قال "عادل" بعدما أنهى طعامه :
- تسلم ايدك يا أم "عادل"
ابتسمت قائله :
- انشاله تسلم يا "عدول"
أشار "عادل" الى طبق الفاكهة فى أول السفرة وقال :
- ما تديني صابع موز
قالت أمه بحزم :
- أما تغسل ايدك الأول
ثم استدركت بسرعة ولهفة :
- اسكت يا وله يا "عادل" مش انا جبتلك عروسه
هتف "عادل" قائلاً :
- اسكتى يا ماما مش أنا مش عايز
هتفت والدته فى حده :
- مش عايز ايه .. انت مش عايز أنا عايزه .. نفسى أفرح بيك بأه وأشوفلك عيال بتتنطط حواليا بدل ما خلقتى فى خلقتك على طول كده
رفع "عادل" حاجبيه قائلاً :
- بدل ما خلقتى فى خلقتك .. مكنش العشم يا أم "عادل" .. للدرجة دى مش طايقانى
ثم أشار الى طبق الفاكهة قائلا :
- ما تديني صابع موز
تجاهلته أمه قائله :
- بص بأه .. العروسة اللى جيبهالك المرة دى نقاوه .. نقاوه
أومأ "عادل" برأسه وهو يصب الماء فى أحد الأكواب قائلاً :
- آه نقاوه .. قولتيلى
قالت أمه بحماس :
- وانت تعرفها كويس يا وله يا "عادل"
نظر اليها قائلاً :
- تبقى مين بأه ؟
قالت بحبور وحماس :
- البت "فتكات" بنت ست "روحية" جارتنا
كاد "عادل" أن يختنق بالماء فأخذ يسعل بقوة .. أسرعت أمه بضرب ظهره قائلاً :
- بسم الله الرحمن الرحيم .. اتشاهد يا وله
نظر اليها هاتفاً :
- ايه يا ماما هو أنا بموت
ثم قال :
- قوليتيلى مين ؟ سمعيني تانى كده
قالت وهى تستعيد حماسها :
- بقولك البت "فتكات" بنت الست "روحية"
أشار الى طبق الفاكهة قائلاً :
- طب هاتى موزه
مدت أمه يدهل والتقطت واحدة ثم أعطته اياها أخذ يقشرها ثم تناول قضمة كبيرة وهو يقول :
- قولتلى .. "فتكات" بنت "روحيه " .. اللى كانت بتمشى فى الشارع ناكشه شعرها وعيال المنطقة كلهم يزفوها ويمشوا وراها يغنوا الشعنونه أهى الشعنونه أهى
اختفت الابتسامه من وجه أمه وهى تقول بحماس :
- لا ما هى كبرت دلوقتى وبأت عروسه .. والله يا "عادل" لو شوفتها هتتهبل عليها
هتف "عادل" قائلاً :
- هى ناقصه هبل .. هاتى كمان صابع
أحضرت له ثمرة أخرى فى تبرم وهى تقول :
- ها ايه رأيك ؟
تناول قضمة من الثمرة فى يده وهو يقول :
- بصى يا حجه من الآخر كده وعلى سيراميك .. أنا لما أحب أتجوز هختار اللى أتجوزها دى على مزاجى .. "فتكات" بتاعتك دى بأه تخرطيها وتأكليها للبط .. قال نقاوه قال .. دى كانت كل ما تشترى آيس كريم توقع نصه على هدومها والباقى تلحوس بيه خلقتها
أشار الى طبق الفاكهة قائلاً :
- هاتى كمان صابع
هتفت أمه بحده :
- خلاص مفيش .. شطبنا .. قوم يله .. قوم يله من أدامى
نهض "عادل" وهو يقول :
- خلاص يا ستى هتذليى عشان كام صابع موز .. انا اللى جايبه على فكره
نظرت اليه أمه بحده وهى تقول بحنق :
- والنقاوه بتاعتك دى ناوى تلاقيها امتى ؟ .. لما توصل للستين ؟
ضحك "عادل" قائلاً وهو يغمز بعينه :
- لا احتمال قريب
نهضت أمه قائله بهلفه :
- بجد يا "عدول" فى واحده منشن عليها
ضحك "عادل" مره أخرى قائلاً :
- منشن آه .. منشن
قالت بلهفه :
- طيب ما تيلا
اختفت ابتسامته وقال بدهشة :
- يلا ايه ؟
قالت بحماس :
- يلا نروح نخطبها
ضرب "عادل" كفاً بكف وقال :
- لا حول ولا قوة الا بالله .. انتى مصدقتى يا حجه .. لسه شويه
قالت بحده :
- شويه ايه بس متنقطنيش .. مستنى ايه بس
قبل "عادل" وجنتها قائلاً :
- متقلقيش شويه بس وهقولك يلا روحى اخطبيهالى
