LOVE IN NORWAY [ Completed ]

0.9 [ unicode ]

နှင်းတဖွဲဖွဲနဲ့ မနက်ခင်းတွေက စိတ်ကိုအေးချမ်းစေတယ်
ဘေးအိမ်က အန်တီနက်တလီကတော့ မနက်အစောကြီး cinnamon buns ( သစ်ဂျပိုးခေါက်ပါဝင်သောမုန့်) တွေ လာပေးသွားလေရဲ့။ မြင်ရုံနဲ့တင် စားချင်စဖွယ်ကောင်းနေတဲ့ အိမ်လုပ် cinnamon buns တွေက ရိပေါ့်အကြိုက်။ ရိပေါ့်ကိုပိုင်ဆိုင်ထားတဲ့ ကျွန်တော်က ကံကောင်းလွန်းတယ်လို့ အန်တီနက်တလီက ကြုံတဲ့အချိန်တိုင်း အမြဲပြောလေ့ရှိတယ်.. တွေ့တာနဲ့ ပါးလေးကိုခပ်ဖွဖွနမ်းတတ်ပြီး sweetieလို့ချစ်စနိုးခေါ်တတ်တဲ့ အန်တီနက်တလီက ရိပေါ့်ကို သိပ်ချစ်တယ်

သိုသိုသိပ်သိပ်နဲ့ တစ်နေ့တာဖြစ်ပျက်ခဲ့သမျှကို မှတ်တမ်းတင်တဲ့ ဒိုင်ယာရီစာအုပ်လေးတွေက လူတော်တော်များများရဲ့ အံဆွဲထောင့်တစ်နေရာမှာရှိတတ်ကြတယ်။ မထင်ရပေမယ့် ရိပေါ့်ဆီမှာလည်း အဲ့လိုစာအုပ်လေးတစ်အုပ်ရှိတယ်... အံဆွဲထောင့်မဟုတ်တဲ့ ခုတင်ဘေး စားပွဲခုံလေးပေါ်က ပန်းအိုးအောက်ခြေမှာ ရိပေါ်ကစာအုပ်လေးကိုထားတတ်တယ်။

ရိပေါ်တစ်ယောက် ကျင်းကော်နဲ့ဆော့နေချိန်၊ အိပ်မောကျနေတဲ့အချိန်မျိုးတွေဆို ကျွန်တော်က ထိုစာအုပ်လေးကိုပြေးပြေးဖတ်တယ်။ ကျွန်တော်တို့စတွေ့တဲ့နေ့ကစပြီး ယနေ့အချိန်ထိ ဖြစ်ပျက်သမျှအကုန်ကို တစ်ခုမကျန်ချရေးထားတဲ့ ရိပေါ့်ဒိုင်ယာရီစာအုပ်လေးက အခါခါဖတ်ရလည်း မရိုးသွားနိုင်။ စာအုပ်ထဲက လက်ရေးလေးတွေကမလှပေမယ့်လည်း ထိုစာအုပ်လေးကို ကျွန်တော်သဘောကျတယ်

" ကော "

" ဟင်...
ရိပေါ် သွားတော့မလို့လား? "

အခုတလော ရိပေါ်ကအလုပ်တစ်ခုရနေတယ်။ ကတာကို စိတ်ဝင်စားတဲ့ရိပေါ်က အန်တီနက်တလီရဲ့အဆက်အသွယ်နဲ့ အကကျောင်းတစ်ခုမှာ... အချိန်ပိုင်းအကဆရာအဖြစ်ဝင်လုပ်တယ်။ အန်တီနက်တလီ့ကလေးတွေတက်နေကျဖြစ်တဲ့ Dance Lab ဆိုတဲ့အကကျောင်းလေးက မြို့အတွင်းက လူစည်တဲ့နေရာလေးမှာတည်ရှိတယ်။ အကကိုဝါသနာပါတဲ့ ဆယ်ကျော်သက်ကလေးငယ်တွေအတွက် အဆင်ပြေတဲ့ ကျောင်းလေးက အိမ်နဲ့လည်းသိပ်မဝေးတာကြောင့် ရိပေါ်ကစက်ဘီးလေးစီးပြီးသွားတတ်တယ်