بنات للزمن (قيد الكتابة)

البارت الثاني والعشرون

الكاتبة : سارة الشمري🖤

كالو ما تجي وكالو عليك بعيد
ودرب كلش طويل البينك وبيني
شح مني الدمع كد ما بجيت أعليك
وأعاتب بالكمر هلبت يواسيني
ظلم كلش ظلم تحيا وتموت بشوك
وجا شنهو العمر من تذبل رياحيني
تعب حتى الورق حبر ودمع مخبوط
وحسره وي القلم تأذيني وتبجيني

مريم //

قصتي شوي غريبة .. مو شوية بس ..
عشت طول عمري جوة ايد نعمة ..

تضربني وتعاقبني .. واكثر المرات من تضربني تهددني اذا گلت لجدو راح توديني يم امي ورجلهة ..

واني جانت فكرة مجرد ان ابتعد عن بابا وجدو واهلي تخوفني .. اخاف اروح يم امي لان اعتبرهة تكرهني وعافتني علمود واحد تحبة .. جنت زغيرة وهذا جان تفكيري .. لهالسبب جنت اتحمل ضلم نعمة ..

الي شافوه اهلي من تصرف نعمة وياي .. هذا جان ولا شي من الي خفيتة وضربهة الي بالسر وتحبسني والي يسأل عني تگللهم نايمة لو تقرة عوفوهة خلصانين منهة .. جم ليلة نمت ودموعي بخدي وبدون اكل .. هاي جانت ابسط عقوبة اذا جانت بدون ضرب ..

لحد ما صار عمري ١٦ سنة .. صح كبرت بس تفكيري جان بعدة متخوف ..
حجة وياي بابا گال خطبج ابن عمج ضياء ..

رفضت بالبداية لان بعدني زغيرة .. وهم كلهم جنت اعتبرهم مثل اخواني ..

راسم وضياء ورضوان وحارث جانو يعاملوني مثل معاملة هادي وجبران .. صح راسم جان اهتمامة زايد واتذكر هالشي زين بس ما جانت ابالي غير فكرة ان ينقهرون علية لان امي عايفتني ونعمة تعاملني مو زين ..

جنت بعدني زغيرة على فكرة فهم الحب ..
گلت لبابا ماريد اتزوج ضياء .. هو مثل اخوي ..
بس گال هو الوحيد الي يخلصج من نعمة ..
اريدج ترتاحين لان اشوفج تذبلين كدام عيني ..

وافقت عالزواج وتزوجت ضياء ..
وبنفس اليوم اخذني ورحنة لبغداد ..

بهذاك اليوم الخوف متملكني ..
ضياء اعرف طبعة هادئ ومو عصبي ابد ..
اصلاً اكثر واحد بيهم يتأثر بسرعة وينقهر على ابسط شي ..

بليلتهة ضياء حتى ما دخل للغرفة واني ارتاحيت نوعاً ما .. واسمعة الليل كلة يخابر ..

الصبح من طلعت شفتة گاعد بالگاع ولام رجلي ويبجي ..
خفت .. بهذا عمري ووحدي .. واشوف رجال كدامي ويبجي ..

گعدت كدامة بخوف : ضياء شبيك ليش ابجي ..
مسح دموعة بسرعة : ما بية شي .. لا تحطين ابالج ..

سكتت اني محجيت شي ..
سحب نفس هو وحجة : مريم ليش وافقتي تتزوجيني ..
جاوبتة مرتبكة : لانك خطبتني .. واني وافقت ..

ضياء : يعني شنو .. تحبيني ؟ لو لسبب ثاني ..
نزلت راسي : احبك مثل هادي .. وبابا گال تزوجي حتى تتخلصين من نعمة ..