أسسفة اليوم تاخرت عليكم ❣
وقبل تقروا الحلقة ديروا لايك بسررعة ❣
وبس تكملو ديروا تاقات لصاحباتكم واعطوني رايكم فيها ❣
رواية
" ظلام أبيض "
الحلقة الرابعة " 4 "
طلع عماد يجري للدكتور ف مكتبه
- عماد ( داهش ) : رواد يخض مع بعضه ويطلع ف حاجات من فمممه ، الحقوه بسسسرعة
وقف عبد الله هوا وصالح يلي كانو ياكلو وخدي سماعته وطلعوا بسرعة وقال عبد الله ل نور : نوور ف المدكرة تلقي رقم دكتور هشام ودكتور وجدي وقوليلهم ان يجو بسسسسسرعة
وطلعوا ووراهم عماد ، واما نور اتصلت بالارقام وقالتلهم ع رقم الحجرة وثواني وكانوا الدكاترة جنب رواد
- عبد الله : لوو سمحتوا استاد عماد استنوا برا لو سمحت
- عماد ( بقلة حيلة ) : تماام تمام ، بس رواد ف امانتكم يا دكتور
طمنه عبد الله وطلعوا برا الحجرة خايفين ومذعورين وشذى وزهرة يبكوا وعماد مش عارف شن يدير بيناتهم !
،،
دكتور وجدي يشوف ف حالته العامة ودكتور هشام يركبله ف خافض حرارة ودكتور عبد الله وصالح يراقبوا من بعيد
- د وجدي : يا عبد الله بما إنه النخاع الشوكي مهدد تبتله رقبته ، الخضة هادي قوية ومرات تقوا اكتر
- عبد الله : تمام تمام ؛
سحبوا منه دم وداروا صورة رنين للدماغ وتبتوا رقبته بواقي ،
- عبد الله : نفس يلي توقعناه كلنا ، شحنات ف الدماغ واحتمال ضئيل ان يكون صرع
- د صالح : لا حول ولا قوة الا بالله ، الولد المسكين جسمه كله خامل ل امراض ، الانيميا ونقص حاد ف كريات الدم البيضاء ومن غير فيتامينات صفر ف جسمه ، ولا اللتهاب الرئوي و سوء التغذية كل مرة تخلفله حاجة
- د عبد الله : ع الحال هاده ممكن ان عملية النخاع تكون بعد سبوعين او اكتر
- د هشام : لو ممكن انتابع حالته اني ، من ناحية التغذية ومن ناحية الشحنات يلي ف الدماغ ، هاده لو توافق يا دكتور وجدي طبعا
-د وجدي : لو مُصر هلبا عادي
- د هشام : بادن الله ف الحفظ والصون ، وكلها كلها اسبوعين العلاج بس
- عبد الله : سمعت عياط امه واخته وله ، هما خايفين عليه اكتر من روحهم ف لازم يتعافى باسرع وقت لان ضروري الدكتور صالح يدير العملية بكري
- هشام : ان شاء الله كل شي حيتحسن بفضل ربي وجهدي ان الله
كلهم : ونعم بالله
....................
سدن : الو
نور : ايوا سدن
سدن : هكي تروحي ومتقوليليش
نور : لا مروحتش اني فوق صارت حاجة توا ننزل نحكيلك
سدن : اوكِ
_________________
نور : خليك واثقة ف دكتور هشام وصالح يا عميمة احسن الدكاترة وان شاء الله حيتعافى ويرجع بيناتكم تاني
شذى ( تمسح ف دموعها ) : مسكيين رواد مسكين
نور ( اطبطب ع ايدها ) : معلش يا شذى هاده اختبار من ربي ليكم وليه ويشوف ف صبركم بس ، اهم شي توا الدعاء والدكاترة مش حيقصروا
