زواج قاصر

تكرار الماضي

احد الرجال ضربها على راسها تغاشات .
طاح تيليفونها تكسر بقا أسد يهدر والو حتى لقاها سكرت رجع يعيط لقا تيليفونها مغلوق، بدا الخوف يسكن فيه يتنفس بصعوبة . فك قفالات القمجة حتى يتنفس مليح و عيط لمالك
اسد : مالك وين راك
مالك : راني سافرت عندي شغل غير الخير واش كاين
أسد : سحر
مالك : واشبيها انطق واش زدت عملت معاها
أسد : كانت تحكي معايا و بدات تعيط اطلقي و تسكر تيليفونها
مالك : نلقاك عملت شي نمحيك استنا عليا برك
سكر عليه وعيط لسمية و خالة مريم يسقسي عليها مكان والو، طلب من سمية تسقسي عليها عند اي واحد يعرفوه و ترد عليه
أسد ما قدرش يبقى في مكتبو خرج يحوس عليها حتى ماهوش عارف وينها ولا واش صار ، بقى يدور فالزنق كي المهبول . حتى عيطلو مالك
مالك : وينك الحقني عند لابوليس
وسكر عليه . أسد مشا ديراكت لابوليس لقا مالك تما النار شاعلة من عينيه
مالك : اسمعني مليح نلقاك داخل فالحكاية اقسم بالله نشرب من دمك
أسد : مالك اصبر نفهمك
مالك : ماتفهمني والو ادخل احكيلهم واش صار
دخل اسد حكا لضابط كلشي و طلب تتبع رقم سحر حتى يعرفو اخر مكان كانت فيه.
سحر  بدات تفتح عينيها تشوف بلاصة معمرة قش شغل مخزن راسها يوجع ماهي فاهمة والو فمها مسكر.
خالد : وينها
رجل خالد : حطينيها فالمخزن كيما طلبت سي خالد
خالد بإبتسامة مكر  : مليح هكدا واحد مارح يشك
خولة كانت قرب منهم  سمعت كلمة مخزن : واش عندو فالمخزن؟؟
ساعتين وهوما يستناو في تقرير الشرطة حتى عيط عليهم الضابط خبرهم بآخر مكان كانت فيه الشبكة
مالك : هادي طريق فارغة قليل وين تشوف ناس مجمعين تما
أسد : نروحو لثما ونشوفو
ركبو ومشاو لقاو الطريق فارغة  و مكان حتى واحد
مالك بدا يخبط برجلو فالطوموبيل : اااااااه
اسد رغم النار لي شاغله داخلو كان ساكت و يخمم برك  شكون يقدر يخطفها مثلا
أسد : عندها شي واحد ماهيش متفاهمة معاه
مالك خزرو فالشط :مكاش بخلافك
أسد : مستحيل يخطفها واحد مايعرفهاش
مالك بدا يتفكر حكاية لي حبو يقتلوه : دقيقة دقيقة انت شكون خبرك بلي كاين واحد رح يقتلني
أسد : خرجو عينيه على وسعهم تفكر خالد : لالالا
خلا مالك واقف يعيط موراه ركب طوموبيلتو ومشى
أسد : وينك
خالد : فالدار
أسد  : ابقى ثما راني جاي
خالد: واش كاين.... تن تن تن سكر في وجهي واشبيه هذا ثاني
لحق لدار بدا يعط اول ما نزل : خااااالد خاااالد
خرجو كامل يشوفو واش كاين
فاطمة : خير واش صار
أسد : وينو نحكي معاكم وييينووووو
خالد : راني هنا واش كاين
شدو من حوايجو : انت ولا مش انت
خالد خرج عينيه من الصدمة : واش لي انا
فاطمة : بعد على خوك راه اكبر منك واش كاين
أسد عروق رقبتو برزو : ادخلو ادخلووو
دخلو كامل من كثر عياطو لداخل بقات خولة مور الباب تسمع
أسد : وين ديت الطفلة
خالد بلع ريقو : واش من طفلة
أسد شدو كثر: ما نعاودش الف مرة وينهااا
خالد يبعد في يدو عليه : انت مريض واش من طفلة
أسد : اوك اوك رح نلقاه لو في سابع أرض و نحس ولا نعرف بلي عندك علاقة شوف وين تخبي راسك، الا لقيت راس بقا أصلا
خالد يرجف و مازال يكدب: انا ماعملت حتى شي واش من طفلة
أسد  يضرب فيه على صدرو : رح نلقاه رح نلقاه
ركب طوموبيل وخرج يحوس عليها
خولة بقات مور الباب مصدومة من واش سمعت : أكيد خالد عمل شي ، شكون الطفلة هادي .
مالك : سمية كانش خبر
سمية : ماهيش باينة خلاص ارضة تفتحت و بلعتها
مالك : اطلعي عند خالتي خبريها بلي سحر معايا نحتاجها غير نكملو نجيو وما تحسسيها بحتى شي.
