{ الحب الأعمي }
الحلقه 58
رحمه: هييييي
عصام: يبحت في دبشا وفي دقيق الي انكب ع ارض
رحمه: وهي مرتبكا . أأأسسفه
عصام: بحت في نظرة رحمة الي كانن اعيونها حورات . لا عادي انا الي اسف
رحمه: ترعش وقلبها يدق بالقوه من موقف
خذت باقي الاكياس وعدت بسرعه للحوش
عصام: ابتسم وخش للمربوعا قعد ينفض في تيشرت وسروال ويضحك ويهز في راسا
عصام يلمس في خدودا . راه نقعد متت وخشيت للجنه تي بنت هذي حقيقيه ولا انا تهيالي
عليك اعيون فيها فرخا .
~~~~~~~~~~~~~~~~~~~
رحمه: خشت للمطبخ علي أحلام
وحطت اكياس الدقيق ع طاوله
احلام: جبتيهن
رحمه: تندب . حي عليا ياعميمه حي عليا
عليك تزليطا😱
احلام: كنك 😳
رحمه: في واحد في مربوعا الي برا انا طالعا من مخزن نخبطلك فيه ونطيح كيس دقيق عبيتا وعبيت الارضيا وراجل مصبي ومنصدم
احلام: خههههههههه عطك الخير وانتي ديما داير فولط . هذا صاحب هيثم
رحمه: حي عليا كان مايبص ويقولها له
احلام: حتي وكان قالها شن يعني مش ديرتيها بالعاني انتي شن عرفك ان في راجل
رحمه: زعمك يحكيش
احلام:وعليش بيحكيها يعني وحتي كان حكها هيثم مش حيديرلك شي
رحمه: اه قلبي نين وجعني من لقطه عليك تزليطا ههههه اكيد يقول بنت العبيطه
احلام: ديما عدا انتي حركات اهبال شورك
رحمه:ههههههه
احلام: هيا ياحنه نبدو بعد انك طيحتي كيس دقيق خلينا اديرو بالاربعه هذينا
رحمه:شن بديري
احلام: معمول
رحمه:باهي هيا . ورفعت رحمه اكمامها ولمت شعرها كلا فوق
وبدأت في معمول هيا وأحلام
~~~~~~~~~~~~~~~~~~
فيصل: لا ياراجل ماتقولهش لاحول ولاقوة الا بالله . باهي وشن قالك ومن دكتور هذا
عطيني بس الفحوصات وماعليك تو نشوفا انا
تي عيب والله ماهي طالعا مني تم . انت بس تشغلش بالك وخليها ع ربك ياباشا خلاص هيا اوكي
~~~~~~~~~~~~~~~~~~~
هيثم: خش بالسفره . وحطها عالارض
هيا يااعبيد تعال تمقعد وتمحمط
عصام: وهو يقدم عالسفره . تي ليش يارا مكلفين اروحكم . اكيد تعبتهم
هيثم: ننقنك تعبتنا معش اتعاودها. تي اوكي يا...... فكني من جو رسميات الي اديرلي فيه
عصام: ماهو خايف نفتحلك الدلاله تندم
هيثم: زعمك . لا معناها خلينا رسميات خيير
عصام: خهههههه. باهي شن صار معاك في موضوعك
هيثم: تي خليني ساكت وماتنكدش عليا . مازلت مالقيتش حل يرضي طرفين
عصام: مشكله حل واحد من اثنين ياتأخذها وترضا بأمر الواقع وترضي باتك بس انت مش حتريح يا اتفوتها وتغضب باتك وتعيش انت ومش حتريح
يعني هكي هكي في الحالتين انت مش حتريح
هيثم: اووووف . باهي شنو راي يارا والله تعبت حتي حياتي تلخبطت
عصام: ريت تبي راي . وافق وحطها هنا واشتغل انت وعيش واجوز الي تبيها
هيثم: والبنت
