#آمال_وآلام 13و14
مجاهد يوسف
محمد رجع المفتاح لعلي وقال ليهو ما في غيرك يا علي بشيل الشيلة وانا غلطتي مفروض اسوقك معاي السوق وأوريك التجار وما صاح نشتغل مع تاجر واحد عشان ما يحصل الحصل دا وهسي مافي مشكلة الحمد لله انا معاي قروش وبكرة من الصباح نمشي نعبي المحل وبقيف معك كم يوم لحدي ما ارجع كسلا
حاجة بدرية قالت ليهو هوي كسلا شنو البترجع ليها تاني خلاس الجامعة وقبل كم يوم عاطف جاء هنا وقال التقديم فتح مالك ومال كسلا بعد كدا
محمد أول مرة يشتغل بعيد من الدكان ولمن الله فتحها عليهو وجاب معاهو قروش من شهر واحد بس كان فرحان شديد وقال دا والوقت البقدر اسدد فيهو للناس الطيبين ديل لو القليل من جمايلهم علي عشان كدا ما ريح نفسو في الشغل نهائي وكان شغال ليل نهار حتى لمن يقفل الدكان كان بشيل معاهو الدفاتر وينظم في الحسابات لمن محمد عمر شاف انو دا زول بستاهل كل خير والعملو ليهو ما عملو واحد غيرو في الناس الاشتغلوا معاهو كلهم عشان كدا لمن قال ماشي القضارف فوق الكان متفقين عليهو اداهو وزادو عشان يغريهو انو ما يخلي الشغل معاهو
محمد قال لامو انا بقدم لكن بجمد السنة دي يمة
قالت ليهو والله لو اقيف انا في الدكان ما بخليك تجمدها
- مافي حل والله لازم اجمدها أبوي قبال يموت قال لي انتي واخواني أمانة في رقبتك عشان كدا والله ولا بكضب عليك السنة الاولى دي انا ما داير أقراها
- من دخلت المدرسة ونحن أملنا إنك تدخل الطب وتبقى دكتور مالك يا ولدي بعد دخلت داير تخيب أملنا
- أملك انا ما بخيبو والله لكن الظروف براك شايفاها لازم الواحد يشتغل والجامعة ما طايرة ملحوقة كلها ياها السنة الاولى دي واعتبريني عدت وامتحنت تاني
- لكن تضيع ليك سنة من عمرك ساي
- ما ساي والقال منو ساي انا بشتغل فيها وبعمل الما بنعمل ان شاء الله
بكت حاجة بدرية وقالت ليهو غايتو انا ما راضية والله وانت علي كيفك لكن لو علي الدكان انا بقنب فيهو
في مشكلة تانية محمد ما كان منتبه ليها انو علي السنة دي ممتحن الشهادة ولازم يقرأ بعد جاب البضاعة وملا المحل اتذكر انو المدرسة قربت تفتح واتذكر علي اخوهو انو لو قعد في الدكان ياهو الطالع من المدرسة قام فات لشيخ العاقب وقال ليهو وريني دي يحلوها كيف انا بجمد السنة وبمشي اشتغل لكن علي لازم يواصل دراستو ومافي زول بقعد في الدكان وعمر برضو لازم يقرا
شيخ العاقب قال ليهو وانا مشيت وين؟ أنا البقعد ليك في الدكان والخلوة بعد العصر بدرس فيها وبجيب ليها شيخ يدرس طلبة الصباح ما تشيل هم انا بقعد في الدكان وعلي دايرو بعد العصر يجي يقعد لحدي صلاة المغرب بس وبكدا المشكلة اتحلت
محمد جمد السنة فعلا وبقى شغال في كسلتو مع محمد عمر والشغل ماشي معاهو زي العسل ومحمد عمر عشان متكيف منو ودايرو يشد حيلو وما يفوت منو عمل ليهو نسبة في المبيعات وبقى يطلع ليهو مبلغ محترم وكويس من شغلو
