عقارب تقتل بصمت ((لن أتخلى أبداً ))

البارت الاول

السلام عليكم

عقارب تقتل بصمت ((لن أتخلى أبداً))

بقلمي( سقين الشمري )

لا يسمح او يحلل نشر القصة بدون ذكر اسمي

قصة اليوم هي قصة حزينه نوعًا ما بسبب ما يحصل لبطله القصة

هي كانت قويه واجهت الكثير من المصاعب لكن اتعبتها وأتعبت روحها الى حد ما

هي إرادات التحرر من العادات والتقاليد إرادات عيش حياتها كما تريد هي

وقفت بوجه عادات عائلتها وتحدتهم ارادت ان تبين ان للمراه مكانه في المجتمع وان لها دور كبير أيضا

كان مشوراها طويل وناجح الى ان صادفتها قصة غرام وبعدها مصاعب الحياه الكثيره

ماذا سيحصل بها وهل ستتفوق وهل سوف تنجو من ما يحصل لها ؟؟؟

........................

السلام عليكم اني نور صاحبه او بطله القصه مثل متحبون سموني اني من عائله محافظه جدا تحكمها العادات والتقاليد القديمة بحيث ما عدنه بنيه واصله بالدراسة

حدها السادس ابتدائي وتكعد بالبيت المهم عرفت تقرأ وتكتب عائلتي تتكون من امي وأبوي

واخواني ٥ وخواتي ٤ وياي يعني خواني ولا واحد مزوج وخواتي بس الجبيره ورجلها استشهد بحرب اَيران يعني ارملة

كاعده بيتها هيه وجهالها الي هو قريب علينه واخوي كاعد يمها بحيث قله ما نشوفه يعني انواب يجي يمنه عايش يمها

كلش يحب الدراسه وطموح جداً ويريد يطلع معدل عالي علمود يدخل كليه زينه

اما الباقين خواني عايشين ويانه بيهم الي يدرس والي يشتغل واني جنت بزر الكعده وأختي الي اكبر مني يعني اني جايه بعدها أكبر مني بسنه وحده الي يشوفنا عبالك توم لان نفس العمر والطول

جان الي واهس بالدراسة كلش احب اوصل واصير شي بالمجتمع كلش طموحة بس ابويه وعمامي جانو ميقبلون البنات يكملن دراسه حدهن لصف السادس ابتدائي ويبطلن بس الولد لا لازم يكملون

جان بوكتها اكثر العوائل تفكيرها هيج يعني مو بس اهلي اني جنت العزيزه عند ابويه كلش يحبني بس رغم هذا جنت اخاف منه

لان كلش عصبي وأبد ميتحاجة حتى خواني يخافون منه فجنت اخاف منه رغم يحبني ومدللني بس بحدود كلش وجان حيل صارم ويه الكل حتى اني

حياتي جانت عاديه كلش الى درجة يعني حالها حال ايه حياة بنيه عاديه جنت اداوم  ابتدائيه وافكر لو وصلت السادس ونجحت

شلون اقنع ابويه اكمل دراسه لان خواتي كلهن بطلن الكبار بس وصلن سادس جان اكبر همومي وهمي الوحيد انو اقنع ابويه اكمل دراسه