زواج قاصر

نهاية رملة

الجزء الثاني :
خالة مريم : سحر سحر اجري يا بنتي تشوفي
سحر : واش نشوف واش كاين
خالة مريم : شوفي هذا اعلان حابين خياطة لشركة رملاسد
سحر : خالتي هادي شركة كبيرة واش تنسناي منهم يقبلوني انا خياطة تاع الحومة
خالة مريم : اممم وعلاه لالا ماكاش لي يخيط بإتقانك و تصاميمك روعة ثاني كامل يشكرو فيهم
سحر تضحك : يا خالتي هادي فالحومة ماشي في وسط مدينة في شركة كبيرة و مشهورة بالتصاميم و الخياطة خلينا تعيشي تحبيني مانحبش نحلم
خالة مريم : هاي الهدرة لي ما نحبهاش
سحر تحضنها : خلاص خلاص نحلم ههههه حلمي تحطم واختفى
خالة مريم : نوضي عرق الشجرة امشي
سحر 😂😂😂: انا عرق شجرة شوفي لاطاي الله الله ما تحبوش الزين انتم
خالة مريم بدات تضحك وتتفكر واش عاشت معاها من اول يوم..
ماشية كي العادة تخدم فديور الناس حتى تصيب شي يتحرك تحت حيط مهدوم كان الوقت 6  نتاع صباح البرد و الشارع فارغ بدات تقرب بالعقل حسبتو شي حيوان رفدت عصا و قربت رفدت كارطون حتى تصيب طفلة مكمشة وترجف كلها جروح ودم و قشها مقطع. قربت منها تحاول تنوضها بلا فايدة رفدت تيليفون وعيطت لإبن اختها مالك شي ربع ساعة كان معاها رفد رملة و كان مديها لسبيطار
خالة مريم : لالا ندوها لداري السبيطار رح تدخل لابوليس و حساب وضعها راهي هاربة من شي واحد .
مالك ما قتنعش بكلامها بصح من بعد اقتنع داها لدار الخالة مريم و جابلها كلشي حتى تعالجها ، فاتت سمانة و رملة مريضة حتى بدات تفطن و ترجع ليها الحياة
رملة : وين انا
خالة مريم : ما تخافيش يا بنتي راكي في امان هنا، شكون انتي ومن جيتي
رملة بقات ساكتة و خايفة من مريم
خالة مريم : ما تخافيش وقت تحبي تحكي احكي ارتاحي..
في هذا الوقت كان أسد وصل للقرية يهدد و يتوعد يقتلها بدم بارد
اسد : كلو منكم تربيو لفعة في داركم
علي : يا وليدي حنا مشينا بنيتنا معاها و قلنا صغيرة ما توقعناش هذا كامل منها
أسد بغضب : أسكتو انا درك يقولو عليا مرتو هربت من دارو
وبدا يخبط و يكسر : والله لندبحها والله لنشرب من دمها قدام خلق ربي
خبط الباب وخرج يحوس عليه مع رجالو
علي : عجبك الحال رجعتيه وحش
فاطمة : هذا ما يليق بوليد سي علي ولا كان عاجبك حالو.
راح لنفس المنطقة لي فيها رملة وبدا يحوس ويسقي الناس عليها حتى لحق لعند الخالة مريم
اسد : خالتي شفنتي شي طفلة صغيرة غريبة هنا من ايام
خالة مريم توسوست منو ومن رجال لي معاه وخاصة انهم مسلحين : لالا ما شفت حتى طفلة علاه خير يا وليدي
اسد : لالا خير خير يعيطك الصحة
مشات مريم لدار و عيطت لمالك وراحو دخلو لعند رملة
مالك : شوفي تأكدي بلي جامي نأديوك و راكي في امان هنا و تحت رعايتنا بصح لازم تخبرينا شكون انتي وواش هي حكاينك
خالة مريم : يابنتي رانا على مصلحة احكيلنا وحنا نلقاو حل
بدات تبكي و خافت شدتها مريم من يدها بحنان : ما تخافيش راكي أمانتي ليوم مماتي احكيلنا برك
بدات رملة تحكيلهم حكايتهم وهو مصدومين خلصت هدرتها وهوما بقاو ساكتين ما قالو والو من الصدمة حكاية نتاع فيلم قدامهم
مالك : عاوديلي شحال كان عمرك كي تزوجتي
رملة : 12