30 Hari(Bahasa Iban)

Tusun 10

~~~~~~~~~~~~~~~~~~~~~~~
"She was powerful not because she wasnt scared but because she went on so strongly, despite the fear."-Attious
~~~~~~~~~~~~~~~~~~~~~~~
Hari-9

Tembu makai lemai, Jack alu tama ke bilik pangking. Jane alu empai pulai laban bedau jam iya pulai. Baru manggai pukul 6 lemai. Jane nutup kedai iya pukul 7 malam.

Jessy agi ba rumah Jack laban di asuh indai Jack bemalam dia. Jessy enggau Joyce tinduk ba bilik temuai. Jane enggau Jack enda ulih ngaga nama2 laban indai Jack. Demalam Jack bisi ninga indai iya betimbal jaku enggau Jane. Iya alu pansut ari bilik ninga pemesai nyawa indai iya. Datai iya ba dapur demalam meda Jane benung nyabak.

Jack tusut runding ngenang kaul indai iya enggau Jane. Tusah meh ati iya. Demalam Jack bisi nguji berandau enggau indai iya senentang mai Jessy enggau anak iya bemalam ba rumah iya. Tang Jack pulai di anok indai iya. Jack dipadah indai iya anak derhaka. Pemangah indai iya nya enda alah laban. Sigi enggau iya magang ke betul. Ukai Jack enda kasih ke Jane, tang iya pan tusut runding bakani deka mutar ke penusah nya.

Jessy agi enda nemu malu iya. Majak Jack ngasuh iya pulai ke rumah iya empu tang iya alu ngeripot ngagai Indai Jack.

🌸🌸🌸🌸🌸🌸🌸🌸🌸🌸🌸🌸🌸

Benung Jessy nuci pinggai ke dikena sida makai tadi, datai indai Jack nyukil lengan Jessy.

"Endu, leka ke aja pinggai nya ar. Enda lama agi pulai Jane nya legi. Aku bisi rancangan." ko indai Jack nelai Jessy. Enggai ke didinga apai Jack ke benung ngirup kopi ba dia. Jeling2 iya ga apai Jack.

"Nama nya ibo?" ko Jessy ga nelai indai Jack. Leka ke iya pinggai tadi ba sinki.

"Bakatok, nuan encuri tama ke bilik pangking Jack. Nuan nemu2 meh nama utai ko aku." ko indai Jack ngenyit ke mata iya.

Jessy alu tuchum meh laban iya nemu nama maksud indai Jack nya.

"Faham aku ibo. Legi Jane datai, iya meda kami duai Jack ba dalam pangking. Kenya neh." ko Jessy ketawa rerinyik. Apai Jack nyeling seduai iya. Heran ati apai Jack meda seduai iya ke betelai dia.

Apin lama udah nya, nyau meh Jessy tok bejalai nuju ke pangking Jack. Baka ke dipadah indai Jack tadi. Peda iya jam ba dinding nyau ka manggai pukul 7 lemai.
'Enda lama agi pulai Jane.' ko Jessy dalam ati.

Datai Jessy ba pangking Jack, pusin ke iya meh tombol pintu. Enda dikunci. Jengguk iya pala ke dalam, peda iya Jack benung gali mejam ke mata. Tuchum aja Jessy.

Jari iya alu madam ke suis lampu bilik. Laban ke suis nya semak pintu. Padam ke Jessy meh lampu, alu petang tegayam bilik Jack. Jessy alu ngali kediri sepiak Jack. Tudah Jack enda sedar lampu dipadam laban udah telelap tinduk. Bai perut kenyang udah makai tadi. Ngantuk meh Jack. Jessy gali ngimbai Jack. Alu berap iya meh tubuh Jack.

Jessy alu niki atas tubuh Jack. Sium iya rekung Jack. Jack alu tedani. Tekenyit tudah Jack ngasai ke bisi urang ninggang iya ari atas. Laban ke petang, enda peda iya sapa ke ninggang iya nya. Sangka Jack Jane meh nya. Engka Jane lelengau enggau iya kenu ko ati Jack. Jessy ngasak meh atas Jack. Jari iya muka baju Jack. Jack pan sama. Buka iya baju Jessy. Enda meh Jack sedar nya Jessy.  Kumbai iya Jane.

Benung seduai iya bebelat kin kia ba tilam, sekali enda memukai tak terang bilik nya laban bisi urang masang lampu. Palik seduai iya ba pintu, Jane udah bediri ba mua pintu. Jane enda kekesap mata iya meda Jack enggau Jessy ke nadai serambar baju. Nasib Jack agi betancut. Jessy alu narit pua ngebab tubuh iya.
'Mujur rancangan.' ko Jessy dalam ati. Lelinsum iya tuchum.

"Jane!" ko Jack angkat ari katil. Palik iya ga Jessy ke duduk ba atas katil. Pegai iya lengan Jane. Jane agi enda kekebut. Asai ke enda pecaya iya meda Jack enggau Jessy ba atas katil iya

Sekali dikesai ke Jane jari Jack ke megai lengan iya.
"Jack, enti nuan deka beleman enggau indu nya, anang ba atas katil aku. Anang ba dalam bilik aku!" ko Jane merak Jack. Ai mata iya pan alu labuh masah nerutu kuyu iya. Keketap asai ati Jane din. Pedis ati iya enda ulih dilalai. Meda laki iya ba atas katil enggau indu bukai.

