رواية ألم
الحلقة 4
قبل ما نسمع قصه معانة جديدة وهي قصه صفا ، خلينا نرجع شويه لناس عمر
عمر قام بتكاسل بعد أبوش أبا يرحمو وخلاه يتم نومو
خش الحمام استحمى ولبس هدومو ومشا لناس أمو
عمر :صباح الخير
أبوش طلع لعمر لسانو وقال
_ الطيش الطيش
عمر حمر ليه وبصوت شبه مسموع
_أصبر لي بعدين لسا ما إنتهيت منك في العملتو لي قبيل
وداد اتكلمت مع عمر
_أثناء ما كنت بتشخر أ ...
عمر نطط عيونو مقاطعا
_دقيقه دقيقه يا أمي ، منو دا البشخر ؟ أنا ما بشخر مستحيل .
أبوش : ههههههه بيشخر عمر .
_أسمع هنا يا كسلان ، أخوك لمن كنت نايم لمن خلص القتو ليه هسي إنت عليك توصلنا ، جهز البيت خلاص !
عمر باستغراب
_ بيت شنو الجهز دا ؟
_ الحنرحل ليه الليله .
عمر باستغراب أكبر
_ كيف؟ يا تو بيت دا الحنرحل ليه؟ البيت دا هسي مالو؟
وبعدين كيف ما توروني وآخر واحد يعرف هنا ؟ دا كلام شنو
وداد قاطعتو ببرود
_ يا ولد !!! إنت من تفتح خشمك دا ما تعرف تقفلو ولا شنو؟
أبوش بيضحك أما عمر كان مغيوظ فواصلت وداد
_ما دايره نِقه أنا ، وبعدين ما وريت زول الا الليله ،يعني أي حاجه عملتها براي ، هسي عليك توضب هدوم أبوش .
_ أنا لسا شاي ما شربت ولا فتحت عيوني سمح عشان ألم هدوم القرد دا
_قلت شنو ؟
_ لا ولا شئ ، قلت حاضر
_ يلا بلاش تسكع ، أنا ماشه أوضب هدومي ، وبالنسبه للعفش بعد نخلص بيجو رجال يرفعوا باقي الحاجات ،لم الحاجات المهمه .
و مشت لغرفتها ،أما أبوش قعد في الكرسي وخت رجل فوق التانيه وأشر باصبعو السبابه بمعني أمشي
_يلا يلا بلاش تسكع لم هدومي بنظام وسرعه
عمر جرا علي أبوش عشان يمسكو
_الليله بس ما أمسكك يا قرد
أبوش بضحك
_ انت هسي بتنطط زي القرد .
وجاري يكاوي فيه أكتر وداد لمن سمعتم بيجارو كوركت في عمر
_عمر ، شوف شغلك وما دايره حركات الشفع دي، قبل ما أجي أكسر ليك رجولك دي .
أنت تقرأ
روايه ألم
Romance🎖️#2في مساعدة الحياه ألام ومصاعب لكن الآلم تهون بمن يقفون خلفك ويسندوك،، للمزيد من الروايات زور صفحتي للروايات علي الفيس بوك لتواكب كل جديد #روايات_هبه_الله_حسن