عصام: تندريش مرات بعد اتشوفها تسلك امعاها . انت ليش رفضها شوفها قبل مرات تعجبك
هيثم: انا عجبتني بنت الغرباويه وقلتها لكي وحكيت مع خوها ازح يارا تزليط م..... درا ليا باتي
ومعيالا والله تمعيلت الراجل يرجا فيا قاعد علي اساس انرد عليه. ونقولا بنجيب هلي
معش كلمتا من تزليط
عصام: ننقنك ياطيري قاعد في وضع ماتنحسدش عليه
هيثم: مشكله اني فكرت فيها فكرتك . بس من الي بيرضا ايجي ع ذره وزعمك يوافقو ولا يوفقوش ولا شنو راي
عصام: باهي انت اشرحلا طبيعة الحال صاحبك وكان فهمك تو يوافق وقولا ان الوضع هذا مؤقت
هيثم: مؤقت وطبيعة الحال . باهي شخبارك انت
عصام: خهههههههههه ننقنك مسخ . والله نحكيلك جديات
هيثم: تي شن نشرحلا وشن هو الي مؤقت . بالعقل القصه الي صايرا امعايا عمرها ماصارت مع حد وفيش حد يصدقها يعني اتقول فيلم يارا
من الي يصدق ان باتك يبيك اتجيب حفيدت صاحبا ورفيق الطفوله امتاعا ويجوزها لولدا هذا كلا بس عشان تقعد قدام اعيونا
يعني بالعقل هو يقولي اوكي يعني مجوزها صدقه مثلا ولا رحمة والدين ولا شفقا ولاشنو بزبط شن اتسميه الجواز هذا
عصام: ولا شن انقولك . هو باتك بالجو هكي ننقنا اصلي الي محافظ علي امانه لدرجت انت ماهميتش بس في نفس الوقت ننقنا حيظلمك ويظلم البنت
هيثم: هذي هيا . هو اتلوما وتعذرا باتي راه
مرات انقول كنا هكي ومرات انقول بس تأمن عليها هو . ورسول وصا ع أمانه
عصام: ياعليك حاله يارا .
هيثم: بكل والله ركبني شيب من هالموضوع
عصام: باهي جرب انت قصتك كلها و موضوعك مش في بنت موضوعك في غرابا
اسأل صاحبك وافق معناها توكل ع الله وانهي موضوع بسرعه وجوز
ماوفقش تقعد عرفت راسك من كرعيك
وبعدين انت تو بتقنعني من نظره وحده كبدت عليها غرباويه مستحيل
هيثم: مش قصة تكبيد انا عنديش فيه جو صبايا بس اول مره تعجبني وتشدني وحده
ولما قررت انقدم خطوه نطتلي قصه هذي زي البخت لمز......
عصام: ان شاء الله خير ياطيري انت دير كيف ماقتلك عندكش الا الحل هذا بدل ماتقعد حاير وملخبط روحك وحياتك وتفكر وتخمم عند امتا ع اقل دير هكي ورصيلك علي بر
هيثم: ان شاء الله تو نديرها حتي انا ونسألا وخلاص علي قولتك
عصام: الحمد الله .
هيثم: تي قعمز كول يارا مش وكلا هذي
عصام: انت عزمتني ع غداء وخليتها تغدايا غبره ونكدت عليا اقعد فيها ومعش تعزمني
هيثم: هههههههه اخساره فيك الخير ياتافه
عصام: لا والله سفره ديمه هذا حد وكلتي
هيثم: باهي سم قصدي صحه
عصام: يسمسمك . علي قلبك
بنطلع نغسل ايديا
هيثم: باهي شن تبيني نغسلهن لكي يعني اطلع من ماسكك
عصام: ياحيوان قصدي .فيش حد يعني نطلع
هيثم: اطلع اطلع
عصام: ياالله يالله
هيثم: اوكي يا ابو شهاب
عصام: ههههههه
