زواج قاصر

الذنب

لحق أسد بعدو عليها و ضربو ضربة على وجهو حتى طاح الارض رجع رفدو من قشو
اسد : واش قلتلك انا على مالك و واش قلتلك صباح على سحر
خالد : درك انا الغالط نحوس على حقك
اسد رجع ضربو : انا جيتك شكيتك قلتلك جيبلي حقي يا كلب
خالد يشوف مع خولة والنار تشعل : والله لنشرب من دمك
هبط علي و فاطمة يجريو يشوفو واش كاين
علي :واش كاين هنا
اسد : واحد مايتدخل
خالد : يضرب في خوه بسبة طفلة بنت شارع
أسد ضربو ضربة أخرى : ماتزيدش تجبد سيرتها على لسانك الموسخ
خالد : ابقاو ساكتين كلو بسبة هاد البهيمة نتاع خولة
شدتها فاطمة من شعرها
خولة : اييي ايييي
فاطمة : واش درتي واش عملتي لوليدي
أسد : بعدي يدك عليها واحد ما يمسهاش
خالد يمسح فدم على فمو و يضحك : تخافش عليها تتحمل الضرب راهي هي و الحمار نفس الشي تحسبها كيما مرتك رملة زوج ضربات هربت
الكل سكت و خالد بقا يضحك و أسد خلاص حبس الدم فعروقو
أسد : عاود واش قلت
خالد : نعاود الاولى و لا الثانية
أسد يعيط : عاااااود
خالد : مرتك ما تتحملش ضرب ضربها مرة  بحزامي شهر ما ناضتش ضربتها بسلسلة خفيفة هربت 😂😂😂😂
أسد طاح الارض  و فاطمة تسكت في خالد : اسكت يا بهيم وليدي أسد راه يخلط برك مكانش منها هاد الحكاية خلاص
أسد وقف لخولة  ودمعتو تنزل : رملة .. هربت من الضرب
فاطمة : اني نقلك لالا انطقي يا طفلة خبريه
خولة : ايه هربت لانو حاول يغتصبها و كان يضربها بالسلسلة و أمي كانت تضربها
فاطمة : اسكتي اسكتي
أسد انهار تماما : واش عملتو فيها
خولة بشجاعة : اول ماجات حطوها في بنت الخدم لا ماكلة لا شراب والبرد كامل عليها ورجعت خدامة من الفجر لليل و اي غلطة تنضرب عليها و مرات بزاف خالد حاول  يتحرش بيها حتى ضربها للموت و بقات شهر طايحة فراش لم بدات تفهم قررت تصبر و تستناك حتى يوم حاول خالد يغتصبها و ضربها
خالد : حتى هي ضربتني شوف الجرح ضربتني بجائزة نتاعك غشاتني بنت الحرام
أسد : يعني انتم لي قتلتو رملة
خولة : لالا انت ، هي صبرت وانت بعيد طفلة ما تفهم والو ستناتك حملت الذل الضرب الجهل الحبس على جالك وانت عايش احسن عيشة وغير رجعت قررت تقتلها ما حاولتش تسمع ماحاولتش تفهم
أسد دموعو تزل على خدو كلام خولة يضرب داخلو كيما سكين وهي ماهيش راضية تسكت والوجع يزيد
خولة : انا صبرت على كلشي  مع حيوان كيما خالد درك خلاص عارفة نهايتي رح تقتلوني وما يهمنيش المهم حميتها زمان و حميتها اليوم و راني مرتاحة
الكل دهش وتصدم شكون حمات اليوم
أسد : سحر هي... رملة
خولة : ايه اليوم خوك رجع عاقبها بنفس الطريقة اليوم رجع قتلها من اول وجديد
فاطمة : بنت الحرام مازالت عايشة
أسد : اسكتيييي واحد ما نزيد نسمع صوتو فيكم اسكتيييي خلاص
حاولت وقرب منو : بعديني قلتلك بعديني
شاف سلسلة في يد خالد رفدها : خولة وين ضربها
خولة : ظهرها
رفد السلسلة بكل قوتو وبدا ضرب حتى وجعوه يديه   وخالد يتوجع ويصيح على الارض
اسد : خولة وين ضربها
خولة : رجليها
بدا يضرب مرة اخرى على رجليه حتى تعب
أسد : خولة وين ضربها
خولة تبكي : يديها
بدا يضرب على يديه حتى تعب خلاص، خالد تغاشى من قوة الضرب ، رمى السلسلة وراح لفاطمة
اسد : انتي احمدي ربي انك أمي مانقدرش نضربك احمدي ربي بزااااف على هاد الشي
وقف خارج ورجع قال : غدوة ما نشوف حتى واحد فيكم في داري فهمتو ، خولة ماراكيش راجعة معاهم انسايها و شي خلاف تتمس شعرة منها ولا من رملة ننسا انكم والديا .
