نقطة ضعف 💔 ( روايات ليبية )

حلقة 18🔥

#نقطة_ضعـف
الحلقة 18
الديب مد ايده ونحالها يدها من ع عيونها وهي تشبحله وقريب تبكي : احكيلي شن صـار معاك بالتفصيل !
شافتله نـور وهي في صراع مميت بينها وبين نفسها ، قلبها يدفعها ع الكلام وعقلها يـرفض
عندها رغبـة جامحة انها ترتمي في حضنه وتبكي وتحكيله كل شي وترتاح
لكن ما تقدرش !
بـعد صراع دام لدقيقتين كانو من اطول دقايق عمرها فضلت السكوت والكذب : مصار شي
الديـب بهدوء : نعرفك كويس لما تفرحي ، ولما تزعلي ، ولما تحمقي ، وحتى لمـا تكذبي !
كانت نور ع وشك انها تحكي الا ان رنين هاتفها قطع عليها ، وحست كأنه رسالة من ربها ان ما تحكيش
طلعت هاتفها من شنطتها وشافتله وقالت : هذا بابا اكيد وصل
وردت : الو
بوها : قدام الكلية اني
نور : هاني طالعة
وسكرت الخط ووقفت وشافت للديب المنزعج
نور : بابا يراجي فيا الـبرا
الديب هز راسه : باه تمام تو نكلمك بعدين
نـور : مش لازم ، هي باي
ومشت وسيباته منزعج
روحت نور للحوش وجوها متعكر جداً ، وكيف بدلت ملابسها اتصلت عمتها اميرة
نور قعمزت ع سريرها وردت : نعم ؟
اميرة : هلا نونو جاك ؟
نور : ايه
اميرة : شن هدرزتو ؟
نور : مهدرزناش ، كيف فتح الموضوع بابا جي
اميرة : احسن حاجة ، امس كان فاصل ومد ايده ع بوه لكن لما سميت اسمك انطفي زي النار لما تصبي عليها مية
نور بحزن : كويس
اميرة : شكله عاشقك يا بنت ومستحيل يرضا حد يضرك
نور ببرود : عارفة
اميرة : عادي مش اول واحد يحب وما يتزوجش حبيبته ، وبعدين انتِ دكتورة وحلوة ومتعلمة اكيد ح يجيك سعد زي الرعد
نور : باه
امـيرة وهي تحاول تقنعها : امس كنت في حوش عمّك سيف الدين ، وهدرزت اني وولده غالب ، قال انضم لكتيبة وعاطينه سلاحات يعني انتِ باعدتي الديب من المشاكل
نور بإكتئاب : باه شن مزال تبي ؟
اميرة : نونو يا قلبي ما نبيكش تزعلي مني انتِ بنت خوي ونحبك ونبي مصلحتك وانتِ عارفة فرص الزواج يلي عندك اكتر من يلي عندي بهلبا ما زلتي صغيرة وتلـ..
وبنفاذ صبر سكرت نور ع عمتها الخط وطاحتلها نـوم
اما عند مروان المربوط يلي كان مرمي تحت الشجرة في المنطقة الخالية و واقف قدامه المثلّم يلي جاي مع صديقه المثلم التاني في السيارة الفخمة
قال مروان بخوف وترجي : والله ما درت حاجة وحقربي ما درت حاجة من انت وشن تبي مني ؟؟!
الملثم ببرود: ما تبكيش
مروان وهو يرجف : بالله عليك اطلقني وحق ربي ما درت حاجة وما عندنا حق فدية وامي كبيرة ومافيش من يعانيها غيري خوتي كلهم متزوجين وبوي ميت
الملثم : باه ضم فمك خيرك تدوي هلبا انت
وباعد الملثم عن مروان الخائف واتصل ورد المنشود في اخر رنه
الديب : شن صار ؟
الملثم : عندنا !
الديب : تمام
الملثم : شن نديرو باه نعدمو ؟
الديب سكت لثواني قبل ما يقول بقسوة : إعـدم !
