زواج قاصر

حياة جديدة

سحر دخلت على مالك يحكي فالتيليفون : يا مصفار يا عيون القط وين كتابي وينو
أسد تصدم من الصوت سكت تجمد الدم في عروقو نفس الاحساس يوم وفاة رملة قلبو يدق و صدرو يوجع بقا يسمع في صوتها..
مالك : يا عرق الشجرة احشمي راني نحكي تيليفون بعديني
سحر : اعطيني كتاب نروح
أسد مازال يسمع يستنى في إسم رملة نفسو تقطع يتنفس بصعوبة
مالك : يا سحر يا وجه الشر بعديني شوفي عند خالتي
سحر لقات الكتاب مع اوراقو : وهذا واش، وهذا واش بقات تضرب فيه بالكتاب وراحت
أسد سمع اسم سحر مش رملة رجعت ليه الروح
مالك : الو الو الو
أسد: اه مالك حدد موعد و خبرني
مالك : اوك ايا بسلامة
أسد : بسلامة
بقا شاد التليفون مش مصدق واش صار فيه قبل شوية بدا خيال رملة يجيه بتفكر الطفلة الصغير خلاص لي لعب معاها حتى كبرو، ومن بعد قطع شرودو اتصال سكرتيرة
سكرتير : سي أسد عندك اجتماع مع مسؤول العمال
أسد : بفففف مش وقتو خلاص. دخليه
دخل مسؤول العمال السيد أحمد لعند أسد
مسؤول العمال : نعتدر جيتك في وقت هذا لكن الامر ضروري
أسد : مش مشكلة اختصر
مسؤول العمال : غدوة رح تجي سيدة تفاهمنا معاها على مشروع خياطة طقوم للعمال.
أسد : إيه وين المشكل
مسؤول العمال : المشكل فالتصميم لازمنا الموافقة عليه من حضرتك
أسد يحك في لحيتو  فتح يدو : هات الملف الخاص بالتصميم
مسؤول العمال : تفضل
أسد بقا يشوف فالتصاميم حس حاجة فيهم ناقصة لكن مقبولين رمالو الملف : غدوة اعطيني كامل تفاصيل الاجتماع و فهمو الخياطة هادي ضرورة الدقة في كلشي غلطة مانحبهاش
مسؤول العمال : حاضر سي أسد
أشارلو بيدو يقدر يروح هز تيليفونو وخرج من الشركة.
طلع الصباح ناضت سحر وجدت روحها حتى تروح لشركة لبست فستان احمر و مشات لعند سمية و كملو لشركة حبسوهم فالباب
سمية : خير من صباح ربي عندكم منع دخول
الامن : ممنوع اللون الاحمر على الموظفين
لاإرادية بداو يضحكو بصوت عالي والكل يشوف معاهم؛ سحر : سمعتي واش قال
سمية : سمعت سمعت 😂😂😂
سحر : خويا ماناش موظفين هنا عندنا موعد برك
الامن : اسمحيلي مانقدرش نخليكم تفوتو حتى نسقسي
سمية : بفففف عيط لسي احمد مسؤول العمال نظن هو يعرفني
عيطو لمسؤول الامن و خبرهم يخلوهم يفوتو المهم طلعة جيهة الادارة ماكاش دراكت لمكتب مسؤول العمال، فجأة حبست طونوبيل الله الله راحو يجريو لعندها و سحر وسمية يتفرجو حتى نزل منها راجل بان بظهرو ليهم، سحر بدا قلبها يدق بسرعة حتى سحبتها سمية يدخلو راح الحال، أسد حط يدو على قلبو لي ايضا رجع يدق و التفت يشوف شكون قدامو ما شاف حتى واحد بقى يحوس بعينيه مكان حتى شي مهم ولا ملفت نفس الوجوه نتاع كل صباح دخل ديراكت للمكتب.
سحر و سمية راحو لمكتب سي احمد مسؤول العمال وبداو يتناقشو بالخدمة و واش المطلوب منهم .
احمد : كلشي واجد انتم عليكم التنفيد فقط
سمية : التصميم من عندكم
احمد : اكيد من عندنا
سحر : نقدر نشوف التصميم من فضلك
احمد : اكيد اتفضلي
سحر بقات تشوف مع التصميم الرجالي و النسائي.
