سلطان : خمم مليح ماراناش في حرب
محمد : خممت بزاف احسن حل تروح دار شيخها وهوما يتحملو مسؤوليتها
بدات سلطان تضرب فيه لصدرو وتبكي : يتحملو مسؤوليتها راك تحكي من نيتك بنتك هادي . هادي طفلة صغيرة لي لعبت في حضنك لي بكات و مسحتلها دموعها هادي رملة صغيرتك تفرط فيها
محمد قعد و الدمعة في عينيه ومن بعد ناض : كلمتي كلمة راجل وجديلها قشها لعشية نديها لدار علي. خرج وخلاها محروقة على كبدتها و كيفاه فرطو فيها .
راحت توجد فالقش تحضن فيه و تشم في روحتو وتبكي : سامحيني يا ميمتي سامحني يا بنتي ماقدرت نديرلك والو، تحضن فالقش قطعة قطعة تبكي على بنتها و على حظها تبكي على بنت قتلولها كل شي.
جات رملة تجري مين سمعت صوت نواح أمها : امي واشبيك
حضنتها بكل قوتها كأنو حضن وداع حاوطت وجها بكف يديها : اسمعي رملة اسمعيني مليح روحي اهربي من هنا وما ترجعيش خلاص اجري وما تحبسيش روحي وما ترجعيش لهنا
رملة بنت 14 تسمع فكلام اول مرة تدخل لمخها و مش فاهمة حاجة : ماما علاه نهرب ما درت والو والله ماكسرت شي فالكوزينة و حتى قش بابا ما قربتش ليه
أمها زادت تبكي أكثر : ما تفهميش اهربي من القرية هادي كامل روحي من هنا
رملة بدات تبكي : علاه نروح تكرهيني ماما
سلطان : ايه نكرهك روحي برك من هنا
رملة خرجت تبكي وتخبات تحت سرير كيما العادة : ماما تكرهني ماما تكرهني بقات تردد فهاد الكلام حتى رقدت
لحقت لعشية سلطان ما لقاتش حل لبنتها ومحمد دخل يديها بدا يعيط : رملة رملة ارواحي لهنا
جات تجري ليه : نعم بابا
محمد : رح تروحي لعند عمك علي وتعيشي ثما
رملة : علاه والله ما عملت شي غالط انا
محمد : هدرت هدرتي وجدي روحك
وخزر مع سلطان تنوض توجدها . ناضت مكسورة القلب توجد في بنتها لي خارجة عروسة بغير عرس لي خارجة ومش راجعة . حتى حلم صغير تفرح ببنتها الوحيدة مكاش تشوف معاها تحفظ في ملامحها البريئة باستها على جيبنها وقالتلها : مهما يصير في دار سي علي خبريني بيه صغيرة ولا كبيرة و ما تخافيش خلاص اسمعي كلامهم و قريب يرجع أسد و ترتاحي
رملة غير تشوف معاها وتتفكر كلمة نكرهك : ايه ما نخافش انتي معايا و بابا ثاني و زيد نبقى يامات ونرجع لهنا
سلطان تبسمت و الدمعة في عينيها : ايه يامات وترجعي
بدا محمد يعيط و يصيح : ازربي راح الحال
خرجت سلطان و رملة مع بعض رملة مشات و امها بقات تشوف معاها حاسة بغصة في قلبها و شي يقولها لالا ما تبعثيهاش خليها معاك احكي اهدري.... لكن بدون جدوى بقات برك تراقب فيها وهي تغيب عن عينها .لحق محمد لدار سي علي لي كان فرحان بوصول كنتو الصغيرة و من جهة الاملاك خلاص ارتاح بلي راهم ليه، عكس فاطمة لي كانت عينيها تشعل نار 🔥 وهي تشوف معاها لكن حرباء لازم تبدل لونها
فاطمة : ياعمري على كنتي ما حلاها، تحضن وتبوس
علي : اتفضل سي محمد
محمد : لالا بما اني وصلت أمانتكم خلاص نروح مرتاح
علي : وراهي امانة عندنا من اليوم سعرها بسعر ابني
محمد : وهذا لي نستناه منك سي علي
محمد وقف خارج و رملة شدت في يدو بنظرة تعيش ما تخلينيش هنا، هبط لعندها
محمد : اسمعى مهما عملت اتفكري بلي عملتو على جالك وعلى جال مصلحتك جامي تنساي هاد الكلام باسها من جيبنها وخرج، ماقدرش حتى يرجع يشوف معاها
فاطمة : خولة ( كنتهم الكبيرة) اديها لبيت الخدم
كامل شافو معاها : خدم
فاطمة : مكاش بيت فارغة خلوها تبقى تما مدة حتى نلقاو حل ليها
مشات خولة لرملة شافت معاها طفلة جسمها ضعيف شعرها طويل وجها كامل نور و براءة قالت في داخلها : واش راه يستنى فيك
تبسمت معاها و داتها لبيت الخدم رملة من وقت لحقت ساكتة تشوف برك.
أنت تقرأ
زواج قاصر
Ficción Generalهي كرونيك باللهجة الجزائرية تحكي عن حالة من حالات زواج القاصرات البطلة هي رملة لي تتزوج وهي قاصر و تدخل في دوامة كبيرة ، الابطال الاخرين أسد. و مالك و خولة و خالد نتمنى تعجبكم 😍😍😍😍😍