Secrets of the Malavegas (Book 7)

34: The Real Ones

Nasa biyahe pa lang si Max pauwi nang bigla siyang tawagan ng mama niya. Hindi pa man siya nakakalapit sa village nila nang tumawag si Armida sa kanya.

"Maximilian," bungad na bungad nito.

"Ma?" taka niyang sagot dahil ang istrikto ng boses nito. "Ma, I heard gunshots earlier."

"Gunshots? Where are you? Your father said you're in a meeting."

"Ha? I mean—" Bigla niyang naalala ang palusot niya. Hindi rin niya puwedeng masabi na nasa apartment siya ni Laby. Mas lalo siyang gigisahin ng mama niya kapag nalaman nito kung nasaan siya. "I heard it from afar," mabilis niyang katwiran.

"How far was that, Soldier?"

"Ah—" Napailing na lang siya dahil mukhang co-corner-in siya ng ina. "Ma, are you okay?" pagbabago niya ng usapan. "You're acting weird last night."

"I'm fine. We went to your Uncle Rayson."

"You sure? I'm going home."

"Huwag ka munang umuwi," mabilis na sagot nito.

"Why? Is there something wrong?" Binagalan niya ang pagpapatakbo ng sasakyan at saglit na inihinto sa gilid ng kalsada.

"Just stay somewhere safe, a café or whatever. Mamaya ka na umuwi."

"But, Ma!"

"Walang tao sa bahay. We'll go somewhere else din."

"Then I'm coming with you."

"Maximilian Joseph Zach, listen to me. 'Wag ka munang uuwi sa bahay hangga't hindi ko sinasabi . . . Armida, Zone's asking if you two are going to Tommy Land's."

Napabuntonghininga na lang si Max nang marinig ang boses ng papa niya. Hindi niya alam kung mag-aalala ba o ano dahil mukha namang normal sa kabilang linya.

"Tell Zone, we're going to Tommy Land's. Ayaw kang makita ng anak mo, baka umiyak lang 'yon doon kapag sumama ka. Si Arjo, isama mo na lang sa grocery. Hello, Max," pagbalik ni Armida sa kanya.

Hindi siya agad nakasagot. Mukhang wala ngang nangyaring masama sa pamilya niya.

"Maximilian—"

"Okay, Ma, I'll go to Coffee Beans. Call me once you got home. Take care of yourself."

"Do I have a choice? I'll see you later, Soldier."

///

Alas-dos na ng hapon. Hindi man tumatawag ang mama niya, nagpapadala naman ito ng group message kasama silang buong pamilya para malaman kung ano na ang nangyayari sa kanila.

Hindi mahilig gumawa ng group chat ang kahit sino sa kanila sa bahay pero bigla-bigla na lang sila nagkaroon ng group thread sa araw na iyon. Pakiramdam niya, may mali talagang nangyayari.

Ang naroon lang sa group na iyon ay si Armida, si Josef, at siya. Ang nakalagay pang nickname ng mama niya ay 99; ang papa niya, RJ; at siya, Soldier. At lahat ng iyon, mama niya ang gumawa. Mas lalo tuloy siyang nawirduhan.

Nagtatanong si Josef tungkol kina Armida sa amusement park. Nagse-send lang ang mama niya ng pictures. Mukha namang enjoy na enjoy si Zone sa pamamasyal.

Si Josef naman, nagse-send ng picture nila ni Arjo habang nasa grocery. Si Arjo naman ang may hawak sa phone niya kaya puro selfie nito at pino-photobomb lang ni Josef ang karamihan.

At dahil kinukulit siya ng mama niya na mag-send ng update, ang tanging pinadadala lang niya ay kung nakakailang espresso at frappe na siya magmula nang maupo siya sa puwesto niya sa kapehan. Nasa harapan niya ang laptop para ipakita na nagtatrabaho siya kahit na hindi naman iyon ang original niyang plano. Para lang masabi niya na wala siyang ginagawang kalokohan.