LOVE IN NORWAY [ Completed ]

1.0 [ unicode ]

Tromsø ရဲ့မနက်ခင်းတွေက လှပလန်းဆန်းမှုတွေအပြည့်

" ရိပေါ် အဝတ်အစားတွေသိပ်မသယ်နဲ့နော်.. ဟိုမှာက ကောရဲ့အဝတ်တွေရှိတယ် ယူဝတ်လို့ရတယ် "

မတွေ့ရတာကြာတဲ့ မားမားက မျက်နှာလေးလာပြပါဦးဆိုပြီး မကြာသေးခင်က ဖုန်းဆက်လာလေရဲ့...ရိပေါ့်အကြောင်းသိနှင့်နေပြီးသား ပါးနဲ့မားက ကျွန်တော့်ထက် ရိပေါ့်ကိုပိုပြီးတွေ့ချင်နေကြတယ်ဆိုတာ ရဲရဲကြီးကျိန်ပြောရဲတယ်။ ဒါကြောင့် ရတဲ့အားလပ်ရက် အနည်းငယ်ကိုအသုံးချပြီး နှစ်သစ်ကူးအခါလေးကို မွေးရပ်မြေမှာကုန်ဆုံးကြဖို့ ကျွန်တော်တို့စီစဉ်ထားတယ်

" ရိပေါ်... မိဘတွေဆီမပြန်ဘူးဆိုတာကျိန်းသေပြီလား? "

ခေါင်းတစ်ချက်ငြိမ့်ပြတဲ့ ရိပေါ်က မအီမသာမျက်နှာလေးနဲ့အထုတ်တွေပြင်နေတာကို မြင်နေရတယ်။ ဒီကလေးကလေ ဘယ်တော့မှ ပွင့်ပွင့်လင်းလင်းမရှိဘူး

သွားဖို့အတွက်က အဆင်သင့်ဖြစ်နေပြီ
လေဆိပ်ဆင်းရမှာ ညနေဆိုတော့ လုပ်စရာရှိတဲ့ကိစ္စတွေကိုအပြီးသတ်လုပ်သွားရဦးမယ်။ ရေခဲသေတ္တာအတွင်းက ဒိတ်လွန်သွားတော့မယ့်အစားအစာတွေကိုပစ်၊ မီးဖိုချောင်ကိုသန့်ရှင်းရေးလုပ်၊ အခန်းထဲက လျှော်စရာအဝတ်အနည်းငယ်ကို လျှော်၊ အင်းး မီးလင်းဖိုထဲက ပြာတွေကိုလည်းပစ်ရဦးမှာပဲ။
ဒါမှပြန်လာတဲ့အခါ သိပ်မပင်ပန်းတော့မှာ...

" ရိပေါ် ကော်ဖီသောက်ဦးမလား "

" မသောက်တော့ဘူး! ကော "

" ရိပေါ် ကျင်းကော်နဲ့ဆော့မနေနဲ့တော့
ရေနွေးစပ်ပေးထားတယ် ရေသွားချိုး သွား "

အချိန်က နေ့လည် ဆယ့်နှစ်နာရီကျော်နေပြီ
မနက်ပိုင်းတစ်ပိုင်းလုံးအလုပ်တွေရှုပ်ထားတာကြောင့် ကော်ဖီတစ်ခွက်ကိုင်ပြီး ပြတင်းပေါက်နားမှာ အနားယူလိုက်ဦးမယ်
ဆိုဖာပေါ်မှာတော့ ကျင်းကော်ကခွေခွေလေးအိပ်နေတယ်
ရိပေါ်ကတော့ ရေချိုးပြီး အဝတ်အစားလဲနေတုန်းထင်ပါရဲ့

" ကော~ "

ကလေးတွေချွဲတဲ့အခါပြောသလို အသံရှည်လေးဆွဲပြီး ကျွန်တော့်နောက်ကျောကနေ ခါးကိုလာဖက်လေတယ်.. မဖောင်းမပိန်ပါးလေးတစ်ဖက်ကို ပုခုံးထက်လာအပ်ထားတော့ အသက်ရှုတဲ့လေနွေးနွေးက လည်ပင်းသားကို လာရိုက်ခတ်နေရဲ့