زواج قاصر

انتقام آثم

تليفون لمسؤول العمال : اتصل بالانسة سحر يومين و تكون مسلمة كامل الخدمة
احمد بصدمة : كيفاه يومين سي اسد قليل بزااف
اسد : نفد
احمد : يا سي اسد.... تن تن تن كوبا عليه ، من نيتو هذا كيفاه يومين  خياطة بدلة لمئة موظف ؟!
عيطت لسمية و خبرها بالقرار والا رح يلغو العقد راحت تجري لعند سحر تخبرها دقدقت ودخلت
سحر : بالعقل واشبيك اتنفسي
سمية بصعوبة تتنفس : ما.. ما.. ماء
سحر : بالعقل اقعدي. راحت جابتها تشرب و راحت
سحر : واش كاين
سمية : عيطلي سي احمد قالي يومين تجيبو كلشي واجد
سحر : واش نديو مافهمتش
سمية : يومين تكون كل البدلات مخيطة واجدة
سحر بصدمة : يومين
سمية : ايه والا رح يلغيو العقد
سحر : من نيتك انتي هادو مراض كيفاه نكملو كلشي في يومين
سمية : ماعلاباليش؟؟؟
سحر بدات تخمم اذا تلغى العقد العلاج نتاع مريم رح يتأخر و مالك مستحيل تطلب يعاونها
سمية : واش
سحر : رح نخيطيوهم
سمية فتحت عيناها : تتمسخري
سحر : انا نحتاج دراهم ولازم نخدم مكاش حل خلاف نوضي
سمية : وين؟
سحر : نخيطو كلش راه عندنا و عندنا 48  ساعة
سمية : من نيتك انتي ثاني دوك اخطيك
سحر : مستحيل ننسحب هي حماتني و انا رح نحميها و نرجع ولو نقطة من خيرها
سمية : 200 قطعة راكي فاهمة الرقم
سحر : ايه فاهمة وعندي الحل
سمية : لي هو؟؟؟
سحر : احسن طريقة نفصلو و نقطعو كلشي و من بعد الخياطة و رح نربحو الوقت
سمية : اوك نعيط للبنات و امي يجيو يعاونونا
سحر : اوك
راحو للمعمل و بداو الخدمة بدون توقف نهار وليل قطعو القماش كامل و بداو الخياطة وقت الليل كامل يروحو تبقى سحر تكمل وتراقب كلشي بقات يومين بدون توقف ولا نوم حتى لحق صباح اليوم لي لازم يسلمو الطلبية ، ناضت سمية بعد ما رقدت من التعب : سحر مافيهاش
سحر : نوضي برك كملي اكوي معايا لي بقاو
سمية بالخلعة ناضت : سحر كملتي لي بقاو
سحر : نوضي برك
ناضت و جاو بنات و كملو معاهم و حطو كل بدلة في علبة و راحو لشركة
لما وصلو تفاجئ مسؤول العمال كيفاه قدروا يكملوا كلشي في وقت قياسي رفد تيليفون لسكرتيرة السيد أسد حتى تخبرو بتسليم الطلبية
أسد تفاجئ أكثر و هبط لعندهم دخل مباشرة و قعد مقابل سحر بنظرة كلها رعب، لكن هي شافت كل انواع الرعب مارحش يخلعها هذا
أسد : اممم 200  طقم في يومين خيطتو للالعاب مش عباد
سحر: خيطنا للعباد
أسد تقلق من ترجاع الهدرة : ايواه واش اسمك
سحر : س.. ما خلاهاش تكمل
اسد : ما يهمش، ضرب علب برجلو هيا خلونا نشوفو الابداع
سحر : أكيد
جبدت طقم من العلبة و رفدتو حتى يشوفو بدا يفتش على اصغر غلط مالقا حتى شي : هاتي الطقم الثاني، الثالث، الرابع.... شافهم كامل حتى لاخر قطعة ما لقا حتى عيب
وقف و قال للمسؤول : اعطيهم حقهم و برا
سحر خرجو عينيها من الزعاف : انت. و سكتت المهم دراهم هو ما يهمش اخر مرة نشوفو  .
طلع للمكتب و هو يغلي لداخل كيفاه ما خافتش و لا تقلقت ولو شوي. شكون هادي شكون
سحر و سمية هزو دراهم وخرجوا فرحانين لبرا
كان واقف قدام طاقة قالمكتب حتى شافها خرجت تنط من درجة لدرجة كيما طفلة صغيرة تفكر رملة وهي صغيرة دايما لما تفوت على دروج تنط من درجة لدرجة. بقا غير يراقب فيها حتى شافها بدات تميل و رح تطيح شدتها صحبتها ومشات لثانية كان رح يهبط يجري ليها، واش راه يصير معاه .
سمية:  راكي مليحة
سحر : ايه شوي تعب برك هاكي عيطي لمالك يجي لينا
سمية : اوك
عيطت لمالك جا بالخف ليها غير دخلت لدار رقدت رقدة نتاع  عام من كثر التعب و قلة النوم في وقت كان لأسد يفحص في تصميمها و خياطتها فيها شي مميز و تفكر كلام أمو دوس على اي واحد و حقق احلامك.
اسد : الو نحتاج كامل المعلومات على سحر واليوم 
ما فاتتش ساعة حتى لحقو الملف الكامل عليها و فهم بلي خدامة فالديور و خياطة بسيطة و تحتاج دراهم حتى تعالج خالتها
اسد : اممم سحر رح نبداو نلعبو شوي شوي بواش نبداو مثلا بالصعيب و لا الساهل .
