رواية ألم
الحلقة 8
إتعجبت صفا من إصرار وداد مع إنها ما شافتها ولا مره ولا عندها سابق معرفة بيها بس مصرة تساعدها ومتحمسه بكل قوتها ، فقطع تفكيرها كلام وداد
_البت دي ما بتتعالج الا تطلع من البيت داك ، هو فيه كل ذكرى سيئه ليها
ولو فضلت فيه ما حتتقدم في العلاج ، فالتالي لازم نطلعها منو
نرجس: تبعد كيف طيب ؟
وداد : هي محتاجة لدكتور نفسي ،دا شيء مفروق من أمرو وأنا موجودة
صفا : يعني إنتِ دكتورة نفسيه ؟
وداد : أيوا وبجيها لبيتي هنا.
عماد : بس يا أمي كيف ؟وخالها إحتمال إنو يوافق ضعيف ،ويكاد معدوم كمان .
عمر : وما تنسي برضو إنو أنحنا جينا يا داب الحي دا ، وهو ما بيخاطر ببت أختو ويسلمها لناس ما يعرفهم
نرجس : كلام خالتو صح ، عشان تتعالج لازم تبعد ، اذا أنا كنت عايزة أضرب إنصاف وما قدرت إستحملها كم دقيقه!! سماح حتستحمل كيف؟
هو ما بعرفكم لكن بيعرفني أنا و صفا بس دايرين نقنعو ، ونوضح ليه إنو دايرين مساعدتو بالموافقه
صفا : ما مشكله أنا بقنعو وبخليه يوافق إن شاء الله
وداد : ولو ما وافق قولو لي ،وأنا بنفسي بزورو وبشرح ليه الموضوع
عمر بغضب : يعني برضو ما عايزين تقولو ليه البيحصل من وراه وبعمله مرتو دي
وداد : يا عمر ، أنحنا ما ح نخاطر أبدا ، ممكن تهددو بيها ، لمن نضمن إنها معانا وتحت حمايتنا بعدين حيعرف إن شاء الله ، هسي أنا عايزه أشوف سماح .
مشت غرفتها دايره تغير عشان تزور سماح و تعرف حالتها وتتأكد منها
أما صفا مشت علي نرجس إترددت في سؤالها عن الشئ الفي بالها لكن في النهايه فضولها غلبها وخلاها تسأل نرجس
_ نرجس ممكن إتطفل واسألك سؤال؟
_أكيد ، إتفضلي ومن متين كان في بينا استاذان ؟ أها قولي
_ لشنو خالتك مصرة قدر دا تساعد سماح؟ دي كأنو بتعرف سماح وتقرب ليها كمان .
_خالتو وداد مره طيبة جدا جدا ،يعني بتخت نفسها مكان الزول
بالاضافه لكدا والسبب الرئيسي كان بسبب بتها المرحومه أم أبوش ، ماتت بسبب راجلها .
صفا بصدمه : بسبب راجلها ؟كيف؟
_ أنا أقول ليك ، إتزوجها وسافرو سوا برا البلد ، كنا مفتكرين إنو بيعاملها كويس ، بس إتضح عكس كدا تماما ...
كل يوم يعذبها ويضربها وحابسا حتى مكالمات ما بخليها تتصل علينا.
_ ولو إتصلت عليكم ما كان بتقول شئ؟
أنت تقرأ
روايه ألم
Любовные романы🎖️#2في مساعدة الحياه ألام ومصاعب لكن الآلم تهون بمن يقفون خلفك ويسندوك،، للمزيد من الروايات زور صفحتي للروايات علي الفيس بوك لتواكب كل جديد #روايات_هبه_الله_حسن