اسد تفكر بلي موعد الاجتماع لي حكا عليه المسؤول العمال اليوم و قرر يهبط يشوف واش صار معاه و يتأكد بنفسو من كلشي لانو صارم  و هندام موظفيه يهمو بزاف.
هبط للمكتب لقا الباب مفتوح شاف بنت بالظهر و لابسة احمر و شعر اسود منكوش، الدم طلعلو لراس و عروق رقبتو بانو شد على يدو و داخل حتى سمع صوتها
سحر : هاد التصاميم فيهم شي ناقص خاصة نتاع نسا يشبهو لطقم عمال في مطعم
بقا يسمع فالصوت ويتفكر وين سمعو كامل الغش راح، انتبه ليه احمد كان راح يحكي اشارلو يسكت و يطلب منها تكمل
احمد : واش من نقص لاحظتيه
سحر : انتم شركة تصميم و ازياء و هندام موظف بالطريقة هادي غير مناسب
شدتها سمية من يدها وقالتها بصوت ناقص : واش راكي تعملي اسكتي
سحر  فاقت مع روحها : اسمحلي قلت رايي برك
أسد اشار لأحمد يقولها ترسم تصميم لي حابة الان
احمد : لالا ماشي مشكلة تفضلي ورقة و قلم ارسمي تصميم لي يناسبك
سحر فتحت عينها على وسعهم :  انا انا
أحمد.: ايه تفضلي
سمية: لالا سي احمد رح. نخدمو بتصميمك راحي صغيرة تخلط برك
احمد بقا شادة الورقة بصيغة مكاش خروج حتى ترسمي سينو يقطعو أسد طراف طراف 😂
شدت سحر الورقة وبدات ترسم وهوما يشوفو معاها. أسد بقا مركز مع شعرها يطيح وهي ترجع فيه وترسم مش خايفة.
سحر : تفضل كملت
احمد : بهادي السرعة
سمية:  ايه سريعة تشوف اي شي تصممو و عندها خيال واسع
أسد مازال واقف رجع اشار لأحمد يحطو التصميم و يروحو و هو يرجع عليهم من بعد
احمد : رح ناقش الموضوع مع المدير و نتصل بيكم
سمية : يعيطك الصحة
اسد خلاهم ومشى حتى يسمع احمد يقول : سحر متشرفة بيك و فرحان تعرفت عليك
بقا الاسم يتعاود في مخو وين سمع صوتها واسمها ومشى للمكتب نتاعو .
بعد نصف ساعة طلع لعندو احمد و خلاه يشوف التصميم من اول وهلة قال : واو
بقا مبهور بطريقة الرسم و دقة التفاصيل الصغيرة مودال عصري يناسب شركة بحجم رملاسد. تصميم البنات لشد إنتباهو أكثر فيه جرأة غريبة فستان بدل سروال و جاكيت و الفستان من النوع الكلاسيكي يتوسط الخصر حزام مع فتحة صدرة صغيرة  فكرة جديدة فستان كلباس رسمي في شركة.
اسد : عيطلهم المشروع ليهم
احمد : حاضر سي اسد
سمية : زعما يقبلونا واش داك تهدري روحنا نخيطو ولا نصممو
سحر : عادي وحتى ماعيطش نورمال ملهمش تاع دوق
سمية : من نيتك امي تعلقنا مع قش الغسيل
سحر تضحك : يا بنتي رح يعيط استناي برك
وفجأة رن تيليفون سمية : اوووف شكون يعيط درك
فتحت عينها : هو هو يا سحر والله هو
سحر : شكون؟؟
سمية اشارتلها تسكت : الو مرحبا سي احمد
احمد : حبيت نعلمك بلي وافقنا على تصميمكم و حتى الخياطة غدوة ارجعو لتوقيع العقد
سمية بلعت ريقها من الصدمة : اه يعني المشروع لينا
احمد : ايه ليكم
بدات تعيط وتصيح وتحضن في سحر : هادي البداية ومازال مازال
سحر : بسم الله عليك بلعي راه يسمع
سمية : اه ديزولي غدوة نكونو عندك و كوبات
سحر : شفتي انتي برك تكبري كلشي
بقات تحضن فيها وتبوس : انتي عبقرية بلاصة مش هنا
سحر بالضحك : ايه في زحل 😂امشي لدار امشي