خرج الغش عاميلو عينيه ركب طوموبيل ومشى ماهوش عارفة وين يروح، تفوت قدامو صور رملة الصغيرة لي عاش طفولتو معاها تفوت سحر الطفلة لي هانها و ذلها، شكل ظهرها ترسخ في مخو دموعو تهبط وديان الدم يغلي في كامل جسمو  حتى صاب روحو عند دار مالك هبط بقا وافق قدام الباب يرفد يدو يدقق ويرجع يهبطها قعد الارض حط راسو على الحيط دموعو تنزل ماهيش راضية تحبس .
مالك كان خارج يروح عند سحر على لقاه قدام بابو في حالة يرثى لها
مالك : أسد واش تعمل هنا
أسد بقا يشوف معاه و يبكي نزل عندو مصدوم من هاد الحالة : أسد واش كاين خوفتني
أسد : رجعت راهي عايشة
مالك مستغرب : شكون لي عايشة
أسد بدا يحضن في مالك ويبكي : رملة عايشة
مالك بقا مصدوم من الاسم لي سمع اكيد ماهيش سحر : شكون رملة
أسد : مرتي
مالك نفسو تقطع : مرتك انت متزوج ؟؟
أسد : سحر هي رملة
مالك خلاص طاح الارض : أنت هو زوج رملة
أسد  دموع مازالها تهبط :  انا انا هو الحيوان لي دمرلها حياتها
مالك خلاص الدم غلى في جسمو شدو من حوايجو وبدا يضرب و أسد يقولو زيد ما قاومش خلاص حب النار لي في قبلو تطغى بأي طريق، بقا مالك يضرب وهو بتفكر كلشي عاناتو سحر من يوم جابوها لدار مريم حتى تعب و طاح جنب أسد
مالك : تعرف بلي حبيتها من أول يوم لقاتها خالتي مريم
أسد : وانا حبيتها مانعرف حتى وقتاش
مالك : من ست سنين نخمم لوكان نلقا  واحد من العايلة لي دمرت سحر واش نعمل فيه، وظهر هذا الشخص أنت صاحبي لقديم انت لي كنت نضرب على جالك رجع اليوم نضربك هههه ( خانتو الدمعة وطاحت) و يعجبك حبيت مرت صاحبي( دموعو خلاص وديان ).
أسد : ياريت ضربك ليا يطفي ناري ، ياريت سحر تضربني حق كل الوجع لي عاشتو و تسامحني . تعرف أني راجلها علابالي رح تهرب مرة خلاف مستحيل تغفر ولا تسامح و عندها الحق.
بقاو طول الليل يحكيو كل واحد فرغ قلبو لحق الصباح. خالة مريم تعيط لمالك
مالك : صباح خالتي
خالة مريم : اجري سحر مانعرف واش بيها
مالك : واش كاين واش صرا
خالة مريم : راهي تكسر في كلشي وتعيط
أسد : واش كاين
مالك : سحر  مانعرف وش صار معاها
ناض بالخلعة يجري و خلا مالك موراه واقف يشوف معاه : اممم يعني النهاية يا مالك، خليه يدي فرصتو
وصل اسد لدار مريم دقدق خرجت ليه
خالة مريم :نعم وليدي ( بقات تشوف معاه حتى تفكرتو) اه انت أسد  تفضل يا وليدي
أسد : يزيد فضلك
دخل يحوس بعينيه على سحر ماكنش حتى يسمع صوت بكا لداخل،
أسد : سحر لداخل
خالة مريم : ايه يا وليدي ماراهيش مليحة
أسد : نقدر نفوت عندها
خالة مريم بقات ساكتة رجع قال : تعيشي خالتي مانطولش
خالة مريم : تفضل
راح ليها فتح الباب مالقاهاش صوت بكا كاين وهي وين؟؟؟.
أسد: سحر، سحر
ماحبتش ترد، هبط يشوف تحت سرير مازالت في عوايدها تحس بالحزن تتخبى تحت سرير
أسد : ماشي ظلمة بزاف ثما
بقات تشوف معاه و ساكتة
اسد:  تخرجي ولا ندخل معاك مي مانضمنش واش تقول خالتي مريم واش راهم يعملو
خزرتو و بدا تسحب في روحها حتى خرجت، راح قعد جنبها