الملثم : تمام
سكر الخط واتجه لمروان يلي كان يبكي ووجه المسدس عليه
وفات الوقت ، ومع جو المغاريب في حوش رجب يلي كان مقعمز مع اميرة ويشربو في الشـاهي تقربع الباب
حط رجب فنجان القهوة ع الطاولة يلي قدامه ووقف لما شـاف الديـب خاش وشاد في ايده مسدس
رجب بذهول : شن خاش تبي ؟
الديب بجدية : الفلوس  والذهب ، اتصلت بيك وما رديتش !! لو ما جبتش حقهم توا توا بنتصرف تصرف ثاني
أميرة مصدومة وتشبح لرجب ، اما رجب قال : ماعندي شي
الديب بتهديد : هي هكي ؟
رجب بتردد : اي
الديب اتجه لـ غرفة النوم ، وهني اميرة وقفت وقالت بصدمة وغضب : شن هالهردميسة هذه كيف يخش لدار نومي ؟؟!
دف الديب الباب برجله وخش بالكادار متاعه وشافت اميرة لرجب : تي برا تكلم دير راي ولدك خاش لدارنا
رجب قعمز ونظرات الخوف في عيونه وقال : ما نقدرش
اميرة انفجرت بالغضب : اني بنمشيله
واتجهتله اميرة ولحقاته ولقاته يفتح في قجرات الزيانة يلي كانو كلهم مليانات بالمكياج
اميرة خشتله وقالت :  تحشم ع وجهـ..
وسكتت لما رفع عليها المسدس بإيد وهو يفتح في القجرات بإيده الثانية
اميرة تحول غضبها لخوف وقالت : شن ادور ؟
الديب فتح القجر الأخير وطلع منه الباكو الاحمر ، حطه ع الكرسي وفتحه واذا به تاقم امه امتع الذهب الرزين ، شافلها الديب بإحتقار : يا واطية
اميرة بخوف : خوده
الديب بثقة : ع اساس نراجي فيك تعطيني اذن يعني ؟!
اميرة قعدت ساكتة بعد ما طلع باكو ثاني كان يحتوي ع تعليقتين ذهبيات بسيطات وقال بتهتك : زايطة في الرزق
خدي الباكوين في ايده وطلع بيهم ومحدش قال بغ !
اميرة قعدت مصدومة وطلعت لـ رجب بعد ما اطمنت ان الديب طلع وقربع الباب
اميرة وهي فالتة عيونها : شني يا راجل الحوش ؟!
رجب بإرتباك : ماعندي ما نديرله
اميرة بغضب : معقولة يخش قدامك لدارك ويطلّع ذهب مرتك وانت ساكت ؟
رجب انفجر فيها : تبيه يقتلني !؟ هذا ما يخافش ربي والله كان ندوي حرف احتمال يحرق الحوش كله اليوم
اميرة تنفست الصعداء وقالت : اني نعرف حله ، ارفعني حوش خوي ، عبد الحميـد !
وفعلاً خلال ساعة كانت غادي
طقطقت ع نور يلي كانت فاتحة الموسيقى ومدايرة السماعات وتبكي
حست نور بصوت الطقطقة ونحت سماعاتها ومسحت دموعها وسمحت للطارق بالدخول
انفتح الباب دخلت اميرة راسها : هلا بالحلو
نور تلفتت الجهة الثانية بإنزعاج
وخشت اميرة وسكرت الباب وقعمزت قدام نور يلي ضامة رجليها لصدرها
اميرة : كيف حالك
نور شافتلها وعيونها حمر : كيف حالي ؟
اميرة سكتت وهي تراجي في نور يطلع منها الكلام ، وكملت نور وقالت : حالي حال وحدة حابـة وحرموها من حبيبها ع خاطر مصلحتهم ! حالي حال وحدة فادة من الدنيا ومكسورة ومعاش عندي نية في شي ، هذا حالي
سكتت نور قبل ما تكمل وتقول : يا عمـتي !
اميرة نزلت راسها ورجعت شافت لعيون نور الحزينة وقال كلامها المعتاد : نور يا قلبي اني مستحيل نضرك ، انتِ مزال قدامك عروض زواج والف واحد يتمناك ، هذه مش نهاية العالم
نور بعيونها اللامعة البريئة : لكن مش ح نلقا حد يحبني زي حُسام ، ولا اني ح نحب حـد زيه !
