نقطة ضعف 💔 ( روايات ليبية )

حلقة 7🔥

️ #نقطة_ضعـف
الحلقة 7
علقت اميرة التوته وشافتله بتهديد ورفعت صبعها عليه : اسمعني هني عندك شهرين الله العظيم كان ماجيتني وخطبتني زي خلق ربي والناس وبديت ع ذمتك ونطلع قدام الناس كلها معاك ماعاد مكلماتك
رحب فرح : حاضر
اميرة  : وعندي شرط !
رجب زالت ابتسامته : يافرحة ما تمت شنو ؟
اميرة : نبي حوش ولدك !
رجب ابتلع ريقه بصعوبة : ش شنو ؟
اميرة : ايه نبي حوش زي حوش الديب ولدك الي وريتهولي مرة وقتلي نبي ندير جبس زيه تتفكر وله ؟
رجب : ايه نتفكر ، حبيبتي خلي نخشو ع شقة وبعدين نديرو حوش
اميرة بحزم : لا !
رجب : باه كيف تبيني ناخد حوش ولدي والله يقتلنا قبل ما نخشوله
اميرة حطت ايدها في جنبها ووقفت بتمرد : والله حك جنابك ودير حوش زيه ، زيني زي ضرتي اني حوش وهي حوش !
رجب بترجي : يا عيوني خشت في شقة حتى هي
اميرة فنصت فيه : فقصة في عيونك شن دخلي فيها اني وين خشت انشالله حتى في دار اني الي يهمني توا هي في حوش حتى ني نبي حوووش !
رجب : يصير خير
اميرة اتجهت للكاصة وقعمزت : مايصيرش خير بتاخدلي حوش اللهم بارك ماتبيش ، انساني
رجب لحقها ووقف قدامها : حاضر
اميرة ابتسمت بدلع : ايواه هكي نبي رجوبي
وخشت زبونة وقطعت عليهم ، ف طلع رجب
ومر اليوم ، وحل الليل ، واتصل الرقم بـ نور  من الرقم الغريب الخامس !
شافت نور لهاتفها ببرود وداراته سايلت ورداته لمكانه ، ورجعت شدت ريموت التلفزيون  وقوت في الصوت
رجع اتصل الرقم مرة تانية ، وتالته ، ورابعة ، وخامسه ، وصل للتسع مكالمات وردت في العاشر
نور : شن تبي ؟
المتصل بإنفعال : كيف مترديش ليا عام نتصل نسحابه ابصر شن صاير فيك ؟!
نور : هامك يعني ؟
المتصل هدي شوية : هامني ، هامني هلبا
نور : كان نعرفك انت مني بس ؟
المتصل : سمي !
نور : معاد ؟
المتصل : من معاد ؟؟!
نور بإرتباك : خلاص انسى انسى
المتصل : ما ننساش ! من معاد ؟
نور : خلاص قتلك فوته الموضوع مانبيش نعرفك انت منو ومعاش تتصل بالله عليك
المتصل بعصبية : نور من معاد ؟؟!
نور : شن دخلك ؟
المتصل بتهديد : لأخر مرة نسـأل !  مني معاد ؟!
نور : حسني خفت
المتصل : والي خالق الجنة والنار كان ما تقولي من معاد مايصير فيك خير !!
نور : لا والله ؟
المتصل : متحرقينيش ادوي من معاد !؟
نور : انت قول من انت اني نقولك من معاد !؟
المتصل : انتِ هكي قصدك ؟
نور : هكي ونص 
المتصل : ما تلومينيش باهي
نور : ربي يشفيك يا وهمي
وسكرت عليه الخط بغضب وحطاته في الحظر كالأربعة الارقام يلي قبله
وكملت فيلمها ورقدت
ناضت تاني يوم ، بدت حوايجها وطلعت مع بوها لكن المرة هادي للمستشفى ، طلعو ع السريع ، اجتازتهم سياره مظلمة وبدت اضايق في بوها ، ماعطتش نور للأمر انتباه من الأول ، الا لما خفظت السيارة السرعة واتاحت الطريق لسيارتهم وخلتهم يجتازوهم ، وبعد الاجتياز ردو عليهم ، خافت نور وشدت في ايد بوها ، وللمرة تانية ردو عليهم بقوه لدرجة السيارة قريب رفعوها وهني بدت تعيط نور بخوف
قعدو يضايقو فيهم لمدة عشرة دقايق كانت نور تشهد فيهم ، وفي الاخير خشت السيارة من طريق فرعية بغموض وفاتتهم
وصلت للمستشفى وهي ايدها ع قلبها
مر الدوام ثقيل ، روحت ، حل الليل ، وبغير العادة الرقم الغريب ما اتصلش ، ارتاحت ، رقدت .
