زواج قاصر

اعتراف

بقات خولة طول اليوم مع سحر ومالك وتعرفت على مريم . حتى وصلها مالك لدار أسد
خولة: يعطيك الصحة
مالك : بغير مزية
خولة : انا نروح تصبح على خير
مالك يروح ويرجع : خولة
خولة : نعم
مالك: وانتي بخير
هي مشات وهو رجع عيط : خولة
مالك : ممكن نحكي معاك تيليفون
خولة : اه
مالك : قصدي اي شي عيطيلي تيليفون
خولة : ايه ان شاء الله
راحت وخلاتو : بفففف جملة ماعرفتش نكملها
ركب طوموبيلتو و رجع لدارو.
خالة مريم : ما شفتيش مالك كيفاه يخزر مع خولة
سحر : ظنيت روحي غير انا لي شفت😂😂
خالة مريم : خههههه كامل شفنا
سحر : هي بنت مليحة زهرها ماعطاهاش هذا مكان نتمنى تكون مع مالك هو يستاهل وحدة كيما هي وهي تستاهل واحد كيما هو 
خالة مريم : ان شاء الله
سحر : انا نروح نرقد
راحت لبيتها حتى تلقا أسد يعيط
سحر : الو
أسد : ما نكونش برك نزعج فيه و لا نوضتك
سحر : لالا مازال ما رقدتش
أسد : انا ثاني ماجانيش النوم نخمم في حاجة
سحر : حاجة ايواه عيطتلي نخمم معاك مثلا
أسد: لالا لي خممت فيها عيطتلها
سحر بدا قلبها يدق : ما فهمتش
أسد : حتى  انا ما فهمتش نسقسيك تحبي تحكي مع شخص و تشوفو غير هو و تخمم فيه غير هو وتعيش غير ليه هذا واش يكون
سحر : واش يكون
أسد: راني نسقسي فيك
سحر : مانيش عارفة سقسي مالك
أسد : لالا نحب رايك انتي
بقاو يحكيو وماحسوش للوقت حتى رقدو، صباح أسد خلاص قرر يواجهها ويخبرها كلشي في أقرب وقت  و سحر فهمت بلي تحت أسد وهذا الشي غالط  مارحش يقبل بوحدة متزوجة و هاربة لازم تبعد عليه . و عصافير الحب الثانيين كانو في حيرة أكبر خولة خافت من علاقة جديدة و خالد لي مارحش يخليها و اكبر شي عقمها كيفاه يتزوج وحدة ما رح تخليه يرجع أب و مالك خاف يصارحها بإعجابو تخمم بلي حب يستغلها بقاو في دوامة كامل شكون يغامر و يهدر...
خالد وصلوه اوراق الطلاق مع تهديد أسد اذا ما طلقش خولة رح يتحبس طول عمرو و هو  خمم في حل احسن منهم كامل و هو الموت. بقا يطول أسبوع يراقب فيها وهي تطلع وتخرج مع مالك و عايشة حياتها حتى يوم قرر خلاص لازم نهاية.
أسد وجد كلشي حتى يعترف لسحر بحبو و في نفس الوقت حقيقتو عيطلها
اسد: سحر تقبلي تخرجي معايا اليوم
سحر : اممم نقبل
اسد : رح نطلب شي
سحر : تفضل
اسد : البسي نفس الفستان لي صممتيه
سحر تفاجئت من الطلب هذا لكن وافقت رح تحققلو اول واخر طلب. لانها وجدت نفسها تحط نهاية لهاد العلاقة قبل ما تبدا اصلا .
مالك فرحان بتوقيع خالد لأوراق الطلاق و ارتاح الان يقدر يعبر على كلشي لخولة عرضها يتمشاو فالحديقة منين تلاقاو اول مرة.
أسد باقي يستنى فيها تدخل بفارغ الصبر حتى جات بفستان الاحمر و شعرها المنكوش اقل ما يقال عنها ملاك اليوم بقا مش مصدق رملة لي تربى معاها و رملة مرتو و سحر حبيبتو نفس الشخص اليوم رح تقرر مصيرو هي داخلة بإبتسامة و لداخل وجع رح تتخلى للمرة الثانية عن حياتها  .
مالك  بقا يستنى في خولة حتى جات لابسة فستان زهري زاد فيها النص بإبتسامتها البريئة و فرحتها الكبيرة لي ما كملت لانها قررت ايضا تبعد على مالك بسبب العقم و حتى تحميه من خالد . بقا حال فمو عينيه مفتوحين على وسعهم فرحان بيها و فرحان بحبو الجديد لي رح يغيرلو حياتو
أسد : ما شفتش اجمل منك فحياتي
سحر : اه من اولها غزر خلينا نقعد
أسد : انتي مهدمة الرومنسية
مالك : بسم االله ماشاء الله خمسة وخميسة واش هذا كامل يا ناري  عليك يا مالك
خولة حمرو خدودها : عيب الناس تسمع فيك
مالك : خليهم يسمعو
بقاو يضحكو و يحكيو حتى لحق وقت الجد .
