LOVE IN NORWAY [ Completed ]

0.6 [ unicode ]

Tromsø ရဲ့မနက်ခင်းတွေကလှတယ်။
အိမ်ရှေ့ပြတင်းတံခါးလိုက်ကာကိုဆွဲဖွင့်တော့ အလင်းရောင်မှိန်မှိန်က အိမ်ထဲကိုအတင်းတိုးဝင်လာတယ်။ အလင်းကျရောက်တဲ့အိမ်တွင်းနေရာတဝိုက်ကို ဝေ့ကြည့်မိတော့ ခရစ္စမတ်အပင်လေးတစ်ပင်က မားမားမတ်မတ်...

နှစ်ယောက်အတူ စိတ်တိုင်းကျပြင်ဆင်ထားတဲ့... ခရစ္စမတ်သစ်ပင်တစ်ဖြစ်လဲ ထင်ရှူးပင်လေးအောက်ခြေမှာတော့...  အနီနဲ့အစိမ်းရောင် လက်ဆောင်ဗူးလေးနှစ်ဗူးက ကပ်လျက်သားရှိလျက်။ အစိမ်းရောင်သိပ်ကြိုက်တဲ့ကောင်လေး!

အပင်ခုတ်လို့အဆင်မပြေတာကြောင့်.... ဖန်တီးထားတဲ့သေးသေးပုပုအပင်လေးအသင့်ဝယ်ပြီး... အိမ်အတွင်း ပြတင်းပေါက်နားမှာ ရိပေါ်က သူ့စိတ်ကြိုက်ပြင်ဆင်ထားတယ်။ အစိမ်းနဲ့အနီသာအသုံးပြုပြီး အလှဆင်ထားတဲ့ အပင်လေးကတော့ ခရစ္စမတ်ရဲ့အငွေ့အသက်အပြည့်။ မှတ်မိသေးတယ်  အဲ့နေ့က ရိပေါ်ကအရမ်းပျော်နေခဲ့တာ.....

ကဲ အတွေးတွေကိုလတ်စသတ်ပြီး ကလေးငယ်ဆီသွားရမယ်

" ရိပေါ် ကော ဝင်လာခဲ့မယ်နော် "

အခန်းတံခါးကိုနှစ်ချက်ခေါက်ပြီး ဖွင့်ကြည့်တော့... မြင်လိုက်ရတာက ကုတင်ပေါ်မှာ စောင်ထူထူကိုတစ်ကိုယ်လုံးသိုင်းခြုံထားကာ မျက်နှာလေးပဲဖော်ပြီး အိပ်မောကျနေတဲ့ကောင်ငယ်လေး...
ကုတင်နံဘေးကပ်ထိုင်ရင်း  လှုပ်နှိုးတော့... မထချင်သေးတဲ့ရိပေါ်က စောင်ကိုအတင်းဆွဲယူပြီး မျက်နှာကိုအုပ်နေလေရဲ့... အဆိုးအပေလေး!

လုပ်စရာအထွေအထူးမှမရှိတာ အိပ်ပါစေတော့! အရမ်းအိပ်ချင်နေတဲ့ပုံစံလေးကြောင့်လည်းမနှိုးရက်တော့။ အအေးဓာတ်ကြောင့် ရဲတွတ်နေတဲ့ ရိပေါ့်နားရွက်လေးကို လက်မနဲ့လက်ညှိုးသုံးရင်းပွတ်သပ်ပေးကာ... ဆံပင်တွေပွနေတဲ့ဦးခေါင်းထိပ်လေးကိုလည်း အသာငုံ့နမ်းပြီး အခန်းထဲကပြန်ထွက်လာခဲ့လိုက်တယ်။ အင်းး ကလေးတွေကအိပ်ရေးဝမှစိတ်ကြည်တာ!

. . . . .

ရိပေါ့်အခန်းနဲ့ကျွန်တော့်အခန်းက မျက်နှာချင်းဆိုင်။

အများဆုံးအခန်းနှစ်ခန်းသာပါတဲ့ အိမ်လေးက ကျွန်တော်တို့နှစ်ယောက်အတွက်တော့ အဆင်ပြေခဲ့တယ်။ နှစ်ယောက်တစ်ခန်းနေမယ်စိတ်ကူးပေမယ့် ရိပေါ်အနေရခက်မှာစိုးတာကြောင့် အကောင်အထည်မဖော်ဖြစ်ခဲ့။ မလိုအပ်သေးဘူးမဟုတ်လား။