#لو_كان_لي_قلبان
البارت الاول 🥀 قصة بقلم الكاتبة ڤينوس ٱرام
لو كان لي قلبان لعشت بواحد
وافردت قلبا في هواك يعذب
لكن لي قلبا تملكه الهوئ
لا العيش يحلو له ولا الموت يقرب
گعصفورة في كف طفل يهينها
تعاني عذاب الموت والطفل يلعب
فلا الطفل ذو عقل يرق لحالها
ولا الطير مطلوق الجناحين فيذهب
(قيسُ ابن المُلَوَّح)
بغداد /الكرادة 2014 /21/3 الجمعه
محسوبكم هشام ابن الاستاذ اياد العراقي.. الناقد السياسي المعروف بنقده اللاذع ضد السياسيين والعمليه السياسيه …
والدي يكتب مقالات بالجرايد والمجلات عن السياسيين والاوضاع اليمر بيهه العراق…اتعرض مرتين للطرد من الجريدة اليكتب بيهه بسبب شتمه وتجاوزه علئ شخصيات عراقيه سياسيه .. ومرة اعتقلوه جماعه حزبيه وبالكوة طلعناه لان عدنه عرف وناس واصله اتوسطولة
مهنته اثرت علينه بحياتنه اليوميه لان صار مو بس ينتقد السياسيين و اوضاع البلد لا صار ينتقد كلشي بحياتنه.. واي شي يبدر من عدنه يشوفه غباء وقله وعي
والدي اطلاقا مينتقد نفسه او يحاسبهه لان يعتبر نفسه انسان معصوم من الخطاء ودائما هو الصح واحنه الخطأ
الله نطاني اهل ميتفاهمون اللي براسهم براسهم ابد ميتغير..وغصبا عن اكبر شارب لازم يتنفذ حتى لو على حساب سعادتنه ..
وميهمهم اذا كان هالامر بي اذيتنه المهم سيادتهم راضين وامشين كلمتهم علينه
وخصوصا السيد الوالد ينتقد الحكومه وتسلطهه ع الشعب ونسى نفسه شكد مطيح حظنه
محسوبكم طالب مرحله رابعه علوم سياسيه ومبقى شي واتخرج واصير سفير بوحدة من چنابر بغداد الجديدة
هههه يعني سفير بسطيه فلافل او سفير بسطيه ملابس باله ..او اذا اترقى اصير سفير مكياج وعطورات نسائيه ..
ابواب التعيين في بلدي فقط بهالمجالات موجودة…ولأني مثل باقي الشباب يائس من شي اسمه تعيين
وطبعا محسوبكم مفلس وماعندي راس مال قوي حتي اسويلي شغله اعيش منهه ..
فماكو غير الجنابر اللي افتح بيهه مشروعي البسيط لان الجنابر تعتبر مولات الفقراء ..
عمري حاليا 27 سنه اتخرجت من السادس وماقدمت علئ الجامعه بسبب الضروف الاقتصاديه التعبانه فـ التهيت اشتغل واعيل نفسي واهلي ..
بمرور الوقت قدمت علئ الجامعه لان حلمي اخذ شهادة جامعيه..ورغم ذلك احس نفسي كلش متاخر عن اقراني…
