#آمال_وآلام 19و20
مجاهد يوسف
محمد اتلفت علي الزول بسرعة وقال ليهو جابر ؟ يا سلاااااام ياخ والله دي فرصة سعيدة ياخ
- كيفك بالله يا دكتور وكيف امورك والجابك الجزيرة شنو ؟
- جيت رفاعة وقاعد فيها لي كم يوم وعندي جماعة اهلي في الحصاحيصا مشيت اخدت لي معاهم يومين انت اخبارك شنو ولقيت اهلك كويسين ان شاء الله
- والله لقيتهم بخير الحمد لله وان شاء الله انت برضك تلقى اهلك بخير ياخ وسامي كيف ومحمد عمر وناس كسلا
- كلهم تمام وبسلموا عليك وانت ماشي وين كدا ضارب الشرق اوعى تكون تاني شردت
- ههههههههههه شردت شنو ياخ تاني ما بشرد ومارق في تمبول عندي شغلة هناك ماشي اقضيها أكان ما عندك حاجة ورح معاي
- انا حدي رفاعة قاعد افتش لاهلي وبديها كم يوم لو ما لقيت خبر عنهم احتمال احتمال اجيك في تمبول لو بتقعد فيها فترة
- اسبوع وبالكتير اسبوعين دا لو أتأخرت ياخ يللا معاي وهناك برضو نقعد نفتش ليهم ونسعل هناك احتمال نلقى زول بعرفهم
- انت امشي قدامي واسأل برضو عارف القصة كلها ما يحتاج اوريك وان شاء الله ربنا يسهل امورنا وامورك
قبل يصلوا رفاعة وفي الطريق محمد حكى لجابر عن الصادق وحاجة ام سلمة امو وعن حاجة النعمة وحاج صالح وقال ليهو ديل كلهم هسي بقوا لي اهل وجابر اتكيف من كلامو دا وقال ليهو والله انت ود حلال وربنا راضي عليك وان شاء الله بتلقى اهلك انا واثق من الكلام دا . لمن وصلوا رفاعة جابر فات معاهو القهوة واتعرف علي الصادق وقدر ما الصادق مسك فيهو ابى يقعد وقال ليهو وانا راجع بجي غاشيكم عرفت القهوة وفات منهم
في عمك كبير في السن الصادق بعد جابر فات قال لمحمد تعال اعرفك بالزول دا
حاج اللمين ود عبد القيوم راجل طويل اخدراني الطيبة باينة في ملامحو متلفح بتوبو وقاعد في القهوة معاهو اتنين في نفس عمرو اصحابو محمد جاء سلم عليهم والصادق قال ليهو دا الدكتور محمد يا عمي اللمين الكلمتك عنو
حاج اللمين بعد سلم عليهو ورحب بيهو عاين فيهو مسافة جوة عيونو لمن محمد نزل عينو وعاين في الصادق بتساؤل والصادق لولح ليهو راسو يعني اصبر اصبر
حاج اللمين قال لمحمد اقعد يا ولدي واصلو ما نزل عينو من محمد ويغمض مسافة وتاني يعاين فيهو لمن الاتنين المعاهو استغربوا وقالوا لحاج اللمين في شنو يا حاج ومالك بتعاين للزول دا كدا قال ليهم لا لا ما في شي وكورك للصادق قال ليهو تعال واستأذن من القاعدين معاهو وساق الصادق ومحمد ديل علي جنب وقال ليهم لو ما بخاف الكضب الولد دا ما من جهتنا دي وبشبه لي ناس حلة غايصة كدا مشيتلها قبال كم سنة والزمن داك مشيت لبكاء عندنا صاحبن لينا فوقها اتوفى الله يرحمو صاحبك وللا اخوك دا باقي لي شبهم فوقو