سمية : اوك اني طالعة
سكر على سمية حتى يلقا رقم بريفي يعيطلو
مالك : الو
خالد مبدل صوتو : سي مالك
مالك : ايه شكون معايا
خالد : بففف نكره الأسئلة قالولى عندك امانة مختفية صح
مالك وساعو عينيه : وينها سحر
خالد : اه وسمها سحر اسم شباب زعما تكون شابة  كيما الاسم
مالك متحكم في اعصابو:  واش تحتاج مني
خالد : اممم يعجبوني الناس لي تسمع برك بديت تعجبني تحب الطفلة ترجع نفد واش نطلب منك
مالك : اوك اطلب برك
خالد : نحتاج جثة مسيو أسد صاحب شركة رملاسد
مالك رجليه ما حملوهش من الصدمة : واش
خالد : اوك نعاود أسد طخ طخ طخ
مالك : انت مريض كون راجل وارواح واجهني برك
خالد : معاك يوم كامل خمم جثة أسد ولا جثة سحر
تن.. تن...  تن
مالك : ااااه ياربي واش نعمل انا
رجل خالد متعجب: سي خالد يقتل خوك؟؟؟
خالد يحرك راسو يمين و يسار : قولي انا لشكون حبيت ننتقم
رجل خالد : لسي أسد
خالد : اممم صح و شكون لي جا بهدلني
رجل خالد هبط راسو : سي أسد
خالد : برافو ثاني صح . هو من بكري يدي واش يحب و عمل واش حب انا دايما ننفد برك حتى قرار صغير يخص زواجي ما حققهوليش زوجوني خولة و انا نحب أختها جبروني على كلشي و سي أسد لالا واحد مايهدر معاه حتى رملة قال ما نقبلش بيها سكتو رح وعاش حياتو وخلاها انا لي نظل نخدم و نتعب وهو هنا رجل على خوه فالبيرو و جاي يعيط عليا انا. خلاص وقتو هو راه طول كثر من اللازم .
سمعو صوت :واش هذا روح شوف
راح الرجل مالقا والو ارجع لخالد : مكان والو سي خالد بالاك قطة
خالد : انا نروح لعشية نشوفو سحر هادي لي مخلية زوج رجال يحوسو عليها كيما المهابل هههههه
خولة كانت تسمع فيهم بدموعها تنزل تتفكر في حياتها لي ظلت تتحمل في كلشي في خاطر خالد و زواجها زواج عشر سنين ملي كانت بنت 16 عام ودخلت لدار علي وهي تتعدب واخر شي يطلع راجلها يحب أختها طاحت الارض تبكي حاطة يدها على فمها واش تعمل المصائب كامل في طريقها حتى تفكرت اسم الطفلة سحر زعما تكون رملة و رح يقتل أسد زادت في دموعها حتى النفس تقطعت
خالد : اووووب عندنا قطة هنا
خولة بقات تلم في رجليها ترجف
خالد :مرتي حبيبتي منين يكون راجلها لازم تكون
شدها من شعرها تعجبني حاجة فيك أي سر ليا لازم تكوني علابالك بيه و لي يعجبني كثر لازمك تخبيه
شدها من شعرها كثر يضغط على سنيه : هنا تموت كلشي والا ما عجبكش الحال موتي معاه اوك عمري.
جبد يدو منها وخرج وهي بقات جامدة في بلاصتها : مستحيل نسمحلك هاد المرة حتى لو كان الثمن حياتي مستحيل .
مالك مازال حاير واش يعمل مستحيل يقتل أسد أي نملة ما يقتلهاش و سحر واش يعمل معاها بقا يخبط في راسو بيديه حتى عيطلو أسد
أسد : كانشي خبر
مالك : ماكان والو
أسد: اوك اي شي خبرني
مالك : اسد...
اسد : نعم مالك.. مالك
مالك : عس روحك مليح و تهلا
أسد بقا مستغرب من كلامو واش يقصد : واش تقصد
مالك : تهلا وخلاص
أسد: الا كاين شي خبرني
مالك : الا خيروك بيني وبين سحر شكون تختار، انا لاحظت نظراتك ليها قولي الصراحة شكون تخير
أسد بدون تردد : نخيركم في زوج والا خيروك بينا خيرها هي بدون تردد خيرها هي
مالك : اوك سامحني 
مالك سكر تيليفون  :تحبها لدرجة تضحي بنفسك
تنفس مليح و مشا
أسد : نحبكم تراقبو خالد و افهمولي واش عمل هو ورجالو بالاسبوع هذا كامل .
رجل اسد : حاضر مسيو أسد
سكر ورجع عيط لواحد اخر
أسد : الو راقبلي تيليفون خالد نحب نعرف أكثر مكان يروح ليه هاد الايام
خولة في بيتها تخمم واش تعمل اليوم قريب يخلاص و المخزن ما تقدرش تدخل ليه الرجال بزاف ثما و أسد كيفاه تنقضو. دخلت عليها فاطمة
فاطمة : خير ما بانش حسك اليوم
خولة : سامحيني أمي فاطمة كنت تعبانة برك
فاطمة : امممم تعرفي مالك؟
خولة : شكون مالك
فاطمة : شفتك صحبة مع أسد قلت حكالك عليه جا زارو فالسبيطار مع طفلة وسمها.... اصبري نتفكر اه  سحر
خولة بخلعة : سحر و شفتوها
فاطمة : واشبيك لونك نخطف، ما شفناهاش شفنا مالك هذا بانو صحبة بزاف ، راني نخمم نعرضهم لعندنا هكدا نديرو علاقات مع ناس المدينة.
خولة في عالم اخر : ايه
ناضت فاطمة مشات وخلات خولة : يعني سحر هي رملة و هي تعرف أسد يعني لي مع خالد هي رملة😱ياربي الطف .
بقات تدور وسط بيتها تخمم في حل حتى جا مالك في بالها : قالت صاحبو يعني هو لي راه يحوس عليها
هبطت تجري حوست على رقمو في دفتر أسد. عيطت وهي ترجف
مالك : نعم
خولة : انا انا انا مرت خو أسد
مالك  مستغرب : مافهمتش
خولة : انا عارفة وين رملة
بقا جامد : وين تعرفي رملة انتي
خولة : سحر سحر قصدي سحر
مالك بغضب : اهدري