زواج قاصر

بداية سحر

بقاو تحت الصدمة مدة لكن صدقو كل كلامهم خاصة من الجروح لي على ظهرها من كثرة الضرب ورح تبقى على جسدها جامي تتنحى
مالك :من اليوم انساي رملة و حكاية رملة انتي من اليوم سحر اسمك سحر، قريبتنا ورح تعيشي مع خالتي مريم .
تعودت رملة على الحياة الجديدة الاسم الجديدة و عايلتها الجديدة  حاولت تنسى اي شي عندو علاقة برملة مهما كان حتى عايلتها، بقات تلعب بجرنان قدامها و مالك يتفرج معاها
مالك : سحر انتي تعرفي تقراي
حركت راسها ب لا لا
مالك : امممم تحبي تقراي
سحر : ايه ايه نحب
مالك : تقرا الاميرة نتاعنا مكاش مشكل خلاص 😂😂
ناضت ليه حضناتو : ايه نحب  نقرا ونكتب
حس احساس غريب وهي محضناتو : ايا خلاص اقعدي نشوف منين نبداو
سحر : اوك
مالك : تحبي تقراي هنا انا نقريك ولا نسجلك في شي جمعية
سكتت ومن بعد قالت : لالا انت قريني
مالك بفرح : يا سيدي مكاش مشكل خلاص اقراي برك.
دخلت الخالة مريم تعبانة و مريضة من كثرة الخدمة في ديور، بقات سحر تشوف معاها و غاضها وضعها و قررت تخدم معاها و تعاونها في كلشي فالاول كامل رفضو لكن مع عنادها قبلو ورجعت كل يوم تروح مع مريم ينضفو ديور الناس و بالليل تقرا مع مالك، في وقت كان أسد خلاص فقد الأمل يلقاها و يطفي نارو بقتلها.
حتى يوم وهي راجعة من الخدمة وحدها شافها رجل من رجال أسد و عيط لكل رجال وحتى أسد، هربت هي وتخبات داخل دار مهجورة و هوما بقاو يحوسو عليها فجأة سمعت صوت مش غريب بزاف عليها
تقريبا تعرف هذا الصوت:  هو ايه هو أسد؟؟؟  لازم نلحق لدار خالتي مريم قبل ما يشدوني واش ضاع من حياتي بزاف عليهم كامل 😠
أسد حس إحساس غريب قلبو يخبط شي قريب ليه بقا يديه لنفس بلاصتها بقا بينو وبينها حيط برك قلبو زاد في دقاتو وهي تخمم برك كيفاه تهرب قبل ما يلقاوها، حتى يسمع صوت : ماتت ماتت
راح يجري صابو طفلة ضربتها طوموبيل و ضرب وجها على حجر وتشوه، مالقاو معاها حتى وثائق
أسد بقى واقف من الصدمة: رملة ماتت
حتى استوعب الوضع وارجع لعقلو وبدا يعيط على رجالو : شكون منكم شافها قبيل
احد الرجال: انا شفتها وهي نفس هاد البنت لي ماتت
أسد بغصة في قلبو حتى سببلو وجع : اوك تهنينا منها هيا رح نرجعو  للقرية نبشروهم مبقاش كاين  عار
رملة كانت واقفة جنبهم وسمعت كلشي يعني كذبة ماتت رملة تحققت وصح رح تموت في نظرهم كامل، سمعت كامل كلامو حفظو مخها و مشات كملت طريق ماقدرت تبكي على حظها و لا تفرح لحريتها .
أسد بقا بالغصة هاديك راح للقرية وخبرهم بلي ماتت الوحيدة لي ما صدقتش الخبر هي سلطان لانها كانت تعرف بنتها وين مالك وصل ليها و طمنها عليها و لما اسد جا وقال ماتت بقا تستنى فالخبر من مالك برك، خولة دخلت في حالة بكا تتفكر كلشي عاناتو رملة الطفلة الصغيرة بقات تضرب في أسد على صدرو وتقول:  انت السبب انت لي قتلتها بسبتك انت توجعت هي بسبة انت ضاعت طفولتها كامل مكافاكش زدت قتلتها انت ما تعرف والو انت رح تندم طول حياتك على طفلة وسمها رملة.
أسد بقا غير يسمع فيها مصدوم هو واش ذنبو هي لي هربت وهي على مرتو ولازم تموت، جا خالد شد خولة دخلها خاف تهدر شي و تحكيلو. دخل لدار يشوف فيها بيت بيت حتى لحق لبيتو صاب قشها ثما ريحتها على سريرو ومخدتو علاه يحس بالذنب
أسد : اووووو مانيش انا لي قتلتها افطن لروحك افطن
بقا على هاديك الحالة يامات حتى قرر يسافر للمدينة ومايرجعش للقرية أبدا
فاتو اربع سنين على سحر ولا رملة لجديدة تخدم فالبيوت وتخيط لناس و تقرا بقات تقرا وو تقرا حتى قررت تجوز البيام و ربحتو و الان مع الباك الشي لي جامي خممت فيه راهي تعمل فيه رجعت سحر ماهيش رملة
سحر : خالتي مريم وين وصلت
خالة مريم: تفكرت حاجات برك
سحر : انا نروح نخدم و من بعد نشري سلعة للخياطة ونجي
خالة مريم : يا بنتي دراهم الخياطة راهم يكفيونا علاه ليك خدمة فديور الناس
سحر : تعرفي بلي الخياطة يوم كاينة  ويوم لالا لازم تكون عندي خدمة ثابتة و زيد نحتاج دراهم للكتابات باه نوجد الباك
خالة مريم : واش لاحك للباك مانعرف اقراي شي عام خلاف وجوزي الباك
سحر : لالا مانيش حابة يضيع وقتي 
تفتحت الباب ودخل مالك رافد ساشيات بزاف شافو معاها؛: واش هذا
مالك : كتابات ليك واش خلعكم مثلا
سحر : انت ماشي عندك جلسة فالمحكمة
مالك : يا ربي بواش بليتني انا نقولها جبتلك كتابات وهي تقولي عندك جلسة
سحر عوجت فمها وقعدت 😏
مالك : عوجيه مليح مصفارة عود الشجرة
سحر : اه راكي تسمعي واش راه يقولي
خالة مريم : اووو هبلتوني كل ما تتلاقاو هكدا اخرجوا عليا في زوج
سحر : عجبك الحال درك
مالك : انا ولا انتي
خالة مريم : اخرجوا
مالك و سحر : خرجنا 😂😂
خرجو لبرا : نوصلك
سحر : لالا طريقك غير طريقي
مالك : وين رايحة
سحر : نشري سلعة قبل نخليها فالحانوت و نرجع ليها بعد الخدمة
مالك : اه اوك روحي مالا تخلصي عيطيلي يا اميرتي يا عرق الشجرة 😂😂😂
سحر : مصفار عنين القط
مالك : ههههه روحي برك
سحر : باي