"Jane, minta ampun aku. Aku enda nemu nya Jessy. Aku nyangka nya nuan tadi." ko Jack bejaku nyau keketar bunyi nyawa iya. Iya amai enda sedar nya Jessy. Amai dikumbai iya Jane nya. Tambah mega Jack ke benung tinduk tadi. Agi mamau pala iya dani ngenyit ngasai bisi urang ninggang iya ari atas.

Jessy lelesei aja duduk ba atas katil. Lelinsum tuchum laban gaga ke rancangan iya mujur.

"Umbas Jack. Aku enggai ninga nama2 ari nuan! Diatu aku ka indu nya pansut ari rumah tok." ko Jane bejaku. Iya alu mansang ngagai Jessy. Alu runtun iya meh jari Jessy.

"Nuan tok indu sundal. Enda malu. Nyin anak nyan meda ulah nuan bakatok. Manah nuan pansut ari rumah aku. Pansut!!" ko Jane merak Jessy. Jari iya majak narit jari Jessy. Jessy agi ngetan ke pua. ke ngebab tubuh iya. Angkat Jessy bediri, kesai ke iya jari Jane. Enggau pengering iya, Jessy ngeju ke Jane. Jane pan alu teduduk di juk ke Jessy. Jessy berumban ngambi baju iya alu dipasuk ke iya.

"Berani nuan ngeju aku sundal? " ko Jane angkat bediri. Jari Jack ke narit iya dikesai ke iya. Mansang Jane ngagai Jessy, alu gugut iya meh buk Jessy. Jessy nama agi, alu nyerauh engkakai. Meda Jane ngugut buk iya, Jessy pan enggai alah. Gugut Jessy ga buk Jane. Jane enggau Jessy pan alu bebibat. Ni ke betampar, begugut buk enggau betumpu pangan diri seduai iya. Jack ke nyelara ke seduai iya nyau telentang di juk ke seduai iya.

Ninga utai chapuh ba bilik Jack, mansang indai Jack ari dapur. Peda iya Jane enggau Jessy benung bebibat. Indai Jack enda jugau. Mansang iya ngagai dua iko ke benung bebibat nya, enggau iya meh nyaup Jessy nidat Jane.

Pedis meh tudah Jane laban iya siko ngelaban dua iko. Jack enggau apai iya alu nyelarak ke sida 3.

"Umbas nya!" ko apai Jack merak sida 3. Sida 3 pan alu ngetu bebibat.
"Nuan tok indai Jang, baka ke enda tuai meh nuan. Nuan ke tuai meh sepatut iya meri chunto ke betul." ko Apai Jack nganu indai Jack.

"Nuan endu Jessy, manah nuan pulai ke rumah nuan empu. Enda manah nuan bebai ke anak nuan tinduk ditu. Nya peda anak nuan meda ulah kita 3. " ko apai Jack baru. Joyce bebengap meh ba mua pintu.

"Eh ukai salah endu Jessy nya. Indu tok patut pansut ari ditu!" ko indai Jack bejaku nunjuk ngagai Jane. Jane enda memunyi.

Jessy alu pansut ari bilik Jack. Tarit iya jari anak iya bai iya tama bilik seduai iya. Apai Jack alu narit jari indai Jack. Bai iya pansut.
"Pansut tua!" ko Apai Jack ngemangah kediri ngagai Indai Jack.

Tinggal Jack enggau Jane aja ba bilik. Jack alu nambit pintu. Kunci iya. Jane duduk ba kaki katil. Buk iya nyau teberunsai bai bebibat enggau Jessy tadi. Dinga Jack, Jane benung sesingut nyabak.

"Jane, aku minta ampun! Amai enda nemu nya Jessy tadi. Nadai aku ka ngayah ke nuan sampai bakanya Jane. Taja aku begila enggau Jessy, tang aku enda kala nguji deka negu iya." ko Jack bejaku. Pegai iya jari Jane. Jane semina nunduk ke pala iya.

Belubah Jane ngangkat ke pala iya. Mata iya ke agi basah laban ai mata. Iya merening ke dalam mata Jack.

"Jack, enti indu nya enda pansut, biar aku aja pansut!" ko Jane angkat bediri. Iya alu ngambi beg luggage. Buka iya lemari gari,  alu besimpan ke sida gari iya. Simpan iya keresa iya empu. Jack ke narit2 jari nagang iya enda di ibuh ke iya.

"Ka kini nuan Jane?" ko Jack nanya.

Jane enda nyaut. Tembu iya besimpan ke sida keresa iya, Jane merening mua Jack.

"Nuan anang ngiga aku. Enti ulih, meri aku masa kediri!" ko Jane bejaku. Iya alu pansut ngirit beg luggage iya. Sepengudah nepu ke beg luggage iya ke dalam bonet kereta, Jane alu nyetat kereta. Iya alu bejalai. Ai mata iya naya masah nerutu kuyu iya. 

~~~~~~~~~~~~~~~~~~~~~~~
"Some women fear the fire. Some women become it."-R.H. Sin
~~~~~~~~~~~~~~~~~~~~~~~

Betampung...