#آمال_وآلام 4و5
مجاهد يوسف
بعد كلام حاج حسن دا وبعد محمد عرف الحقيقة المرة دي مرق من البيت راسو شاطب والدنيا دي فجأة كدا اتغيرت في وشو ولا عارف يقبل وين مشى الخلوة حقت عمو حسين كان فيها شيخ العاقب قعد معاهو وكان داك بدرس في الطلبة قعد في ركن الخلوة وسارح يفكر ساي هو ود منو وامو وابوهو من وين وكيف خلوهو هو صغير يفوت منهم وحيين وللا ميتين قراب وللا بعاد طيبين وللا كعبين وهسي هو ح يعمل شنو و ح يفتش ليهم كيف ويمشي علي ياتو فجة ويقبل علي ياتو اتجاه ويلقاهم كيف , اسئلة كتيرة في راسو ما عارف زاتو يبدا من وين وللا يعمل معاها شنو
شيخ العاقب فوت الطلاب وجاء لمحمد وقال ليهو مالك يا محمد يا ولدي في شنو ومالك سارح بعيد وشايل هم الدنيا كدا ؟
محمد اتنهد قوي وقال ليهو الدنيا دي الظاهر يا مولانا قبلت علي بالهموم والآلام بعد ما كانت ماشة معاي زي العسل وملتني أحلام وآمال
شيخ العاقب قال ليهو احكي وفضفض الهم علي الرب يا ولدي ونحن الدنيا دي مسيرين فوقها ما مخيرين والمخير الله بس بيدو الخير وما بظلم ليهو عبد من عبيدو وكل امرك عليهو وارمي همك فوقو وما تخاف من شي وعلي حسب نيتك الله بديك وبسهل ليك امورك وما في زول ماخد منها حاجة زي ما جيناها عرايا بنفوتها عرايا وما عندنا فوقها غير فرد شبر بتلف الايام والشبر زاتو بشيلو زول غيرنا عشان كدا ما بتستاهل الزول يحزن فوقها ويشغل بالو بالتفكير أها احكي لي مالك وفي شنو
قال ليهو والله ما عارف زاتو اقول ليك شنو انا بين يوم وليلة انفتح لي باب غريب ورهيب ولا في البال ولا في الخاطر وطريق مضلم لازم امشيهو غصب عني
تتخيل انا ما ولد أبوي حاج حسن ولا أمي بدرية طلعت أمي
- بسم الله دا كلام شنو دا البتقول فوقو دا يا الدكتور
- دكتور شنو عليك الله الظاهر دكتور دي مرحلة ما ظنيتني أصلها ولا أظني بكمل الامتحانات
- لا لا والله غلطان ثم غلطان أوعك تخلي الامتحانات وتضيع مستقبلك مهما كانت الاسباب
- اليوم انا طلعت مجهول ولا معروف لي ابو ولا معروف لي ام
- أبوك حاج حسن وأبوك حاج حسين الله يرحمو وأمك بدرية المرة الطيبة الكلها خير الربتك أحسن تربية مالهم قصروا معاك في شنو وللا حوجوك لشنو
- والله لا قصروا معاي في حاجة ولا حوجوني لحاجة علا انا لازم افوت واشوف امي وابوي منو ومن وين
- اول حاجة كمل امتحاناتك وانجح وشيل شهادتك في يدك ياها البتنفعك وياها البتفتح ليك طريقك أوعك تضيع الفرصة دي من يدك بعد داك انا زاتي بمشي افتش معاك علي اهلك وانا ما بكضب عليك عارف الكلام دا من زمان كلمني بيهو شيخ حسين الله يرحمو ويغفر ليهو لكن ما كنت بوريك ولا في زول داير يكلمك بالكلام دا الا بعد تمتحن وتشيل شهادتك ويا ولدي والله أصلو ما بخليك ما تكمل امتحاناتك وأنسى الكلام دا مؤقتا وانا اوعدك بعد الامتحانات امشي معاك أي فجة لمن نلقى أهلك واحسن حاجة تلقاهم وانت ناجح وداخل الطب امكن يكونوا ناس مساكين وظروفهم كعبة وصعبة ومحتاجين ليك بعدين تنفعهم لمن تبقى دكتور
