LOVE IN NORWAY [ Completed ]

0.3 [ unicode ]

ရိပေါ်နဲ့ခင်လာတာ ရက်သတ္တပတ်သုံးပတ်။

ရိပေါ်ကစကားနည်းတယ်၊ အေးတိအေးစက်နိုင်တယ်၊ အပြုံးအရယ်လည်းသိပ်မရှိဘူး၊ ဒါပေမဲ့ ချစ်ဖို့ကောင်းတဲ့အချိန်တစ်ချိန်တော့ရှိတယ်... သူဝါသနာပါတဲ့အရာတွေအကြောင်းစကားစမိရင်တော့ ပြောမဆုံးဘူး... နှုတ်ခမ်းလေးတထော်ထော်နဲ့ပေါ့

ရိပေါ်က စကိတ်စီးရတာကိုကြိုက်တယ်။ Tromsøရဲ့လမ်းမတွေက နှင်းထူထူထဲထဲနဲ့ စကိတ်စီးလို့အဆင်မပြေပေမယ့်လည်း... အပြင်ထွက်တဲ့တစ်ခါတစ်လေဆို ရိပေါ်ကစကိတ်ဘုတ်လေးယူလာပြီး ပိုက်ထားတတ်တယ်။

အလုပ်တစ်ဖက်နဲ့ကျွန်တော်က အားလပ်တဲ့အချိန်ဆိုတာသိပ်မရှိဘူး။ တစ်ခါတစ်ရံအလုပ်ကပြန်လာချိန် ရိပေါ်နဲ့ဆုံပြီဆိုလည်း သူ့အကြောင်း ကိုယ့်အကြောင်းပြောရင်း အချိန်ကုန်ကြတယ်။ ကျွန်တော်ကစတဲ့စကားဝိုင်းမှာ ကျွန်တော့်အကြောင်းတွေကို စီကာပတ်ကုံးပြောပြဖြစ်ပေမယ့် ရိပေါ်ကတော့ မတူဘူး။ မိဘအသိုင်းအဝိုင်းကလွဲလို့ သူဝါသနာပါရာအကြောင်းတွေပဲ ပြောတတ်လေ့ရှိတဲ့ ရိပေါ်က အထီးကျန်မှုတွေအပြည့်နဲ့...

. . . . .

Tromsøရဲ့မြို့လယ်ခေါင်မှာတည်ရှိတဲ့ Kaffebønna

ဆိုင်ရဲ့အတွင်းပိုင်းက ရိုးရှင်းပြီး မှိုင်းမှိုင်းညို့ညို့အပြင်အဆင်တွေကတအားဆွဲဆောင်မှုရှိတယ်။ ကောင်းမွန်ပြီး အဆင့်အတန်းမြင့်တဲ့အစားအသောက်တွေကြောင့် မြို့ခံတွေသတ်မှတ်ပေးတဲ့ အကောင်းဆုံးကော်ဖီဆိုင်ဂုဏ်ပုဒ်ကိုလည်းရထားသေးတယ်။

မနက်ခုနစ်နာရီကနေ ညခုနစ်နာရီအထိသာဖွင့်တဲ့ဆိုင်လေးက လူပြတ်တယ်ဆိုတာမရှိဘူး။ ဆိပ်ကမ်းနံဘေးတည်ထားတဲ့အတွက် ဝင်ချည်ထွက်ချည်ဖြစ်နေတဲ့သင်္ဘောတွေ၊ ရေပြင်ခပ်ကျယ်ကျယ်၊ Tromsøရဲ့နှင်းတွေဖုံးထားတဲ့တောင်တန်းတွေကိုပါမြင်ရတာကြောင့် စိတ်ကိုလန်းဆန်းစေတယ်။