البارت السادس عشر
#لو_كان_لي_قلبان 🥀 بقلم الكاتبه ڤينوس ٱرام
عريان يكول
لا عاد الصبر يلچم مصب العين
ولا مثل الخلك بدموعنه أنمثل
طالت والعمر كلما يلف يطول
غم ذاك العمر من ينگضي أتعلعل
🥀
هيثم ـ سألت اكثر من دلال بالكرادة
المتر مينباع اكثر من مليونين ونص مستحيل هاي للبيوت الضخمة
لان حرب داعش
وسيوله نقدية ماكو
وكساد السوك واكف
يعني مثل كلامي البارحه
اميرة ـ لا عيني شنو مليونين ونص هذا الرجال خابص روحه
كلتله بعشرة وقبل
هيثم ـ جيد اذا المتر بعشرة اني هم ابيع وياكم
اميرة ـ شنو
اياد ـ ليش
هيثم ـ ميحتاج سؤال
هالسعر لكطه لهيج بيت ..
اميرة ـ لعد انت خبصت روحك
بيت ابويه وذكرياتنه ومابيعه لغريب علئ شنو خبصتنه وياك وخليتنه ننجمع
هيثم ـ وبعدني علئ رائيي
لكن الحياة فرص
وهيج فرصه متتعوض
بيت متهالك قديم بنائة من ستينيات القرن الماضي مساحته مايقارب 150متر او اقل
يعني تقريبا كل واحد من عدنة
احنة الولد حصته اقل من 25 متر
وحصه كل بنت تقريبا 13 متر او اقل
..كل حصة نضربهه في عشرة
راح يطلع رقم خيالي سعر البيت ..
اياد ـ صدك تحجي !
ـ احد كلك دشاقه وياك
هالشخص يريد يشتري المتر بعشرة يعني حصتي مثل الورد 250 مليون
نحسبهه حساب عرب ..
ضرب بجمع
اخذ ال250 مليون
واشتري بيت قديم
مثل بيتنه واعتبره
هو بيت العائلة
وبيت ابوية العشت بي ..
وخلص
فضت راحت
ومثل مكلت الفرصه متجي مرتين بالعمر فـ قررت استغل الفرصة و ابيع وياكم
اميرة ـ صاير تفكيرك مادي يبن ابوي
هيثم ـ منكم نتعلم
امير ـ شبيج اميرة ترة مو عيب الانسان يفكر بتحسين حالته الماديه
اميرة ـ وهو عايزز
سميرة ـ يايايا مدكليلي شبيج هيج تحجين وياه
ماخذ من جيب رجلج
لو ماخذ من ورث ابوج
بابا هذا تعبة تعرفين شنو يعني تعبة
اميرة ـ اكلج يولي كافي تتلوكيلة ترة ماراح ينطينج فلوس علئ لواكتج
منيرة ـ يمعودين احنه اخوة شهالحجي عيب يسمعونة الغربة والله نتخزة
امير ـ والله محد ديجفص بالحجي غير اميرة
ترة فد مرة اسلوبج صاير زف
كافي عاد اسكتي
شنو هالحجي
لج لاعيب لامستحه
عيني عينك تحجين وتتحسدين
هيثم ـ ترة اعرف اردج
بس اخوتي كفو ووفو
وهذا اخر كلام عندي
اني بياع لهلـ شخص
