المقدمة
رواية
" ظلام أبيض "
كان يوم عادي زي أي يوم كئيب يمر عليا ، نضت علي صوت غريب هالمرة ، مش صوته ، لا .. هاده صوت راجل تاني غريب !
واول مرة نسمعه !
- حسين : تفضل تفضل " ودخله للمربوعة "
كنت نسمع ف خطواته واني ف الدار يلي جنب المربوعة نسمع ف صوتهم ونسمع ف صوت خطوات عمي وهوا يقرب من الدار حتى فتح الباب بقوة ودار صوت قوي ووقف ع راسي قلت خلاص حنحصل منه ما كتب ربي من ضرب واني ممتد بالطريقة هادي ،
ممكن ان يضربني بوحشية كعادته وهالمرة ممكن حنتوجع غير المرات يلي فاتو كلها ، لان المرة هادي وجعي كان ف نفسيتي وف قلبي مش ف جسمي "
رواد
______________________
نعرفك بشخصيات الرواية 🌸
رواد وهوا بطل الرواية نوعا ما ، بتبدا الرواية من معاناته كلها وهوا ف عمر 15 سنة ، طفل براءته معدومه وملامحه جامده اكتر شي يميزه هوا عيونه الكبار السود وشعره الغزير الاسود ، وملامحه كانت عادية جدا ف عمر ال 15 ، وحنشوفوا التغيير يلي بصير ف حياته كلها ❤
نور : عمرها 15 سنة بس عقلها ونضجها اكبر من سنها ، ورغم جمالها الحاد مفكرتش تلعب بيه ولا فكرت تحب حد مع ان الولاد زي الرز علاها من جاذبيتها الاوفر ❤
ممكن كلمة جميلة شوي فيها ، جسمها المتناسق وططولها المتوسط وشعرها العسلي المايل للاصفر وعيونها العسليات وكل شي فيها حلو ، وكإنها شخصية من شخصيات الكرتون ❤
واكتر شي مخلي الكل يحب جمالها هوا تواضعها مع الكل واسلوبها الهادي مع الكل ، مافيش حد ميحبهاش الا الناس الحسودة زي بنات عمامها وعماتها متلا !
وطبعا من ابسط كلمة تبكي واا اي حد يشبحلها شبحة تزعل تقعد تبكي ، اكتر شي معروفه بيه الزعل 😂🌸
صح هيا حلو وصح الناس تحبها وهلبا ولاد حبوها من جمالها واولهم اقرباءها بس هوا محبهاش وكان يشوف فيها اخته الطفلة المدللة بس ، وهالشي متعبها 💔
محمد : عمره 24 سنة يقرا ف طب النفس واخر سنة وحيكون دكتور نفسي ، طويل وعريض وجسمه تقول جسم مصارع 😂❤
عيونه بنيات وشعره اسود ، عنده غمازات ولحته خفيفة ❤
يكون ولد عم نور ( بالاصح يكون ولد عم بوها ) ، يسكنوا ف نفس الشارع هما وعمهم احمد
سدن : عمرها 15 سنة تقرا هيا ونور من الابتدائي وصاحبات من اول إبتدائي 💙
مواصفاتها ف شكلها حادة ؛ شعرها اسود وقصير عيونها كبار وع الاسود حواجبها اسود وبيضة هلبا وجسمها متناسق مع بعضه زي نور بالضبط بس تجيها فترات تسمن بطريقة غريبة وترجع بعدها لوزنها الاول وجولها قصيرة هلبا 😂❤
تافهة نوعا ما 😂 ، كلمتها واتية ومتعرفش تجامل حد
وشاطرة هلبااا هلبا وديمة الاولى ع المدرسة ، ودكائها هاده متعبها ومدمر نفسيتها ،
هادو الشخصيات يلي بتتكلم عليهم الرواية ، وفي شخصيات غيرهم حيطلعوا من البداية وحتتعودوا عليهم ف الحلقات ،
وفي كل مرة حيقابلنا حديث بقلم رواد وحتفهموا الباقي من الرواية ❤
هادي اول رواية ليا انزلها ، كنت نكتب شوي شوي ومنزلتش بس هادي البداية ان شاء الله 🙏❤
ديروا تاق لصاحباتكم وخليهم يشوفوا معاكم الرواية ومتنسوش اديرو لايك ع المقدمة وتعطوني حماسكم للرواية ف كومنت ❤
#مرام_معتوق 💙