ناضت تاني يوم ع صوت مناقشات بوها بصوت عالي ، قعمزت ، حكت عيونها ، وطلعت من الدار وين ما لقت امها واضح عليها الضيق وبوها غضبان ومقهور ويتكلم في الهاتف
نور : صباح الخير ، خيركم ؟
امها اتجهتلها وخشت سكرت الباب : وين الخير بالله
نور : شن فيه ؟
امها : حاوية الحليب خنبوها !
نور : حاوية شنو ؟
امها : بوك الاسبوع الي فات شري حاوية حليب مدعوم من المناء ، وجابها ع اساس يبي يوزعها ع المحلات هني ، المهم امس كيف وصلت وحطها بجنب هنقر عمك سالم ، اليوم اتصل عمك سالم ببوك يسأل فيه ع الحاوية قال مهناش !
نور : اللطف ياربي
امها : قريب يهبل بوك ادعي انشالله يعرف من خداها
نور : انشالله يارب ، لكن كيف قاموها حاوية امتى لحقو خنبوها
امها : والله ماعارفة ربك يستر يسحاب روحه بوك يبي يسترزق منها
نور : انشالله خير ياارب
امها : ترحمو ع الديب يلي مسافر
نور بإنزعاج : وشن دخله هو ؟
امها : كانه قاعد راه ما نخنبتش 
نور : باه اي ما نخنبتش هادي ربي كاتبلها تنخنب شن بيرد قضاء ربي هو ؟
امها : حتى ني زيك ما نحباش ، لكن ما ننكرش انه مداير فايدة
نور : لا فايدة لا فايدات
امها : بتمشي انتِ اليوم غادي ؟
نور : اكيدة ، لقيت ابلة زينب متصلة وباعتتلي رسالة ان امها تعبت امس لازم نمشي
امها : كلمي بوك يحطك ع طريقه لأن شكله طالع
نور : اوك
وطلعت امها ، وطلعت بعدها نور ولقت بوها طلع ، اتصلت بيه لقاته مشغول ، مجرد ما سكرت منه اتصلت زينب ، ردت نور
نور : الو صباح الخير
زينب : صباح النور كيف حالك باهي
نور : الحمدالله كيف حالك انتِ وحال حنينه فاطمة ؟
زينب : تاعبة لن خلاص تعرفي ، لازم تجينا اليوم امس مرضت لما مجيتيش
نور : خيرها حرارة ؟
زينب : حرارة وماكلت شي واليبرة مافيش من ضربها قاعدة من غير ماكله من اول امس
نور : لاحول ولا قوة الا بالله ، نحاول نجي لأن بابا طلع بالسيارة ومحصلتاش
زينب : بالله عليك ديري جهدك تعالي الراجل مهناش وحسام مسافر وحسن مايعرفش يسوق قاعد
نور : بإذن الله ندير جهدي نجيكم
زينب : انشالله هي نراجو فيك
نور : مع السلامة
وسكرت نور الخط ، شافت لأمها وهي حاسة بـ مسؤولية كبيرة وقالت : لازم نمشي !
اما عند حسام يلي كان يتجول في الشقة المودرن الفاضية ومعاه رجل العقارات السوري " نبيل "
حسام وهو يستكشف في الشقة وحاط يديه ورا ضهره ، ونبيل يلحق فيه بدعاياته : الشقة قريبة من المول ، والمدرسة ، والساحة !
حسام خش لغرفة المعيشة الفاضية
نبيل : هاد غرفة المعيشة ، الشباكة بتفتح ع حديقة العمارة ، وفينك تشوف
حسام وقف ع الشباك والقى نظرة ورجع تلفت للغرفة
نبيل : الشقة فيها تدفئة مركزية ومكيفة
حسام : السعر مبالغ فيه ، لما قالولي توقعته شي يستاهل اكتر من هكي
نبيل ابتسم باش يغطي ع ارتباكه : بالعكس هذا سعرها وقليله فيها الشقة مودرن ومريحة وقريبه علي الخدمات
حسام : دارين وصالة وحمام ومطبخ تبيني نحط فيهم 100 الف دولار !
نبيل : واله سعرها منيح
حسام : صغيره
نبيل : بدك كم غرفة ؟
حسام : يعني تلاته غرف كويس
نبيل : كم ولد عندك ؟
حسام : مش متزوج !