بقا طول الليل يخمم كيفاه يصيد فريستو خاصة وهو يشوف فيها رملة قدامو من شعرها و حركاتها و كلشي فيها يذكرو فيها و رجعت النار نارين.
خالة مريم : بنتي نوضي راح الحال
سحر : شوي برك
خالة مريم : نوضي راهي 12
سحر بالخلعة :  واش من 12
خالة مريم شابعة ضحك  : راهي 8 برك
سحر : علاه يعني كل يوم تعملي فيا هاد الشي
خالة مريم : نوضي برك مالك اليوم يسافر اسبوع
سحر : ما خبرتونيش
خالة مريم : هاني خبرتك نوضي درك
سحر:  اوك اوك
ناضت من نومها وجدت الفطور وبقاو يستناو في مالك يجيهم حتى سمعو الباب يدقدق خرجت سحرة لقات مول الدار لي كاريين عليه
سحر : صباح الخير عمو تفضل
مول الدار : صباح النور يزيد فضلك معليش عندي زوج كلمات ونروح
سحر : ايه تفضل
مول الدار : خالة مريم ماهيش هنا
سحر : لالا هنا خير
مول الدار : عيطيلها دقيقة
دخلت سحر عيطتها وخرجو عندو
خالة مريم : خير
مول الدار : والله راني حاشم منك بزاف لكن الظروف
خالة مريم : لا حاشة علاه تحشم كاين شي
مول الدار : هي الصراحة رح نزيد حق الكراء و الا جاكم غالي تقدرو تخليو الدار  تعرفو المعيشة غلات وكلش غلا الله غالب
خالة مريم بصدمة وبصعوبة واقفة على رجليها  : راني من سنين طويلة عايشة هنا كيفاه بدون ما تخبرنا تزيد الكراء على الاقل خبرنا من قبل
مول الدار : والله يا اختي مريم الظروف صعيبة عليا
سحر : اوك. عمو رح نخبروك بقرارنا لعشية
حاوطت مريم بيديه تساعد فيها تمشي و دخلو لدار
خالة مريم : هذا واشبيك منين نجيبو حق الكراء احنا هذا و بالسيف ندفعو فيه   يزيد يهدد يطردنا
سحر : اهدي يا خالتي ما يكون غير الخير وانا عندي دراهم المشروع لي فات ورح نحل كلشي انتي برك ارتاحي وما تخممي في حتى شي
خالة مريم : يا بنتي بزاف عليك راني حاسة
سحر : واش قلت درك بنتي مالا خلاص راني هنا و اضحكي مالك درك يلحق ما تخليهش يحس بشي
خالة مريم تشوف معاها وتقول داخلها : وانتي شكون يحس بيك.
حتى سمعو الباب تطبطب ناضت سحر : راه لحق مالك.
مالك : صباح الخير يا وجه الخير
سحر : صباح النور وين طولت موتنا بالجوع
مالك : شغل انتي تاكلي ولالا باين عليك راكي عرق شجر وتبقاي للأبد
سحر : بففف تعيي
دخل سلم على خالتو وقعد ياكل : اوووه هادي ماكلة نتاع الصح
سحر : سلامة يديا
مالك يضحك : ههههه شاطرة نعرفك
سحر : وقتاش ترجع
مالك : تخلص القضية نتاع موكلي نرجع شي سمانة
خالة مريم : تروح وترجع بخير
مالك باسلها يدها : الله يخليك يا لعزيزة 😘
مالك خرج بعد ما وصاهم على انفسهم و خرجت معاه سحر للخدمة.
اي حانوت تفوت عليه يعيط عليها صاحبو ويطلب دراهم الكريدي.
أسد : نفدت واش طلبت منك
رجل من رجاله : نعم سي اسد كامل روحنا ليهم و طلبنا منهم واش خبرتنا
أسد : اوك بقا المعمل يتسكر
رجل من رجاله : حاضر
أسد : القطة المفترسة رجعت تحت السيطرة و دوك الضربة الثانية
سمية : واشبيك غايسة
سحر : مافهمتش واش صرا اليوم مول الدار جا يزيد الكرا ولا نخرجو مول الخضرة و اللحم و المواد الغذائية و حتى مول حانوت لي نشري عليه عفايس الخياطة قالولي غدوة تجيبي دراهم الكريدي و كامل نفس الهدرة ظروفهم صعيبة و الوقت صعاب
سمية : واشبيهم هادو . وانتي واش راح تديري
سحر : رح نعطيهم دراهمهم من دراهم المشروع لي عملنا
سمية : هكدا ما يبقالك والو ما خممتيش في غدوة
سحر : مانيش عارفة هذا هو الحل مستحيل نخلي خالتي مريم تخرج من دارها بعد العمر هذا مستحيل
تحكي حتى طاحت دمعتها : رح نزيد نحوس على خدمة اخرى خدمة فالديور ماهيش حل 
سمية : يا بنتي راكي تقتلي في روحك زوج خدمات و القرايا و مرض خالتي و تزيدي خدمة ثالثة، احكي لمالك واتهناي
سحر : جامي هاد الهدرة انسايها ، مزال كاين المعمل و نلقاو لي يجيو يخيطو و نديو طلبيات
صونا تيليفون سمية : الو وي ماما بالعقل واش كاين واش صرا
سحر بالخلعة: واش كاين
سمية : خلاص راني جاية
سحر : واش كاين فهميني
سمية: راهي تقول كسرو المعمل كامل
سحر : وشنو .