30 Hari(Bahasa Iban)

Tusun 21

~~~~~~~~~~~~~~~~~~~~~~~
"I gave you my heart. I just didn't expect to get it back in pieces."
~~~~~~~~~~~~~~~~~~~~~~~

Jane ngelenggak ke pala iya merening dada langit. Tumu amai ga mata panas mansut ke diri. Tilik iya jam ba jari iya, baru manggai pukul 8 pagi. Tang pancar mata panas pagi nya bisa amai kena ba kulit iya. Jane nyingkang ke kaki iya bejalai tama ke lobi sepital. Jane bediri degi2 ba tengah jalai urang. Urang ke mansa kin kia enda di ibuh ke iya. Mata Jane gegining merati ke tiap iko mensia ba dia. Bisi ke nyabak, bisi ke gaga, bisi ke tusah ati. Tusah ati baka ati iya diatu. Enda berasai ta angat utai nerusur ba kuyu iya.

Kendas iya, ai mata iya enda bepadah deka labuh. Jane megai pala iya laban ensepi pala iya sebening. Perut iya pepedi asai deka engkual. Tang di tat ka iya aja.

*************
Tikau pulai...
Demalam, sepengudah iya sangkai ba rumah seduai iya Jack kira2 pukul 7 malam, Iya pan alu tama ke dalam rumah.

Jane alu tama ke bilik pangking seduai iya Jack. Buka aja pintu, Jane tekenyit meda Jack nyau melempai duduk enda ngeleda. Jane alu berumban mansang semak Jack. Peda iya jari Jack penuh darah. Jane kesal alu ngambi kain tula ke bisi dia kena iya mampul abi telih disayat Jack nya. Jane ngusak2 tubuh Jack. Ditegu iya kedap ba jari Jack, agi bisi kekebut kedap Jack. Jane enggau sesabak pansut ari bilik deka minta sah entua iya. Laban iya tama ke dalam rumah tadi nadai meda entua iya dua iko nya.

Jane nyerauh seraya ngetuk pintu pangking entua iya. Alu madah ke Jack enda ngeleda ba bilik.  Sida sebuat pan alu berumban naban ke Jack ke sepital. Datai aja ba sepital, Jack pan alu di tan ke urang. Sida Jane sebuat enggai madah ke dutur kebuah jari Jack telih nya. Dipadah ke sida kena kaca aja. Nangi enggai ke ngemalu ke nama sida sebilik enti ditemu urg.
*******************
Ari demalam Jane enda tinduk. Jane berasai buntau amai. Buntau ketegal Jack di tan ba sepital. Pandak endar ga runding nuan Jack deka munuh diri ko ati Jane bejaku. Enda nyangka amai Jane ngenang ke Jack deka munuh diri ketegal enda alah napi penusah ke nuntung nya. Nasib Jane tumu meda. Enti laun, kada enda apus seput Jack nya demalam.

Jane nyingkang ke kaki iya nuju ke wad lelaki. Wad endur Jack di tan ke urang. Sigi jam urang luar ngabas bala ke bisi dia meh maya nya. Apai enggau indai Jack engka pulai ke rumah dulu. Pulai mandi. Datai aja Jane ba wad lelaki, ari jauh Jane meda Jack benung gegaring gali enggau mata ke pejam. Jack sigi udah ngeleda demalam. Nasib Jack manah laban telih ba jari Jack enda dalam.  Dutur madah keadaan Jack stabil. Darah pan enda maioh lenyau.

'Petara agi nyangkung nuan Jack.' ko Jane dalam ati. Jane sinu ngenang ke nasib seduai iya Jack nya. Sinu meda Jack. Jack agi laki iya. Taja bisi pedis ati ke Jack, tang Jane enda sampai ati meda pendiau Jack bakanya. Jane mansang semak katil Jack. Urang lain udah menuh ke wad nya. Bela ngabas bala diri empu.

Jane narit bangku alu duduk sepiak katil Jack. Jari iya murus2 bahu Jack. Jack tekenyit alu muka mata iya. Jack tuchum meda Jane ba depan mata iya diatu. Jack ngangkat ke jari deka negu kuyu Jane. Ai mata Jack pan labuh enda berasai. Jane pan sama. Ai mata seduai  bela sama labuh. Bela sinu ngenang ke nasib seduai iya nya.

"Jane, aku sayau ke nuan." ko Jack bejaku. Nyawa iya nyau teketar2 ngetat deka nyabak. Jane semina ngangguk ke pala aja. Jack ngangkat ke jari iya deka ngendas ai mata Jane. Jane megai jari Jack alu bai iya mulut iya. Jane nyium jari Jack.

"Badu nuan ngaga pengawa belik baka tok agi au." ko Jane nyabak. Kesal ati Jane meda Jack demalam. Taja iya benci tang iya agi meruan sayau ke Jack.

"Anang ninggalka aku agi au sulu." ko Jack bejaku. Ai mata iya labuh.

Sekali enda memukai baju Jane diruntun ari belakang.

"Agi ditu nuan indu sial? Aku enggai meda mua nuan ditu. Angkat nuan!" ko indai Jack seraya ngugut baju Jane. Ngasuh Jane angkat. Baju Jane ke digugut entua iya nya nyau nyekak rekung iya. Ka pen enda Jane alu angkat ari penuduk iya. Jane tekual2 ngelari ke jari entua iya ke agi ngugut baju iya. Urang maioh ba wad nya bela malik ngaga katil Jack.