jessy baru. Ai mata iya naya masah nerutu kuyu iya. Iya enggai Jack ngeletak ke salah nya ba iya siko aja.

"Aku minta ampun Jessy. Salah aku laban kelalu nitih ke ati suba. Bai ati aku sunyi ketegal Jane gagau ke kedai iya. Salah aku. Tang diatu, aku minta kasih ke nuan. Minta nuan badu ngacau aku agi. Aku deka neruska rumah tangga aku enggau Jane. Laban Jane udah betubuh bisi. Jane benung ngandung ke anak aku!" ko Jack. Mulut iya tuchum gaga ngenang ke utai disebut Jane demalam. Jane madah kediri bisi tubuh. 10 taun Jack udah nganti.

Jack ngeleka ke genggam jari iya ba lengan Jessy. Jessy tebelenga ninga Jack madah ke Jane bisi tubuh. Ai mata iya naya. Naya enggai badu.

"Nyamai nuan ngasuh aku badu ngacau nuan? Ati aku tok, bakani Jack? Nuan nemu aku sayau ke nuan. Aku enda ulih idup nadai nuan Jack. Nuan meri aku janji palsu. Diatu nuan deka minta putus enggau aku. Nama semua tok?" Jessy enggau sesabak. Jari iya mandam2 lengan Jack. Ancur meh ati iya ninga Jane ke betubuh bisi. Kira Jack deka mutus ke kaul seduai iya.