اميرة : هذا علاش جيتك اني توا !
نور : شنو ؟
اميرة : خشلنا اليوم وخذي ذهبي
نور بإنزعاج : ذهب امه قصدك !
اميرة : المهم ولى ذهبي رجب جابهولي
نور بتقزز : مصح خليقته قداش ما نكره
اميرة : غر اسمعيني ، نبيك تكلميه وتهديه وتقوليليه يفوتنا !
نور رفعت حواجبها بدهشة وقالت : احلفي ؟
اميرة سكتت لـ تكمل نور وتقول : يعني انتِ حالياً تستغلي فيا باش نستغل حبه ليا ونقوله معاش يضايق عصافير الحُب ؟
اميرة بـ وقاحة : ايه
نور : هه جو انتِ
اميرة : انتِ الوحيدة يلي يسمع في كلامك وياخد بيه مافيش حد يقدر يتحكم بيه غيرك !
نـور بنفاذ صبر : اطلعي من داري !
اميرة : نور !
نور انفجرت في وجه عمتها بإنفعال : مش بجوك هو ولا بـ مزاجك راه ! مرة تقوليلي معاش تكلميه واقطعي علاقتك بيه ومرة تقوليلي اتصلي بيه وقوليله يخطاني ! مدامه في راسه شي يعني ح يديره وحتى لو كان اني كلمته ! مش تبيني نبعد عليه ، وريني فلاحتك !
اميرة تنهدت بصبر وقالت : مقدرتاش
نور بنظرات كلها غيض  : ومش ح تقدريه !
ورن هاتف  نور يلي كان يرن بإسم حسام وشبحوله الزوز
شافت اميرة لنور بترجي اما نور ردت عليها بغضب : مش ح نرد ، اطلعي نبي نقعد بروحي
طلعت اميرة بعد ما خـاب ضنها وروحت وهي تجر في اذيال الخيبة
وفات اليوم ، ثاني يوم الصبح ،
فات اسبوع ..
جرّد فيه الديب اميـرة من كل ذهبها وحتى فضتها ، في هديكا الليلة يلي روح فيها رجب بإستعجال ووقف قدام اميرة يلي كانت ادير في كريمة لـ يديها في غرفة النوم وقال
رجب : اميرة انتِ طالق !!
فتحت اميرة عيونها بصدمة ووقفت : شنو ؟!
رجب ابتلع ريقه بصعوبة وقال بثقة مزيفة : ايه زي ما سمعتي انتِ طالق
اميرة اشتعلت بالغضب وقالت : دارها ولدك !! دارها هالديب هذا !
رجب : لمي حوايجك واطلعي
وطلع رجب واتصل ورد الديب
رجب : طلقتها ! ردلي السيارة
الديب : مية مية غر تعالى للحوش نتفاهمو
سكر رجب الخط واستقل سيارة اجرة للحوش ووصل ، خش بإستعجال بدون حتى ما يسلم ع عيلتها يلي ليهم فترة معاش شافوه وخشله يجري للصالون
الديب وهو مقعمز وحاط رجل ع رجل في الصالون شاف لبوه ببرود
بوه قعمز وهو داهش : مفتاح السيارة
الديب شاف لبوه ثواني ورجع شاف للتلفزيون وقال ببرود : بعتها !
بعيداً عن حوش الديب كان حوش عيلة نور وصلهم خبر طلاق اميرك يلي ما طقتش شهر زواج
طلعت نور المكتئبة من دارها واتجهت للمطبخ وسمعت بوها يلي كان منفعل وهو يتكلم في الهاتف ، وقفت بجنب الباب وفهمت ان عمتها اطلقت من خلال سياق الحديث ، حست بريق الأمـل تسلل لقلبها وان الديب فعلاً يبيها وشاريها .
بأي طريقه هي متأكدة انه هو وراء طلاق عمتها
غيرت رايها بموضوع المية وقررت تروي نفسها بصـوته 💙 !
اتصلت ورد المنشـود وهو كيف طالع من حوشهم من اول رنـة ..
يتبع ..