حاج اللمين دا صاحب حاج احمد ابو الصادق وزول حكيم خلاس ومشهور بالفراسة وبمعرفة الانساب وبصير وارث البصارة من ابوهو وغير البصارة كمان أكان قصاص درب ما في زول أكان بجيهو حرامي الا جاهو ويقص ليهو دربو لمن يوصلو ليهو وقالوا مرة قص ليهو درب واحد بعد ما سرق دخل السوق وركب ليهو عربية مرقتو في البنطون بارا ليهم الدرب وبعد نزل قصاد الحصاحيصا ما فك ليهم دربو لمن وراهم وقفتو في شارع الظلط وقال ليهم الحرامي دا ركب عربية ماشة علي جهة مدني
الصادق كان عارفو بعرف الزول من وشو ساي ويقول ليهو انت اهلك ناس فلان بطلع منهم تب وبعد ما محمد فات الحصاحيصا جاء حاج اللمين والصادق وراهو قصتو كلها وجاء اليوم عشان يلاقيهو
محمد قال لحاج اللمين والحلة دي يصلوها كيف يا عمي أنا هدا دربي ماشي عليها قال ليهو اصبر اصبر ما تتضايق في واحد منها انا بعرفو تب بجي رفاعة طوالي ولمن يجيها اكان ما غشاني ما بفوت منها انتظر كم يوم لو ما جاء بوريك تمشي ليها كيفن
محمد فرح فرحة شديدة بكلام حاج اللمين دا وليهو مراد يقوم هسي يمشي لكن حاج اللمين قال ليهو لازم نتأكد أول من صاحبي دا وبعدين الفيها الخير الله بسويها ما تشيل هم يا ولدي
محمد مسكتو ام هلا هلا والقعدة غلبتو وحاج اللمين ابى يوريهو اسم الحلة عشان داير يسعل صاحبو أول لو في حلتهم واحد رايح ليهو ولد وما داير محمد يمشي يتلهمن ساي الا بعد يتأكد بعدين يطلع كلامو ما صاح ينحرج
القعدة مع الصادق في القهوة غلبت محمد تب وقال للصادق انا ماشي البيت وقبال يصل البيت جاء راجع لقى حاج اللمين فات علي أهلو ولفلف في رفاعة لمن فتر وجاء للصادق وبرضو ما قدر يقعد ما عارف روحو زاتو مالو لا قادر يقنب في القهوة ولا قادر يفوت البيت ولحدي بالليل
الصادق قفل القهوة وقال ليهو انت يا زول مالك الليلة كدا ما دار تهجس وتبرد من سمعت كلام عمي اللمين
قال ليهو يا الصادق اخوي والله الصبر غلبني تب والموضوع دا تعبني بالحيل وفوق دا كلو اشتقت لأمي بدرية ياخ وداير ارجع ليها سريع سريع خليتها عيانة ما عارف الحاصل عليها شنو
- ما تخاف الله كريم ورحيم بيها وعليها ما تشيل همها ساكت وان شاء الله يطلع كلام عمي اللمين دا صاح عشان تعرف اهلك وترتاح زاتو من الجهجهة دي مع اني والله ما بدور فوتك مننا
دخلوا البيت والصادق ورى امو كلام حاج اللمين قالت ليهو بركة تب وكلام عمك اللمين دا أكيد صاح الزول دا من قمنا عارفنو بصير والبقولو كلو صاح وحاصل لا بكضب ولا بغش ولا بقول ليهو كلام اكان ما خبرو واتأكد منو
كلام حاجة ام سلمة فرح محمد زيادة وطمنو شديد وشعر انو بينو وبين اهلو شعرة بس ومسعلة أيام ويلقاهم وحاول في الصادق اكان يمشوا لحاج اللمين يحنسوهو امكن يوريهم الحلة ويمشي ليها ان طلع اهلو فوقها بركة وان ما طلعوا فيها يجي لي تفتيشو تاني من اول وجديد
الصادق قال ليهو عمي اللمين دا كلمتو واحدة ولو شنو داك ما بوريك الا بعد يتأكد عشان كدا اصبر ياخ واحتمال بكرة القريبة دي صاحبو المن الحلة ديك يجيهو ويجيبو معاهو ويجيك ما تشفق وقول يا رب
محمد قال ياااااااااااااا رب
