روايه ألم

الحلقه ١٤

رواية-ألم

الحلقة 14

بعد ركبو  عربيه عماد وصلو الكرنيش وقعدو

نرجس كانت متشوقه جدا عشان تعرف منو حبيبتو

_ طيب يا مزعجه قلتي عايزه تعرفي حبيبتي دي منو

_هو أنا   تقريبا عرفت منو حبيبتك

_ هههه منو طيب؟

_ما بوريك .

ضحك وقال

_ لو قصدك رقيه بتكوني غلطانه ، هي صحي معجبه بي بس ما عندي ليها حاجه .

_ طيب منتظر شنو  ، أحكي

عماد أخد نفس وطلعو بقوه واتكلم باستسلام

_ ياخ أنا البت دي حبيتها أكتر من روحي زاتو ولسنوات طويله ، كل يوم بشوف صورتها الكان ابتسامتها بتخليني ابتسم من غير ما أحس وعيونها بتخليني أغوص فيها  قبل ما أنوم كل ليله

_ بس طيب لو حابيها قدر دا لشنو ما تكون معاها.

عماد بانكسار

_ما بقدر ...نرجس بالله ما تقلبي لي المواجع وانسي فكرة تعرفيها ، وسامحيني

نرجس بجديه

_ عماد  !    هي منو  ؟ واسمها منو؟ أنا  جادة علي فكره ولو ....

عماد قاطعها بانكسار واستسلام :

اسمها نرجس ..!!

نرجس كانت مذهوله وبتعاين ليه بصدمه ، أما هو طلع نفس بقوه كأنو كان محبوس جواه لسنوات 

_أيوا إنتِ ، من سنوات وما قادر أبعدك عن تفكيري ، والله ما كنت ناوي أوريك أو  تعرفي لإني خايف أخسرك كبت خالتي وصحبتي

نرجس بصدمه

_عماد ممكن نرجع البيت

رجع نرجس وعماد للبيت وكان السكوت مخيم عليهم  ما نطقو ولا حرف لحدي ما وصلو البيت ...

عمر شاف عماد ونرجس داخلين

عمر  سأل أخوه

_كنتو وين؟ 

عماد ما رد ليه ودخل غرفتو مضايق ونادم علي القالو ... عمر استغرب من رده فعل أخوه ونرجس قعدت في كنبه الصالون متضايقه ودموعها علي حافه عيونها

عمر مشا لنرجس وقعد جنبها

_ طلعت سماح وفسحتها كالعاده
وأديتها أكلها  والممرضه جات وعملت الازم  كل دا كلو وإنتِ برا  ، علي اساس حتجي بدري يعني ، نرجس!  !

_ اه ، معليش ما سمعتك قلت شنو؟

_ ما قلت حاجه ...قلت أمشي إرتاحي وأن بقعد مع سماح

_ طيب يا عمر شكرا ليك ...بسلم عليها وبمشي أنوم ، عشان مصدعه شويه

عمر قال بعد مشت : المشكله للدرجه كبيره لدرجه نرجس تشكرني ببساطه كدا؟