بنات للزمن (قيد الكتابة)

البارت التاسع والثلاثون

الكاتبة : سارة الشمري🖤

الحزن هو ان تصبح مع الايام عيني التي ارى بهما،،،، وهوائي الذي اتنفسه،،، ودمي الذي أعيش به، ثم انزفك عند الرحيل دفعة واحدة..

حارث : ترة سالفة الخطاطيب الجايين عالبنية .. هاي تأليف من يمي وكلهة جذب .. ماكو احد جاي عليهة ..

فتح عيونة على وسعهن واختفت ضحكتة وباوعلي مصدوم .. لا ارادياً حجة بصوت عالي : هااااه ..

المكان صار هدوء والكل عيونة على عباس ..
ابوه يباوعلة طابگ حواجبة ..
وابو عامر نفس الشي : خير عباس شبيك ؟؟

عباس كام يمتمت بالحجي : ااء شسمة .. اكولن الجو حار ماكو تكييف ..
فتحت عيوني على وسعهن وباوعتلة مصدوم ..
حجينة بصوت واحد اني وعامر ورياض : تكييييف ؟؟؟؟

عامر : يا تكييف عباس الدنيا تگص گص برد .. بس يمكن انت احتريت من التدفئة .. اطفيهة احسن ..
كام يطفي التدفئة ويباوعلنة مستغرب ويهز براسة بمعنى شبيكم ؟؟

رجعو يسولفون ونسو الموضوع ..
عباس التفت علية عاض شفتة بغيض ويباوعلي ..
ضحكت اني بخفة : اعصابك يابة .. المفروض تشكرني .. لو ما كايلك هالجذبة جان هسة انت مو هنا وكاعد تندب حضك ..

ابتسم بخفة : اسكت كافي بعدين حسابي وياك .. اعلمنك شلون تجذب علية ..

ورة ساعة تقريباً استأذنة منهم وطلعنة ..
همة كلمن راح بسيارتة واني وعباس رحنة للمعمل .. بقينة كاعدين وبعدين هو استأذن وراح ..

مستغرب صار جم يوم وجبران لا يمر ولا يخابر الا اذا عندة شغل وياي وهذا مو طبعة .. جنة بالقليل باليوم نتفق مرتين نتشاوف .. شجاه مادري ..
دعيت بداخلي ما يكون عرف بعلاقتي وية جيلان لان ماريد اخسر ابن عمي وصاحبي ..

طلعت تليفوني اتصلت علي بس ما يرد .. يمكن مشغول ..
دخلت عالصور ورحت على ملف مسمي مشمش طلعت صورهة وكعدت اباوع عليهن .. اتنهد واجر حسرات ..

وين جنت ووين صرت .. جنت يومية ما انام الا اسمع صوتهة وضحكتهة وسوالفهة ..
ااااه يمشمشايتي شسويتي بية .. گلبتي احوالي .. من شوگي الج الليل ما انامة والله ..

صرت مثل الغريب .. لا واصل بيت جدي .. لا محاجي حبوبتي ..
ابوي ما يحاجيني وعلى شنو زعل مادري ..
عمي من بعد السواه بية واهانتة الي لهسة تحز بگلبي ..

وجبران صارلة جم يوم گاطع ولا يسأل ومن اتصل علي ما يجاوب ..
ومشمش اووووف يا مشمش .. شوگي الج بس الله اليدري بي ..

بسمة //

جبران صارلة جم يوم متغييييير حيييل ..
بس معصب ويصيح ويتنرفز على اقل شي ..
احاول ما اعصبة بس هو على كلشي يتعصب ..

حيل ضايجة ومختنگة من وضعيتة هاي وتغيرة المفاجئ ..
وين جان قبل يخاف علية من كلشي وكلامة يعيشني بعالم ثاني ..