نبيل ابتسم : طب ليش بدك ياها هاقد كبيرة حتى المدام رح تتعب في ترتيبها
حسام بجدية : تبي تشوفلي وحدة اكبر ولا ندور مكتب تاني ؟
نبيل : حاضر بس لحظة
طلع نبيل هاتفه واجرا اتصالاته وسكر وشاف لحسام : حظك الشقة الطابق الفوق تلاته غرف وبـ نفس السعر
حسام حك لحيته بعد ما خنس : شن يفرق ؟
نبيل : كل مايزيد الطابق السعر يختلف
حسام : باه خلي نشوفوها
وطلع نبيل ومن بعده حسام ، خشلها ، وعجباته الشقه ، وشبه كمل فيها
وفات اليوم ، روحت نور متأخر من حوش ابله زينب بسبب تعب الجدة ، خشت وارتمت ع السرير ، شافت للساعه في هاتفها كانت 11:30 !
والغريب معاش اتصل ! شي مُحـيّر ! 
ناضت تاني يوم نور ع صوت بوها الي كان ينوض فيها
نور فتحت عيونها وشافتله : ها !
بوها : اني طالع مع عمك ، ما نقدرش نوصلك هاك المفتاح امتع السيارة
نور : باه حطه
حط بوها المفتاح وطلع من الدار ، وبعد ساعة رن المنبه ، ناضت ، فطرت ، بدلت وطلعت بسيارة بوها
من قبل واعدها انها مجرد ما تتخرج ح يشريلها سيارة ، ومابين هذه المدة كانو يتقاسمو في السيارة
ناضت بدلت حوايجها وطلعت
وصلت للحوش ، ونزلت ، خشت ، سلمت ع الجدة وفادية واطمنت علي اخبارها وقعمزت
قعمزت جنبها فاديه وسألتها ع موضوعها امتع الرقم الغريب ، وبحكم الصداقك الي بدت تجمعهم حكتلها ع خر المستجدات
تفاجأت فادية وانصدمت ، قرت المسج الاخير وهي مش مصدقة !
فادية : ردي بالك ع روحك
نور : المشكلة ان جاية بروحي بابا طلع وخايفة تصير حاجة
فادية : روحي قبل المغرب
نور : هذا هو يلي مدايراته في بالي
وفعلاً مر اليوم وطلعت من الحوش قبل المغرب بـ ساعة ، ولعت السيارة وطلعت ، وطول الطريق في سيارة تلحق فيها ، نور قلبها ينبض بسرعه وهي تشبح للمرايا والسيارة المظلمة تلاحق فيها وهي تغيرلها في الضي
زادت نور من السرعة والسيارة وراها ، وقعدت تلاحق فيها لن وصلت للحوش وخشت نور تجري
سكرت الباب وحطت ايدها ع قلبها وتنهدت ، اتجهت لغرفتها ونحت الحظر ع اخر رقم واتصلت ، ورد المجهول من اول رنة وقال بإستفزاز : واخيراً ح تقولي من معاد ؟
نور بإستسلام وصوت يرجف : زميلي في الدفعة كان معجب بيا وبعتلي كدا مرة ورفضته !
المتصل : ممتاز ! علاش تخلي فيا نرعش فيك
نور قعمزت ع السرير : عرفتك منو
المتصل : كيف عرفتيني
نور : نفس الي تحس بيه انت حالياً اني حاسة بيه
المتصل : كنت عارف
نور تنهدت : بس علاش ادير في هذا كله ؟
المتصل : لأني نحبك ! ♥️
نور : والي يحب يأذي ؟
المتصل : ما أذيتكش ، الي ندير فيه معاك ندير فيه بكامل الدقة !
نور : رجع لبابا الحاوية
المتصل : حاضر
نور : وعد ؟
المتصل : وعد شريف
نور : باهي تمام
المتصل : سامحيني
نور : يسامحك ربي
المتصل : لمصلحتك هذا كله
نور : هه ! مصلحتي ؟
المتصل : ايه
نور : قداش ما واثق من نفسك
المتصل : فوق ما تتخيلي
نور :  لو فعلاً تبي مصلحتي تجينا للحوش مش تتلبدلي بالأرقام الغريبة والرسايل المبهمة !
