زواج قاصر

انتقام اثم ٢

راحو يجريو حتى المعمل لقاو كلشي مكسر لداخل شي ما خلاوه يصلح، ام سمية تبكي وتنوح على اعلى صوتها و سحر من الصدمة تتفرج برك ضاع اخر امل ليها  ما حملوهاش رجليها طاحت الارض
بقات طول اليوم قدام المعمل تتفرج معاه : واش ندير درك ياربي علاه علاه
وقفت ومشات ماهيش تسمع ف الاصوات كامل غير مخها يخمم واش تعمل درك واش تعمل . حتى لحقت لدارها، مسحت دموعها تبسمت ودخلت
سحر : خالتي مريم وين راكي اني جيت
خالة مريم : راني فالكوزينة ارواحي
سحر راحت عندها : واش تديري ماشي قلتك ارتاحي
خالة مريم : هذا وين نضت اقعدي تشربي معايا قهوة
سحر : وقتها والله
قعدت معاها تتضحك ووتتبسم و هي لداخل تتقطع كملت و ناضت لبيتها تخمم فالحل حتى سمعت تيليفونها يصوني
سحر : الو شكون معايا
سكرتيرة أسد : معاك شركة رملاسد
سحر بإستغراب : خير كاين مشكلة ف الطلبية
سكرتيرة : لالا نخبرك انو عندك موعد مع السيد أسد بعد ساعة جنب االطريق الغابة 
سحر : وشنو واش اسد انتي ثاني درك
تن تن تن... قطعت الاتصال
سحر : ياربي فوت هذا اليوم على خير
بقات تخمم تروح ولالا . ومن بعد ناضت خرجت لعندو و الغريب مكان الموعد الطريق الغابة ركبت طاكسي هبطنا فالمكان لي قالت عليه السكرتيرة  بقات تسنى ساعة ساعتين ثلاث قرب الليل و مكان حتى شي تعيط لرقم لي اتصلت بيه السكرتيرة مايرد حتى واحد 
حتى اتصل نفس الرقم : اسمحيلنا السيد اسد عندو اجتماع يكمل يجي الموعد
ما لحقتش حتى تحكي و قطع الاتصال
سحر : انا واش راني ندير هنا واش جابني لهنا
بدات تمشي وتستنى في شي طاكسي تفوت حتى تروح ماكان والو راح الحال و مكاش خلاص طوموبيلات تفوت بقات تمشي تمشي حتى لحقت لدار بعد ساعتين مشي.
خالة مريم : وين كنتي
سحر : رحت لدار عيطتلي مولاتها نظفها
خالة مريم : يا بنتي خبريني برك وين تروحي راني نبقى متحيرة عليك
سحر : ما تتقلقيش عليا راني لاباس، اقعدي نروح نوجد عشا الله الله
خالة مريم : ما يشقاش يا بنتي كاين من الفطور سخني برك وارواحي
سحر : اوك استناي
راحت لبيتها رجليها يوجعو من المشي : اه ياربي واش داني
أسد : راحت ولا مازال
رجل من رجاله : ايه رتحت سي أسد
أسد بضحكة شر :  اوك
سحر رقدت من التعب بالخف حتى ناضت على صوت سمية برا تعيط
سمية : سحر سحر نوضي
سحر : بسم الله الرحمان الرحيم علاه تندبي صباح ربي
سمية : ماشي وقت رقاد نوضي
سحر : واش كاين
سمية: عيطلي سي احمد يحتاجنا في خدمة
سحر : سي احمد نتاع رملاسد؟؟
سمية : ايه هو
سحر : واش من خدمة نسيتي بلي المعمل راح وين نخيطو
سمية : ما تفكرينيش امي في حالة
سحر : عارفة صعيبة
سمية : لازم نخدمو و نشوفو سي احمد واش يحتاج بالاك ندخلو دراهم
سحر تفكرت دراهم : اه دراهم لازم اصبري نوجد روحي .
مشاو لعند سي احمد حتى يفهمو الموضوع
دخلهم للمكتب وبقاو يستناو قريب ساعتين حتى جا مسيو أسد دخل وقعد يخزر معاها وهي تخزر فيه يستنى فيها تهبط عينيها لكن والو تربات مع مريم  جامي تهبط عينها قدام واحد
أسد : عجبتنا خدمتكم و الدليل انا جيت بنفسي نحكي معاكم، عندي ليكم خدمة الا قدرتو تخدموها رح نعطيكم عمل دائم هنا فالشركة بأجر عالي
سمية بفرحة : واش هي الخدمة سي..
مسؤول العمال : السيد أسد
سحر غير سمعت الاسم كهرباء تغلغلت في جسمها بقات ساكتة
أسد : رح تعملو فستان لوحدة من أهم الزبونات عندي و من مشاهير الموضة
سمية خرجو عينيها بلعت ريقها : شكون هي؟؟
أسد : التفاصيل كامل عند أحمد هو يقدمهالكم
ستناها تنطق لو نص كلمة والو، مشى ورجع قال : كلشي على الشركة و حتى الخياطة تخيطوها فالمعمل عندنا. وخرج
شدت سحر الملف تلقاها لأيقونة الموضة نادين ما استغربتش لانها تعرف انو الشركة هادي تتعامل فقط مع الناس العالية و المشاهير.
