روايه ألم

الحلقه ١

رواية ألم
   
 
الحلقة ١

الحياه ممزوجة بالفرح والحزن الضحك والبكاء ومنها الألم  ،الرواية بتحكي عن أنواع  الألم وكيف نقدر نتخطاه ...

          متابعه ممتعه.

*******************

    دخلت الغرفة ومعاها صينيه أكل واتجهت  لسريرها تقول

_مساء الخير،  من قبيل ما شفتك،
عطشانه !  ولا جعانه ، دايرة حاجه؟
ردي لي  ، آه   معليش نسيتك!!

أنا في الصالون ما بعيده، لو إحتجتي أي شيء  ،  أي شيء بس ناديني   تمام ؟!!

  لا لا حبيبه  ؛   ما دايرة دموعك دي تاني

( ومسحت ليها دموعا)

ودا الاكل البتحبيه في الطرابيزة جنبك، بس ما عليكِ الا تمدي يدك وتاكلي ، يلا  أنا لازم أمشي ، المسلسل حيفوتني.

(مرقت وقفلت الباب وراها)

(شعور في قمه الألم ؛   لمن تكون قاعد في غرفه  طول اليوم وما بتمرق الا قليل  ، وتحس نفسك داير تموت  لمن تشوف الأكل البتحبو  قدامك وإنت ما تقدر حتى تمد يدك تاكل منو مع إنك  ميت جوع .

تكون يائس من الحياه وفاقد الامل منها؛ لمن تتعرض للذل والإهانة لمجرد انك داير تعيش حياتك !

أيوا دي سماح البتعيش الألم دا كلو مليون مره في اليوم .

ممكن تحكي لزول وتشكي ليه ألما  بس القدر أكبر منا ،  تحكي كيف وهي عاجزه عن النطق و الحركة كليا، لا يد ولا رجل .

عمر 19سنه صغير علي كل الألم  دا ، تسمع نفسها وشكي لربها، دا البتقدر تعملو .

باب البيت فتح ودخل اسلام خال سماح في ال45 من عمرو ، من  تشوفو لأول مره تقول عليه حقّار   ومتعصب  بس المظاهر خّداعة  ، هو علي عكس شكلو تماما  ، طيب  وما في أحسن من معاملتو  ، طول اليوم يداوم في شركتو الأسسها بعرقو وتعبو  .

الظروف لعبت دورها وخلتو من صغير يعتمد علي نفسو ،  وأسّس شركه لحدي ما وصلت للمكانة الهي فيها الان
....

_السلام عليكم  ،  مساء الخير

ردت بابتسام الكانت في الصالة وتشاهد التلفزيون 

_مساء النور، الليلة الشغل كيف؟

سند ضهرو  ورجع راسو بتعب علي الكنيه  جنب إنصاف مرتو ،أخد نفس وطّلعو

_ماشي حالو الحمد لله

فجاه التفت وعاين لإنصاف

-سماح كيف الليلة؟

شياطين الدنيا كلها بقت تلعب قدامها والغضب سيطر عليها فاتكلمت بإنفعال

_سماح  ،  سماح  ،  إنت دايما كدا  من تخش البيت دا تسأل منها  اكّلتيها؟
شّربتيها ،  أديتيها الدوا  ، سويتي ليها   وفعلتي ليها  ،  وما حصل سألتني انتِ كيف  ويومك حصل فيه شنو  ،  أنا ما مرتك يا اسلام ولا شنو؟