30 Hari(Bahasa Iban)

Tusun 13

~~~~~~~~~~~~~~~~~~~~~~~
"So let’s ignore each other. Pretend like the other person doesn’t exist. But deep down, we both know it wasn’t supposed to end like this." — Unknown
~~~~~~~~~~~~~~~~~~~~~~~

Hari-12

Jane benung gagau besimpan ke gari seduai iya Jack ke dalam beg gari. Laban seduai iya Jack besemaya deka bejalai ke bukai sepengudah dua malam Jack enggau iya ba hotel dia. Bejalai jauh ari dia. Jack agi tinduk bebungkur ngena pua. Jane sengaja enda ngerak Jack. Malik ga iya ngagai Jack ke agi jenak tinduk, ya pan alu tuchum. Asai ke baru nanggam ke pengerindu suba nya meh seduai iya. Semua penusah ke nuntung rumah tangga seduai iya, di buai ke tisi. Tang empai temu meh hari pagila lusa.

Benung Jane agi besimpan ke keresa seduai iya, sekali Jane tekenyit diberap Jack ari belakang. Jane alu nyerauh mit bai ati iya tekenyit. Ni enda tekenyit, jari benung ngadu ke utai tang untak iya bejalai ke bukai. Nyau enda sedar ke Jack udah angkat dani.

"Tekenyit aku Jack." ko Jane murus dada iya. Jack ke merap iya ari belakang ketawa aja. Mulut Jack ngucup2 bahu Jane. Asai ke enggai pulai sepi Jack. Jack nangi enti seduai iya pulai ke rumah legi, kaul seduai iya Jane alu bebali baka ke udah. Tambah indai iya bisi ba rumah dia. Apai iya bisi mai indai iya  nya pulai ke rumah panjai kin tang indai iya degil. Indai Jack majak deka diau dia. Jack ukai deka muru indai iya, tang iya pan mesti ngira perasaan Jane ga. Ukai reti iya anak derhaka tang iya enggai ngeruh ke keadaan sida.

"Aku sayau ke nuan, Jane!"Ko Jack alu ngalih ke tubuh Jane nunga iya. Pegai iya kuyu Jane. Sium iya kening Jane. Jane ngelak ke aja. Sekali dinga telipun Jack belagu nanda ka bisi urang call.

Jack pan alu ngambi telipun iya. Peda iya, kangau ari apai iya.

📲"Hello apai." ko Jack nyaut.

📲"Hello jang, dini nuan? Pulai jampat nuan ke rumah kitu. Nya indai nuan luput dia alu bedau ngeleda. Jampat." ko bunyi nyawa apai iya baka ke benung sedanah.

Jack alu madam ke telipun iya. Nyau kesal ga ati Jack ninga apai iya madah ke indai iya din luput.

"Jack, nama hal?" ko Jane nanya Jack. Peda iya gamal Jack baka ke kesal.

"Indai, indai ba rumah luput alu bedau ngeleda." ko Jack alu nyingkau tula mandi. Iya pan alu tama bilik mandi. Irau ati iya pengudah ninga jaku apai iya nya.

Jane pan tekenyit ninga utai ko Jack nya. Taja entua iya nya jai enggau iya, tang enda ga iya sampai ati deka gaga ninga entua iya luput. Jane pan enda muai masa agi, iya alu jampat besimpan ke keresa seduai iya Jack.

🌸🌸🌸🌸🌸🌸🌸🌸🌸🌸🌸🌸🌸

Pengudah Jessy nganjung Joyce ke rumah ibo sepiak, iya pan nyetat ke kereta iya nuju ke rumah Jack. Laban bisi rancangan besai di atur seduai iya indai Jack. Jessy pan alu sesimbing mulut tuchum.

'Arap ke mujur meh. Kitai ka meda sapa paling pintar.' ko Jessy bejaku kediri dalam kereta. Iya pan alu ketawa kediri.

Apin lama udah nya, Jessy pan datai ba rumah Jack. Iya alu muka pagar alu tama. Asai ke baka rumah iya empu meh nya. Bakal nyadi rumah iya ila ko Jessy. Enti Jack enggau Jane sarak, rumah nya empu iya.

"Ibo, oh ibo. Udah datai aku." ko Jessy ngangau pengudah iya tama. Peda apai Jack ga pansut.

"Nuan nya endu Jessy. Lalu meh endu. Duduk dulu. Ibo nuan agi mandi." ko apai Jack bejaku. Iya pan alu ke dapur baru laban iya benung manggang jani ba belakang bilik.

Apin lama udah Jessy duduk, peda pansut indai Jack baru udah mandi. Agi bekena ke kain tula mandi.

"Duduk dulu nuan endu. Nganti aku udah begari. Nuan ngulih kediri ai ba dapur din." ko Indai Jack alu tama ke pangking. Jessy semina ngangguk ke pala aja. Enda sabar meh iya deka pejalai ka rancangan iya.