المتصل : قريبـاً انشالله
نور : بجديات ؟
المتصل : والله العظيم
نور : باه تو نشوفو
المتصل : كيف حال يلي كنتِ عندهم ؟
نور : مني قصدك ؟
المتصل : العيلة يلي كنتي عندهم !؟
نور عقدت حواجبها بإستغراب : منين تعرف ؟
المتصل : نعرف
نور : تخوف فيا
المتصل : ماعاش الي يخوفك
نور : بجديات راه
المتصل : ماتركزيش هلبا
نور : مانقدرش ، نبي نعرف منين تجيب في اخباري ؟
المتصل : تسألي هلبا حسيتك
نور : من حقي نعرف
المتصل : ح نقولك بس مش توا
نور بإلحاح : لا نبي نعرف توا
المتصل : يوم تاني قلنا
واخذهم والوقت والتهدريز للساعة تقريباً ، صفر فيهم رصيد نور
المتصل : هذا الرصيد ؟
نور : ايه ، بيودع يلا اصلاً نبي نرقد
المتصل : اصبري تو نعاودلك
نور : تعبانه بنرقد
المتصل : رقاد شنو توا الطناش قاعدة مجتش
نور : مولي عليا التعب
وسكر الخط وعاودلها ، ردت نور : الو
المتصل : نص ساعه وسكري
نور : وراي نوضة بكري غدوا
وبعد الحاح من المتصل ، قعدت لمدة تلت ساعة وسكرت
سكرت تزحقت نور في فراشها وتغطت وغمضت عيونها وهي تفكر في هالراجل الغامض!
مش صوت مروان ، ولا اسلوب مروان ، ولا شخصية مروان ، مني زعما ؟
بس بغض النظر ع انه مش مروان بس الباين انه شخصيته قوية و جذابـه !
يمكن صديق مروان ! الله اعلم
كانت هكي تفكر لن خداها النوم
اما تاني يوم ، ناض حسام ع صوت طقطقة باب الهوتيل ، شاف الساعة لقاها الـ 9 ، ناض وخش الحمام وطلع فتح للطارق اللحوح ولقاها يارا
الديـب : صبح !
يارا بعتاب : علاش مش منحي تيشريتك ؟
الديـب : لأن حاس بيك تبي تجي
يارا : باه حول بنخش
دنا الديـب وخشت يارا : خيرك ماتردش عليا امس ؟
الديـب : مافضيتش
يارا : كذاب
الديـب : يارا
يارا قعمزت ع السرير الحايس : بايت بروحك؟
الديـب : ايه
يارا : حوسة سريرك يقول العكس
الديـب اتكا ع الزيانة : صبح الززفت
يارا : نبصر لكن سريرك حايس هلبا تقولي متصارع فيه
الديـب : يارا !
يارا  ابتسمت وقالت بدلع : ياحليلي كيف يقول فيها ، عيون يارا ♥️
الديـب : كأنك تبي اطوري العلاقة حسيتك ؟
يارا زالت ابتسامتها : كيف قصدك ؟
الديـب : يعني تعالي شوفي احني شنو بالزبط ؟
يارا : اصدقاء !
الديـب : من عقلك اني ح نصادق وحدة زيك ؟
يارا : كيف ديـب مافهمتكش ؟
الديـب : يعني اني مش من نوعية الاولاد يلي عندهم اصدقاء بنات وابصر شنو ، مش جوي يعني منلاخير
يارا رفعت حواجبها وشبحتله نظرات عتاب : حبيت يا حسام !
الديـب : ايه !
يارا : يلعن بو الحظ يلي عندها
الديـب : مش لازم تلعني شي ، وبالله عليك فوتيهم الزيارات والاتصالات
يارا وقفت بعد ما انتكست ملامحها وتغيرت نبرة صوتها : الوحيد يلي حسيت بيك فهمتني وحسيت بيا ، الوحيد الي نرتاح معاه مش في السرير طبعاً نحكي ع عقلياً !
الديـب بعدم مبالاة : الله غالب 
يارا : تبي ترخي بيا توا ؟
الديـب : علاش تتكلمي وكأنه حبيبك مش صديقك !
يارا : مش عارفة ، كل الي نعرفه انك صدمتني
الديـب : هو  مكانش مفروض نرد عليك من مكالمتك الاولة في المطار
يارا قربت منه ووقفت قدامه : هذا الي طلع منك ؟
حسام قعد يشبح لعيونها المليانه دموع وهو ساكت ، قربت منه هي اكتر بعد ما ارتشفت انفها ، وحطت يديها ع كتافه وسندت راسها ع صدره وبدت تبكي
الديـب تفاجأ : خيرك ؟
يارا وهي تبكي : كنت عيلتي يا حسام !
الديـب :  فكينا بالله عليك
يارا ضربت ع قلبه بقبضة ايدها : يا متحجّر !
الديـب : خلي ختامها مسك
يارا شافتله بغضب وهي تبكي : انت غبي ؟؟! ماتحسش ؟؟ عبيط ؟!! تستعبط عليا ؟؟! فهمني انت شنو بالزبط ؟!
الديـب : تي خير عمك
يارا بدون اي مقدمات  : نحبك !!
