رواية #قلبي_وراء_الحدود
( خيال ممزوج بلواقع )
للكاتبة #ندى_التونسية
الرواية بلهجة الليبية
حلقة 5🔥
💔😭😭🔥
ندى كانت تسمع في حديث احمد وامه لامه كان يحكي بصوت عالي...استغربت ان هوا يحب امه هلبا هكي وكيف تتغير نبرة صوته و لمعة عيونه
ندى قررت تطلع وتحكي معاه تقنعه يسيبها تمشي في حالها...
ندى طلعت لابسة عباية سودة و وشاح اسود وحاطة يديها في بعض من كثرة خوفها منه.قربت من المكتب متاعه وكان يكتب وسارح فالفون تاعه تنهدت بصوت عالي حتى ينتبهلها...وهوا ما فطنلهاش غير لما تكلمت
ندى:سيبني انروح
احمد ما رفعش راسه ولا شافلها اصلا:لا
ندى:شنو لي لا...نحب انروح علاش مخليني هوني منعرش مصيري...اقتلني وارتاح...اصلا اهلي موش بش يظفعو فدية ارتاح...
احمد مزال ساكت ومنزل راسه
تمتمت ندى وقالت : مجرم زايد
احمد سمعها رفع عيونه...كانو كبار بكل و فيهم لمعه مش عادية و حواجبه كثيفة ومرسومة....رفع حاجبه وضرب عالطاولة : كلامي واضح...انتي في حمايتي لين ترجعي لبلادك واضح..انا مش حنؤذيك افهمي...انا مش مجرم انا قاعد نساعد فيك تبي تفهمي افهمي تبي تصكري راسك انتي حرة
ندى:كذاب...وقربت منه وحطت يديها عالطاولة وعيونها في عيونه حتى نفسها اختلطت بانفاسه...مش صحيح منصدقكش...تنجم تروح بيا من نهار الاول من اول نهار لقيتني فيه مفماش علاش تخليني هنا...علااااش وتمت تعيط في وجهه بدون خوف
احمد ناض من الكرسي وقرب منها وهيا كانت تتبع فيه بعيونها لين وقف قدامها...كانو تقريبا نفس الطول عيونهم في بعض...احمد عاجز انه يثبتلها لانه ميبيش يحكيلها الحقيقة وهيا نضراتها كلها كره وتشوف فيه مجرم لا مثر لا اقل
احمد:من طبعي منعاودش كلام قلته مرتين...بس انا عاودتهالك مرتين انك غالطة انا مش مجرم...والثالثة حتتأكدي منها بروحك...في يوم من الايام....وعد وتوا ادخلي ارقدي انا بنرقد بكرا مسافر لامي الصبح بنقعد يوم كامل...زي العادة مننصحكش تحاولي تهربي....ما تغير شي عالمرة لي فاتت...انا مراقبك تمام..تصبحي على خير
ندى ما ردتش عليه وتمت تتمتم ملي ريت منضرك ماريت خير...منين الخير بربي...ودخلت لفراشها وهيا اتفكر كيف بتهرب بكرا....
-------
الصباح بدري طلع احمد لبس البدلة تاعه كان يبي يوصيها على روحها بس خطم من قدام بابها واتحشم يدخل خاف تكون راقدة منغير وشاح..فرجع لتالي.... و طلع بعد ما كتب ورقة لندى فيها" ردي بالك تحاولي تهربي...كل شي موجود فالدرج متاعي...تستحقي اي شي موجود غادي اتغطي كويس...ربي يحفظك...استودعتك الله"
ناضت ندى طلعت تبي تغسل وجهها تلقا ورقة وقرتها ضحكت بسخرية :شنو يحس هاذا...يحسابني يش نصدقو...ليوم لازمني نهرب انا...هاذي فرصتي
وصل احمد لحوشهم
نارين شافت سيارته من الشباك :ماما....احمد جي احمد جي وطلعت تجري حضناته وامه تمشي وراها وصلت للباب ووقفت لانها مرا كبيرة وترجى فيه يوصللها
احمد :صغرووونتي...نونووو القطوسة والله وكبرتي يا فرخه
نارين:اممم كبرت امالا تي قريب العشرين راه
احمد :لاااا هههه خيرك مزلتي قصيرة
نارين:ماما قولي لولدك
الام تضحك:ايوا من توا هههه هوا تبي الرسمي قال الحق امتا بتطولي يا كبدي
نارين:ايوا صار جاية مع ولدك انتي
احمد: سلمها الحرجانة...عسل وخيتي...
الام تشبحلهم وفرحانة :ربي ما يحرمني منكم
فجأة طق الباب
احمد: زعمه من...من لي يجيكم انتم
امه:هههه تلقاها زينب صاحبة نارين اكيد
نارين:اكيد شافت سيارة احمد ههههه ومشت تفتحلها فالباب
زينب: كلبة خيرك طولتي لين فتحتي...وتطل بعيونها تدور على احمد
احمد مش فاهم شي :عالعموم انا بنخش ناخذ دوش يام
امه:باهي وامشي ارتاح وتعال ارجع عندنا مستاحشة حديثك هلبا
احمد باسها من راسها وطلع وفي باب المربوعه تلاقى هوا و نارين وزينب
احمد نزل راسه:سلام عليكم
زينب منزلتش عيونها من عليه ومدت يدها :اهلا احمد..وينك تمام شنو جوك ليك وحشة والله
احمد تلخبط: سلمك وخيتي...حمد لله...نستاذن منكم
نارين مسكت ضحكتها وغمزتله :اذنك معاك...هيا نطلعو لداري
زينب مزالت واقغة مصدومة ليها زمان ما شافتش احمد..طوله و لحيته و حشمته و نضرت عيونه والبدلة العسكرية لي محلياته اكثر واكثر
نارين:اووووة...بست....زينب
زينب:وووووه قلبي...حاسة روحي بندوخ...وتشم في يدها و بعدها ضربت جبينها....قال وخيتي سلمك نانانانا وتعوج في فمها
نارين:ههههههه يعطيك الهني. شن رايك زايد سماحه حمودة
زينب:سماحه...تي طرف مطرطف وووك رجليا معاش رافعيني...واتكت على نارين 😂
نارين: فرخه من يومك حشيشتك الجمال معندكش معاه الروح هههه هيا نطلعو
زينب:خنمشو حذا عمتي المستقبلية ههههه ام رااجلي...
نارين: خوي ميتزوجش المهبولات
زينب:اسملا عليييك وعليه...توا نشوفو...وضحكت و دخلو للكوجينة
-------------
سيف ضرب فرينو :طارق يلا اطلع بسرعه فالسيارة
طارق نط عالكرسي وسكر الباب:شن في
سيف:البنت بروحهاااا..توا كلموني ان احمد في حوشهم يلا فرصتنا
طارق:ايوة اهو الاخبار اللي اتفرح...قام سلاحه وحطه في جيبه
سيف يسوق بسرعه جنونية
ندى فاعدة اتفكر كيف بتفتح الباب وتهرب...حاولت بكل الطرق مقدرتش..لين سمعت فرينو ضرب قدام الباب.يتبع
أنت تقرأ
قلبي وراء الحدود ( روايات ليبية )
Romanceمن اجمل الروايات الليبية للكاتبة :ندي احمد تدور الاحدات حول رجل ليبي متزوج من تونسية يكلف أشخاص لخطف بنت زوجته و يرميها في الصحراء الليبية بعد ان كشفت حقيقته و لكن المفاجاء عندما يراء ضابط ليبي هذه البنت التونسية ماذا سيحدت بينهم و هل يساعدها رغم...
