#آمال_وآلام 15و16
مجاهد يوسف
كلام المرة ست الشاي لمحمد دا ما رماهو وراهو ومشى البيت قعد يفكر في طريقة يفتش بيها علي اهلو ما يعتمد علي نشر قصتو في الجريدة بس ، خاصة انو جمد السنة الاولى ما داير يقراها والدكان شغال فيهو شيخ العاقب وما مقصر لانو آخر مرة رجع القضارف لقاهو ماشي تمام التمام حتى ما احتاجو منو لقروش ممشين حالهم كويس وشيخ العاقب راجل غير أمين كان بفهم في الشغل كويس ولسانو وكلامو سمح مع التجار ومع الزباين وبقى ما شايل هم الدكان والبيت وقرر في السنة دي مع شغلو ما يقيف من التفتيش ويعمل العليهو
جاء الصباح فتح الدكان جاب جبنتو شربها وانتظر لمن سيدو جاء وقال ليهو أنا داير أمشي رفاعة يا حاج محمد
- ماشي متين وعندك فوقها شنو رفاعة انت أهلك موش من القضارف ؟
- المن القضارف ديل أهلي الربوني وانت عارف القصة كلها وسبق وحكيتها ليك
- يعني قررت تفتش لاهلك موش ؟
- نعم وداير امشي رفاعة وبعد رفاعة بمشي ألف في البطانة دي لحدي ما اصل أهلي واكان ربنا سهل ووصلت ليهم خير وبركة ولو ما وصلتهم بكون عملت العلي وفتشت ليهم
- ربنا يسهل امرك يا محمد ويجمعك بيهم بس بتغيب كم يوم
- والله ما عارف على حسب احتمال قريب شهر واحتمال أقل
- امش انا لي كم يوم شايفك قاعد تفكر كتير واظنك بتفكر فيهم والمحل دا محلك وراجي جيتك في اي وكت
- أنا منظم ليك كل شي وبوريك تعمل شنو ولو جبت ليك واحد في محلي دي بوريهو يعمل شنو وكيف
- لا لا ما بدور لي زولك غيرك معاي وبنتظرك لمن تجي وقبال تجي كنت شغال فيهو براي وما تخاف نسبتك في البيع ماشة واعتبر الشهر دا اجازة بمرتبها كأنك شغال ولو احتجت لي اي شي انا حاضر
- خيرك سابق ما بتقصر وانا بكرة ماش
- خير وبركة وابقى عشرة علي روحك
محمد مشى البيت لملم هديماتو في شنطة وشال ليهو هدايا لاخوانو وامو بدرية وكلم سامي وفات وصل القضارف قعد ليهو فيها كم يوم شاف فيهن المحل واتونس فوقن مع امو بدرية ووراها الداير يعملو كلو وقالت ليهو الله يعدلها عليك يا ولدي امش وان شاء الله المرة دي تلقاهم وتجينا مبسوط وانا والله ما واجعاني الا عدم مشيك للجامعة بعد ما قبلوك فيها لكن نقول شنو الله اراد كدا ونحن السبب
محمد قال ليها فعلا انتو السبب لكن السبب في دخولي ليها ما في تجميدي للسنة والحمد لله الله وفقني والمحل وقف وهسي ما محتاجين لينا لزول وانا باكر من الصباح بسافر اعمل العلي والباقي علي الله
صباح اليوم التاني بدري مشى علي الدكان بعد جهز غيارو وشنطتو وقعد مع شيخ العاقب زي ساعة ورجعوا البيت فطروا وشربوا شاييهم وقبال يمرق جات هادية بت خالو عبد الله داخلة شايلة شنطتها وكان معاها عبد الله أبوها زاتو وكان زعلان في سلامو وكلامو الزعل أكان ظاهر وقال لبتو يللا نمشي
بدرية قدر ما مسكت فيهو أبى يقعد ولا اتكلم معاها ولا سلم علي محمد وقال لبتو قومي رجعاكي معاي والبت أبت قام دقاها وساقها معاهو وديل مستغربين ما عارفين في شنو زاتو ولا خشمهم ما فتحوهو لكن بدرية مشت وقفت ليهو قدام العربية وقالت ليهو والله ما توريني في شنو يا عبد الله ما أزح من قدام العربية ولا بخليك تفوت
قال ليها البت دي ابت تمشي المدرسة هناك والسنة دي ممتحنة وقالت الا تقرا معاكم وقالت لي محمد ما قاعد في البيت وبقرا في الجامعة ودايرة تقرا معاكم هنا وانا جبتها لكن لمن لقيتو قاعد ما دايرها تقرا زاتو ولا تقعد معاكم
البت تبكي ساي ومحمد سمع كلامو وخشمو ما فتحو وبدرية قالت ليهو محمد مالو عمل ليك شنو عشان ما تخلي بتك تقعد معاي قال ليها دا مقطوع من شدرة وما معروف ود منو ولا صاح تقعدوهو معاكم ومفروض يمشي يفتش اهلو وين البقعدو شنو تاني معاكم هنا وانتو عندكم شنو ياهو دكانكم الما نافع دا
قالت ليهو القال منو الدكان ما نافع ومتين جينا قلنا ليك ادينا قروش
قال ليها جاني العاقب دا وراني كل شي وطلب مني اديكم قروش لكن أنا أبيت طالما بتصرفوهن علي الاغراب خليهو يمرق يشوف ليهو شغلة خلاس ما قصرتو معاهو
قالت ليهو والله لو ما محمد أكنا ضعنا وكتر خيرو ساب الجامعة أبى يمشي ليها وشغال زي العجب ملان قروش وما دايرين لينا منك حاجة ومحمد ولدي زي علي وعمر وواحد وان ما عاجبك تاني ما تجينا ولا تورينا وشك ما بندور منك حاجة
ومحمد ساكت ساي خشمو ما فتحو معاهو ولا كأنو الزول دا قال فيهو كلمة وعبد الله ساق بتو وفات ومحمد اتلفت علي شيخ العاقب قال ليه انت مشيت للزول دا يا مولانا
شيخ العاقب انحرج وقال ليهو والله انا لو قايلو كدا ما كان فت ليهو وانا غلطان ثم غلطان وانا مشيت ليهو قبال انت تمشي تشتغل قلت لو فيهو خير يساعد لكن طلع ما فوقو خير اعفوا لي
محمد قال ليهو ما في عوجة والحمد لله عرفنا الفيهو وعرفنا نيتو وربنا ما يحوجنا ليهو تب تب
بدرية بعد كلام ولدها دا ضغطها اترفع وصارة وشها وقدومها وزعلانة علي محمد
ومحمد قال ليها انا ما ماشي اليوم بأجلو لحدي بكرة يمة ما تشتغلي بكلام خالي دا بكرة الايام بتوريهو