ونسى كلو كلو حكايتو وحكاية اهلو نهائي ما ختاها في راسو وقدر ما يتذكرها يحاول بقدر الامكان تناسيها زي المرتاح كدا مع انو ما مرتاح وداير يعرف اهلو منن ووين لكن شايف انو في الاول يرد الجميل لحاج حسن وحاجة بدرية ويتحمل الامانة الفي رقبتو لمن حاج حسن قال ليهو قبل يموت ابقى عشرة علي امك واخوانك
وفي يوم محمد قاعد في البيت جاء جابر واليوم داك كان زهجان زهج شديد وكان مرتاح لمحمد شديد وبريدو قعد معاهو وقال ليهو ليه انت ما سألتني البكاني شنو زمان محمد قال ليهو والله انا قلت اخليك براحتك احتمال دي حاجة خاصة بيك ما داير زول يعرفها عشان كدا ما سألتك
جابر قال ليهو أنا من الجزيرة من قرية كدا غايصة تمش لمن تفتر لا وراء حتين تصلها وما عندي اي مشكلة بس شردت من أهلي . محمد قعد يضحك وقال ليهو شردت من أهلك عديل ؟ والشردك منهم شنو ؟ قال ليهو دي قصة طويلة بقصها ليك مرة تانية ما هسي بس هسع داير اسألك عن حالك ومالك كاتل روحك في الشغل كدي زي البتربي ليك في ايتام ؟
محمد تاني ضحك وشاف في جابر دا انو راجل وفيهو نخوة مع انو قال ليهو شرد لكن الظاهر عليهو ود حلال وطيب محمد قال ليهو قصتو كلها اختصرها ليهو سريع سريع وجابر اول حاجة ما صدقو لكن محمد طلع ليهو الجريدة وقال ليهو اقراها وختها لي في جيب الشنطة بعد تنتهي منها ومرق علي الشغل
جابر قرا قصة محمد كلها وبكى علي حالو وقال سبحان الله ناس يفتشوا علي أهلهم ومناهم يلقوهم وناس بشردوا من أهلهم برا سبب
جابر اليوم داك ما مرق الشغل وقعد في البيت لمن جاء محمد وسامي قام قال لمحمد ورح ناخد لينا لفة شوية ونجي مع انو محمد جاء تعبان لكن مرق معاهو قعدوا ليهم في قهوة وجابر قال ليهو عارف يا محمد أنا قبل اقرا قصتك دي اكنت قنعان من اهلي وما داير ارجع ليهم ولو سألتني قبيل عن قصتي اكنت داير اكضب ليك كضبة من راسي لكن هسي بقول ليك الحقيقة انا والله شردت قلة أدب مني ساكت وكنت ببكي لمن بتذكر امي لأنها كانت عارفاني داير اشرد وقالت لي لو شردت ما عافية ليك انا ما اشتغلت بكلامها وبرضو شردت منهم وسبب الشردة ابوي دقاني انا وطوالي بدقني لاني قليل ادب لا بحترم زول ولا في زول مالي عيني ومرات ابوي زاتو بلامضو انا زول كعب معروف في الحلة لكن والله بعد عرفتكم اتغيرت شديد خاصة انت يا محمد الله بعلم كم مرة انا بحاكيك داير ابقى زيك ولمن عرفت قصتك اتأسفت علي حالي وانا داير ارجع اهلي ياخ
محمد قال ليهو خير ما عملت واحسن حاجة امشي لامك رضيها عليك وخلي ابوك يسامحك رضا الله مربوط برضا الوالدين يا جابر
جابر اليوم التاني من الصباح جهز شنطتو وبدا يصفي في شغلو عشان يفوت وقال لمحمد الا تمشي معاي حلتنا محمد اعتذر ليهو وقال ليهو لكن بوعدك مرة تانية غير دي بفوت معاك لو جيتنا هنا تاني
