أنثي برتبة رجل

الفصل الخامس والعشرون

سبحان الله وبحمده سبحان الله العظيم

أتمنى من الله أن تكونوا بخير وصحه أتمنى لكم قراءه ممتعه

💞💞💞💞💞💞💞💞💞💞

كانت تتابعه وهو يتكلم بأسى ولكنها عقدت جبينها بعدم فهم ولكن ما لبست وتوسعت عينيها عندما تذكرت ووضعت يدها علي فمها بصدمه وهو هز رأسه موافقا علي ما تذكرت قالت نور بدفاع :

إنت عارف إني كنت بكدب عليها مش معقول صدقت

مراد بحنق :

مكونتش قادر أفكر مكونتش قادر أشوف الحقيقه من الكدب كفايه كلامها اللي عمري ما فكرت فيه كنت شايف إن سبع سنين فرق مش كبير

وضعت نور يدها علي جبينها بارتعاش والألم يزداد في رأسها قالت بحزن علي الذكريات :

فريال كان بقالها فتره قبل ما تتكلم معايا تلمح إن فيه بيني وبينك حاجه مش مظبوطه وكمان راحت لماما وكلمتها علي أساس إنها خايفه عليا من كلام الناس طبعا دي مجرد حجه جت في اليوم دا وأنا طالعه الشقه واقفتني قدام شقتها وسالتني بصراحه إيه طبيعة علاقاتنا وأنا فاهمها و عارفه هي عايزه توصل لايه قولت مراد أخويا الكبير و بيدني درس رياضة بس مش أكتر مكونتش أعرف إني كملت معاها لعبتها

نظر لها مراد بسخريه من نفسه :

وأنا بدل ماجي أتكلم معاكي الخوف عماني كنت حزين ومكسور و غضبان عليكي مقدرتش أقعد وإنتي قصاد عيني وقلبي بيدق ليكي وتكبري و تحبي حد غيري و تجي تكلميني عليه أنا كنت بموت من مجرد ما فكرت في كل دا حسيت إن روحي بتطلع من جسمي من فكره سيبت البلد وهربت من حبي ليكي

كلماته لمست قلبها زلزلت مشاعرها ولكنها ظلت جامده أقترب منها مراد وأمسك كفيها و رفعهم لفمه وقبلها قبله ناعمه ثم أبتسم لها بحب وهو يرى تلون خديها بحمره شديده :

نور أنا بحبك لسه شايفك نور أم قصت شعر رجالي أشقر و قميص و بنطلون جينز قديم و فوطه علي كتفه و وش سبحان من صور وعيون حاجه كدا توقف القلب خطفت دقات قلبي ووقفت نفسي وافقي يا نور إديني فرصه

قالت بصوت متأثر وهي لا تقدر علي رفع عيونها له :

مراد أنا مش دي دي واحده كان كل همها تجيب لأمها وأخواتها تمن رغيف العيش بتاع كل يوم بس قلبها زي ما بيقولوا أبيض صافي من جواه بيحب كل الناس ومبيكرهش حد إنما اللي قدامك دلوقتي ......

وضع كفه منعها من المتابعه و وضع أنامله علي ذقنها ورفعها لتقابل نظراته العاشقة وقال بحب :

لسه زي ما إنتي مهما قولتي اللي توقف مع العمال وتشتغل معاهم وتداري علي عامل عمل مشكله تبقا إيه اللي تساعد الناس من غير ما يعرفوا تبقا إيه اللي ممكن تقلب الدنيا كلها علي الإهمال إنما لو حد تعب تروحه وتوصي دكتور المصنع يروح ليه البيت يشوفه وعلاجه توصله دي تبقا إيه يا نور إنتي لسه بيضا من جوا زي برا