الديـب انصدم وقعد يشبحلها وهو مش عارف شن يرد
يارا : ما تشبحليش هكي قولي حتى اني ! بوسني ! احضني ! ما تقعدش جامد هكي !
حسام دفها من عليه وقال بإنفعال : تي بعقلك انتِ خيرك انتِ هبلتي ولا شنو ؟ سكرانة ؟ واخدة حاجة ؟
يارا قعمزت ع السرير بتعب وغطت يديها بوجهها وهي تبكي وتقول : مش بـ ايدي نحبك نحبك !
الديـب : لالا انتِ سكرانه الباين
يارا شافتله بعد ما مسحت دموعها وارتشفت انفها : سيبته السكير من لما قتلي سيبيه
الديـب بتهتك: كثر خيرك والله 
يارا نحت شعرها المهدود ع كتافها وحذفاته ورا ظهرها ووقفت : عارفاتك مستحيل تتزوجني ، حتى لو عفت نفسي وصنتها ولبست خمار وصمت حياتي كلها ، بس نبيك تقعد معاي ما تسيبنيش
الديـب بجدية : نقولك نبي نتزوج وتقوليلي اقعد معاي بعقلك انتِ ؟
يارا رجعت وقربت منه وقالت بنظرات كلها ترجي : ما تردنيش مكسوره !
الديـب : بالله عليك نحي هالفكرة من راسك
يارا زادت قربت ورجعت حطت يديها ع رقبته : بالله عليك ما تقولش هكي
حسام زادت نبضات قلبه وارتبك ، معاش يبي يرجع للخطايا والذنوب ، سيبهم من سنين ومعاش ناوي يرجعلهم ، قطع عهد ع نفسه ومايبيش ينقضه ، صراع حاد بينه وبين الشيطان ويارا
وقفت يارا ع راس صوابعها باش توصل لطول حسام وتسرق منه قُبلـة طويلة ما قطعها الا دفانه ليها
مسح حسام شواربه بإيده : تي خير امك يارا متكرهينيش فيك
يارا قعدت تشبحله وهي مصدومة وقالت : عفت شاربي بعد ما كنت تـ..
حسام قطع عليها بإنفعال وعصبية : سكرررررريييي فمممممك !! كنت ! كنت بلا عقل وطايش وفترة مراهقة وعدت ماتقعديش تذلي فيا بيها ! هي مرتين ومن بعدها شعفت ! لو ندري عليك هكي ماكنتش تعمقت في علاقتي معاك !
يارا قعدت مصدومة فيه وتشبحله وهي تراجي فيه يتنهد ويتعوذ من الشيطان ويهدا كـ عادته بس هالمرة قعد منفعل
يارا بهدوء : قتلتني يا ديب !
وخذت شنطتها وطلعت من الغرفة ، وخلاته في جو من التوتر !
خش توضا وصلى ، وماقدرش يحس بالخشوع بسبب صوت المكالمات
كمل الصلاة وخدي هاتفه المثقل بـ7 
بالمكالمات الفائتة
اما عند نور يلي تراجي في مكالمة المتصل الغريب ع أحر من الجمر باش تخبره ع ردان الحاوية اليوم الصبح ، اتصل وأخيـراً
ردت نور : صبـاح الخير
المتصل : صباح النور ، وصلت الحاوية للمكان ؟!
نـور : ايه وصلت
المتصل : تمام ، انشالله الوالد يسامحنا في الرعشة
نـور : نموت ونعرف انت منـو !
المتصل : متخافيش ح تعرفي قبل ما تموتي ، المهم حبيبـي اني لازم نسكر حالياً لأني مشغول ، المهم اطمنت ان الحاوية وصلت وامورها تمام
نور بإستغراب : اه اوك
المتصل : مع السلامة
نور : سلامات
سكرت نور الخط وحطت هاتفها ع السرير وقال لـ نفسها : شن هذا زي الشبح !
نرجعو لـ الذيب يلي كان بدوره يتصل بـ علي الي رد عليه من اول رنة
علي : الشيلات ليهم يومين مسكرات والناس معاش مشو لخدمهم دبرلنا في بنزينه ياراجل
الديـب : تي كيف كلمتهم قالو يبو يبعتو تلاته شاحنات
علي : ماوصلنا شي !
الديـب : دقيقة بس
سكر الديـب من علي واجرا اتصالاته وعرف ان الشاحنات طلعو من المناء لكن خدوهم احدى المناطق يلي مرو بيهم ، اشطاط الديـب بالغضب واتصل بـ ناس يعرفهم في المنطقة المذكورة ، وأكدوله الخبر ورفضو ان يديرو حل ، اتصل الديـب بـ علي وقال
يتبع