عقارب تقتل بصمت ((لن أتخلى أبداً ))

البارت الثاني والعشرون

السلام عليكم

عقارب تقتل بصمت ((لن أتخلى أبداً))

بقلمي (سقين الشمري)

لا يسمح او يحلل نشر القصة بدون ذكر اسمي

...............
تركتة لعلي وطلعت من الغرفة وأخذت زهراء وياي نزلت جوة يم عمتي طبيت هية جانت نايمة بس مو غافية

من فتحت الباب وطبيت كعدت لحيلها وباوعت علية محجيت شي لان روحي طافرة اصلا نفسيتي مدمرة من يوم موتت ميار لحد هسه

عاد فرشت فراش الي ولزهراء بالكاع ونمت بس بالي يم ميار اكول خاف بردت خاف جاعت من يوم الي ماتت لليوم ما انام واني ساكتة

كل مرة أضل افكر بيها وابجي لحد ما اغفى واني ما حاسة على روحي من البجي مرن كم يوم هيج

وعمتي ضلت تحجي وياي وتقنع بية انو هذا امر الله ولا اعتراض على حكمة قنعت روحي كوة انو هذا قدر

وبتي هية بالأصل جانت مريضة يمكن يومها جان هذا وخلصت خبزتها وهية جانت متعذبة هسة ارتاحت حاولت قدر الإمكان اقنع نفسي بهاي السوالف

لكن عمر الجرح ما يطيب مرت الايام مستحيل ما اكدر أنساها هية جانت روحي وراحت

بعدها بدة عندي خوف خوف بداخلي كلش قوي الليل كمت ما انامة خوف كلش قوي خصوصا من علي يروح للدوام

فقررت أقيم الليل بديت أتقرب لربي اكثر بحيث صرت مدمنة صلاة وقراءة قران كمت بالشهر اختم القران ٣ مرات او ٤

استمريت أقيم  الليل ولا مرة فاتني قيام الليل عشقت هذا الشي كلش حبيتة احس نفسي قريبة على ربي كلش

وأكثر من باقي العباد ووحدي بس ويسمع شكواي بديت احس بالقوة بديت أتعلم شلون أواجه الدنيا

لان عرفت ماكو راحة بيها ابد علي ابد ما تبدل ولا تاب من طبعة كلت موتت بتك كسرتة هسة يتوب يجوز يغير وضعة

لكن هو زاد حلفت يمين هاي اخر فرصة لعلي راح اجر خلك طويل ويا كلش واشوف الحجة مالتة شنو

بعدها انعل ابو اليحجي لابو الشماتة لابو الاول لابو التالي لان بزعت كرهت روحي طكت مرارتي

ضليت دوم من اصلي من اقرة قران ادعي الله يهدي راح اصبر يا علي راح اصبر الك لكن هذا اخر صبر لان الصبر هم الة حدود

يوم من الايام جنت بغرفتي فوك دانضف بيها وهو جوة صاح نور نور كتلة ها كلي شبيج طرشيتي مو داصيح

كتلة بس دقايق دانزل المرجوحة مال زهراء لان فوك شو هذا صعد ودفر الباب وعاط مو داصيح طرشيتي ها كولي

صفنت بوجهه لان والله كمت اخاف منة اجى دفرني على الجرباية برجلة بدون سبب وجرني من شعري