عقارب تقتل بصمت ((لن أتخلى أبداً ))

البارت السابع

السلام عليكم

عقارب تقتل بصمت ((لن أتخلى أبداً ))

بقلمي (سقين الشمري)

لا يسمح اويحلل نشر القصه بدون ذكر اسمي

....................

وابويه يكولي بصيغه امر انو لازم أوافق يعني تخيلو

بعدني ممستوعبه الي حجى وما اتقبلته ولا مجرد فكرت بي ابويه راساً كال انو وافقي

ضليت اباوع على امي وهالمرة امي هم من شكلها مبينه راضيه كتله بابا شنواوافق غير افتهم استوعب السالفه يله اني اقرر

عاط بيه وكلي مو هو بكيفج توافقين وغصباً ما عليج من خلال حجية وعياطه وأسلوبه عرفت عمامي حاشين براسه لمن كال الله بس

غمزتلي امي انو اسكت رد اخوي الجبير كلة يابه على كيفك مو بالعياط هيه بعدها توها عرفت بالسالفة خلي تستوعبها عاد

تره الزواج مو بالإجبار خليها تفكر تره هذا ارتباط ولنهايه العمر خومو غصب هو

رد ابويه عاط وكله مو انته تعلمني هيه بتي واني اعرف مصلحتها لشوكت تريد تضل بله زواج

هاي مو بنات عمها ازغر منها وازوجن وخلفن الا هيه ضلت بحجة الكليه شنو تريد تعنس وتضل على كلبي

انصدمت من كلام أبوي بس ولو من دام خوانه حاجين براسه كلشي أتوقع حتى لو يكتلني خلاص

رد كال باعي اكولج ابن عمج أولى بيج من الغريب ويصير حزام ضهرج وبعدين هو مثقف وواعي وفاهم وهم تزوجون وياخذج ويا ودرسين ببغداد احسن من هنا ..

انصدمت يعني هو عود مخطط لكلشي ومفكر استاذنت منهم وانداريت اريد اطلع وحتى بهاي عاط عليه ويكلي جن ما عجبج الحجي

شتريدين اجيبلج عيني لعد ابن رئيس الوزراء مثلا يله ترضين منا لباجر ترجعيلي جواب وشنو كان جوابج اني ارد خبر موافقين

عاط اخويه الجبير حاتم وكلة كافي يابه مو افتهمت شبيك اليوم انته ليش تعيط عليها يعني استأذنت تريد تروح لغرفتها

شتريدها لعد توكف وتكلك اَي لو لا لو تناقشك يعني هيه حتى ما استوعبت الفكرة بعدها انطيها مجال مو هيج الحجي تالي سكت ابويه

طلعت اركض للغرفه وابجي هيه هاي العيازه كملت السبحة خاف جانت عايزه ولو شوي عليه هسه التمت وكملت

طبت اختي وضلت تواسيني وتكولي ميخالف ولج والله ما بي شي ويخبل ووضيفه واذا اخذتي كلها تحسدج عليه كتلها

نور : اخذي انتي لعد اذا عاجبج

شيماء : يحضي هو غير ما اجة عليه شفايتلي والله يا ريت

نور: اَي عادي هسه اكول لابويه يردله جواب يكولة نور متريدك بس شيماء تريدك تعال اخطبها