محمد كلام شيخ العاقب دا اداهو دفعة معنوية حبة وقال ليهو هسي امشي علي البيت يا ولدي وذاكر مذاكرتك كأنك ما سمعت شي ولا تفكر في الكلام دا نهائي الا بعد تنتهي من الامتحانات أقل حاجة الناس الربوك وما قصروا معاك ديل تكافيهم بنجاحك آ ولدي
محمد ابتسم ابتسامة صفراء وفات البيت مشى قعد مع حاج حسن وحاجة بدرية واتونس معاهم زي كل يوم ولا حسسهم بشي ولا جاب ليهم سيرة الموضوع كأنو ما سمع بيهو ولا عارفو وبعد كمل ونستو معاهم شال كتابو ودخل الاوضة حقتو وقعد يذاكر الصباح ما كان عندو امتحان قال لحاجة بدرية داير لي شاي يمة لاني داير اساهر لحدي صلاة الصبح مشت سوتو ليهو وجات قعدت جمبو قالت ليهو الله يعدل طريقك ويسهل امورك يا ولدي وما تشيل هم ارادة الله فوق كل شي
قال ليها يمة امشي نومي وانسي الموضوع دا هسي انا ما داير افكر فوقو وياكي أمي ودا أبوي لا عندي غيركم ولا بعرف غيركم الا اذا انتو ما دايرني ساي لكن انا حاليا ما عندي أي هم غير انجح وادخل الطب واحقق ليكم أملكم فيني انتو ربيتوني احسن تربية وانا لو ما انتو اكانت اكلتني الكلاب ساي في الخلاء داك ولا كان في حاجة اسمها محمد هسي
حاجة بدرية دمعتها قريبة خلاس قلدتو وبكت زين وقالت ليهو والله ولدي وربنا يعلم ويشهد يوم واحد ما حسيت انك ما ولدي ولا فرزتك من علي وعمر قال ليها عارف وانا بسأل الله يقدرني علي جزاكم بس
الصباح بعد محمد مشى صلى جاء من الجامع رقد نام لحدي صلاة الضهر ومشى قعد في الدكان لحدي ساعة الغداء والعصر جاء تاني قعد يذاكر
عايدة كانت قاعدة معاهم ما فاتت وكل مرة كانت بتجي لمحمد شايفاهو الليلة شادي حيلو شديد علي المذاكرة قالت ليهو اريتني بحالك يا محمد لو فاهمة وشاطرة زيك والله ولا بذاكر
ضحك وقال ليها أحمدي ربك بس والله انا حالي والانا فيهو وماشي علي ان شاء الله ما يبقى عليك ومالك انتي هسي عشان انا قاعد اذاكر كتير وللا شنو ؟
قالت ليهو انت مفروض ولا يمتحنوك زاتو
قال ليها اسحريني عليك الله والله انا لو ما جيت الاول ياكي السحرتيني
قالت ليهو في زول بسحر روحو ؟
سكت ما رد عليها عارفها بتحبو وهو زاتو بقى في الايام الاخيرة دي بعد اتعود علي قعادها معاهم زي البميل ليها كدا ابتسم وقال ليها فوتي خليني اذاكر
بعد فاتت ما ذاكر ودخل تاني في نوبة التفكير والاسئلة ديك الجاتو ساعة كان في الخلوة وسرح عينو في الكتاب يقرا ويقلب فيهو لكن بالو بعيد بعد ما يقلب الصفحة يلقى نفسو زي الما قراها يرجعها تاني . اتكررت معاهو الشغلة دي اكتر من مرة وعرف نفسو ما قادر يستوعب قام طوالي خلى المذاكرة ومرق فات قال يغير جو شوية فات تاني لعاطف في البيت حقهم
عاطف ما صدق زاتو لمن تاني محمد جاهو قال ليهو اليومين ديل انت ما شديد يا محمد انت داير تصاحبني وللا شنو هههههههههه
محمد قال ليهو غلطان انا الجيتك
قال ليهو لا لا والله بهظر معاك ياخي انت مالك زول قفلة كدا ما يهظروا معاك وللا شنو ؟
محمد قعد معاهو شوية وقال ليهو قوم ارح ناخد لينا لفة شوية مرقوا السوق وشربوا ليهم جبنة هناك ورجعوا أي واحد فات علي بيتهم