أسد : سحر اول شي انا نحبك و نعشق كل شي فيك كل تفصيلة فيك نعيش اليوم و غدوة ولي بعدو برك على حالك
سحر : أسد لازم تعرف شي
اسد : حتى انا لازم نخبرك شي
///////////
مالك : خولة ممكن تستغربي من كلامي و تقولي وقتاش حتى حس بهاد المشاعر وغيرو لكن أنا نحبك ونحب نكمل حياتي معاك
خولة دقات قلبها تتزداد : اسمحلي ما نقدرش
مالك تصدم  من جوابها : عارف تقولي ما تعرفناش مليح و مش من وقت طويل لكن أعطيني فرصة برك
خولة: المشكل فيا ماهوش فيك
مالك : واش المشكل وانا نحلو
خولة : انا ما نجيبش ولاد
///////)
سحر : نخبرك انا وبعدها اعمل لي يساعدك
أسد : اوك رغم اني عارف كلامك مارحش يغير، شي
سحر : انا متزوجة
أسد : وانا زوجك
/////////
مالك يضحك : هذا مكان خلعتيني
خولة مصدومه من ردة فعلوا : ما تفهمش انا مانجيبش ولاد
مالك : اقعدي برك
شدلها يدها : الطب تطور و حتى لو الطب ما نفعش عادي خلاص انا نحب خولة افهميها ونحب نكمل كل دقيقة من حياتي مع خولة دبري راسك
خولة دمعت عينيها : اول مرة واحد يحكي معايا بالطريقة هادي
حضنها ووبقا يمسح على شعرها : ومارحش تكون الاخيرة  نوعدك تكوني أسعد وحدة فالعالم،ايواه راحت سحر تمسح دموعها عليا جيتي انتي
بدات تضحك رجع حضنها اقوى : ريحة شعرك شابة واش من شامبو تستعملي ههههه
///////
سحر : ماركش تفهم انا متزوجة صح
أسد : وانا زوجك أسد ولد سي علي
وقفت من الخلعة و الصدمة : أسد ولد علي
حاولت تخرج من المكان لقات كلشي مغلوق : بعدني ما تقربنيش حاب تقتلني لحقتني حتى لهنا
وهو يشد فيها و يهداأ فيها والو : رملة يا عمري ما نعملك حتى شي اسمعيني برك
سحر  تبكي: مانيش رملة انا سحر ما تقربش مني
حضنها بكل قوتو : اسسس ما تخافيش ما نعملك حتى شي نحكيو برك اقعدي برك نحكيو وانا قابل بكل قراراتك.
بعد محاولات بزاف رجعت للكرسي قعدت
اسد : انا غلطت معاك و بزااف وكلشي صار معاك انا السبة لوكان رجعت وقتها ما يصير والو  معاك عاقبيني كيما تحبي اعملي واش تحبي اضربيني سبيني عايريني الا شي واحد ما تبعديش عليا
ابقاي حتى شهر شهرين عشرة ما تحكيش معايا نورمال نقبل الا تبعدي هادي لالا انا خلاص نموت بلا بيك
رملة : وانا شكون حس بيا انا شكون رأف على حالتي شكون شفق عليا حتى واحد كامل عفسو عليا كامل عايلتك وانت اولهم عفستو عليا. وزدت بكل وقاحة دخلت داري تقولي نكونو صداقة وانت عارف انا شكون اه وقت جبرتني نلبس هذا كنت عارف و حبيت تستمتع كثر ياك بيانسور وليد سي علي
أسد : والله ماكنت عارف شي، وراس عمري ماعرفتش شي انا رجعت قالولي هربت صح تسرعت بصح الباقي مانعرف حتى شي
نزل عند رجليها يبكي : عاقبيني كيما تحبي المهم سامحيني
رملة : خليني نروح
أسد : لالا الا هادي تعيشي كلشي الا هادي
رملة : كنت تقول لي تريحك اعمليها و انا مانيش حابة نبقى معاك في نفس البلاصة نتخنق
كلامها هبط سم عليه ما قدر يعمل حتى شي يستاهل اكثر و اكثر فتحلها الباب وخلاها راحت كل ما تمشي خطوة تطلع روحو اكثر ما قدرش يقول حبسي ما تروحيش ما عندو حتى حق عليها.
ماشية دموعها شلال كل مرة تتحطم أكثر دار الزمان ورجعت حبت راجلها، وكسر القلب واش يداويه خيبة بعدها خيبة قلبها صدق كلام أسد عقلها لالا بقات تمشي حتى سمعت تيليفون مالك يعيط اكثر من عشرين مرة