سمية : مستحيل نقبلو اكيد. رح نتبهدلو هنا
سحر : ماعندناش حل لازم دراهم ماناش في وقت الاختيار
وقفت و قالت لسي احمد : رح نقبلو العرض
سمية : هبلتي
سحر : امشي برا تتفاهمو مليح
خرجو من الشركة وهو واقف قدام الطاقة يراقب فيها تخرج يشوف معاهم يحكيو باين يتعاركو يا درا واش القرار .
حتى سمع تيليفون : الو
أحمد : مسيو اسد قبلو العرض
اسد : شكون منهم لي قبلت
أحمد : الانسة سحر
أسد: امممم بدا اللعب يحلا
سمية : يا بنتي انتي في مخك شي ما قريتيش، اسمها
سحر : لا قريتو مليح وماعندناش حل لازم نحاولو
سمية:  انتي راسك حجر سمعتيه واش قال، قال التصميم حتى يقبلو مسيو أسد ومن بعد نخيطوه ومن بعد يشوفو نادين الا يعجبها ولالا
سحر : كلشي عليهم واحنا واش دخلنا نديرو لي علينا وخلاص.
شدتها من يدها و مشات بيها .
بدات تخمم فالتصميم المناسب باتت طول الليل ترسم وتعاود و صباح داتهم لي سي احمد حتى يصلهم لأسد.
سي احمد : انتي طلعيهم لمكتب المدير هادي اوامرو
سحر : اوك
طلعت للمكتب سكرتيرة وبقات تستنى كل شوي تقولها اصبري عندو ضيف عندو اجتماع و هو لداخل قاعد فارغ شغل
بقات تستنى ست ساعات حتى عيطتلها تدخل
سحر : جيبت التصميمات
أسد:  ارميهم فوق الطابلة
سحر : نرميهم؟؟
أسد : قلتي حاجة
رملة : لالا، حطتهم وبقات واقفة
أسد ما شافش معاهم خلاص :مرفوضين عاوديهم
سحر ببرودة دم : اوك
أسد : تقدري تروحي
خرجت من عندو الدم لحقلها لراس بصح لازم تصبر بقات اربع  ايام على نفس الحالة تجي تبقى تستنى طول اليوم واخر شي يقولها عاودي
حتى اليوم الخامس دخلت بغير مايشوف التصاميم قالها وجدي التصميم الاول  .
سحر : اوووف واخيرا
بدات تخيط فيه كان فستان مفتوح كامل الظهر طويل عليها بعض اللرسمات الملفتة ووالطرز القديم. عملت هي و سمية طول يوم حتى كملوه
عيطتلها السكرتيرة : انسة سحر السيد أسد طلب تجيبي الفستان للحفلة المقامة فالشركة الليلة .
سحر : حاضر
سمية : واش قالت
سحر : قالت جيبو الفستان للحفلة
سمية : حفلة؟؟؟
سحر : ايه هذا كلامها وما يهمناش يوافق عليه برك حتى لو قال جيبيه للمريخ
راحو للحفلة دخلت تحوس عليه تقدملو الفستان وتخرج.
سمية : شوفي راه لهيك
سحر :اوك امشي لعندو
سحر : مسيو أسد
أسد : اه انسة سحر هنا
سحر : جبنالك الفستان تفضل
أسد بدا يضرب بين يديه حتى لتفت ليه الجميع : اسمعوني دقيقة ، نقدملك المصممة المبدعة و والخياطة الرائعة سحر صفقولها
بدا الكل يصفق و سحر و سمية خافوا واش كاين
أسد : تعرفو بلي مصمتنا راهي تصمم في فستان لا نادين 😂😂😂😂 بدا الكل يضحك
أسد : اممم الا انتي واثقة من نفسك خلي الكل يشوف الفستان .
سحر: اكيد مكانش مشكل
أسد:  تحبو تشوفوه قطعة قماش ولا ملبوس على مصممتنا اه جاوبوني
بدا الكل يقول ملبوس، أسد : اه سمعتي واش قالو سمية : انا نلبسو عادي هاتي سحر
أسد : لالا هي تلبسو
سمية شدت سحر : انا رح نلبسو المهم تشوفو للتصميم
سحر هبطت راسها وبقات ساكتة و سمية تترجا في أسد هي لي تلبسو
حتى صاح بصوت عالي : تلبسيه ولا برااااا
سحر : رح نلبسو
سمية : لالا سحر لالا
أسد : أمممم رانا نستناو دلوها على الحمام
سمية شدت يد سحر وتبكي  : مستحيل تلبسيه ايا نخرجو ما نحتاجوش دراهم
واحد مافهم هاد الهستيريا كامل على فستان؟؟؟؟
سحر ماشية و سمية تشد فيها :لالا سحر لالا
سحر : ما تخافيش
سحر كان تخمامها فالدراهم ما يهمهاش واش رح يصير بعد لحظات المهم تدي دراهم وتحل مشاكل مريم ووتعالجها تمشي ببرود جثة تتحرك تسمع غير صوت سمية وهي تقول لالا لالا
دخلت بدلت لبست الفستان و تشوف مع نفسها بدات تتفكر كلشي بدا جسمها يوجع فيها صوت خالد و فاطمة يصدى في راسها ما قدرتش تعيط ما تقدرش تبكي تفكرت مريم وكلامها بقات تردد فيها انا رملة ما يكسرني حتى واحد انا رملة ما يكسرني حتى واحد....