#آمال_وآلام 21و22
مجاهد يوسف
جابر قال لمحمد دايرك تمش معاي تمبول ضروري لقيت لي واحد والله بشبهك شبه لمن قايلو دا انت زاتك لكن داك طويل شوية وأكبر منك
محمد قال ليهو لقيتو وين دا وكيف احكي لي
- بعد ما وصلت تمبول بيومين مشيت السوق وهناك جاء الزول القلتو ليك دا ماشي وانا لمن شفتو انخلعت عديل وما اكضب عليك نسيتك كلو كلو وشكل الزول دا ما غريب علي انا متأكد اني بعرفو وشفتو قبل كدا وكوركت ليهو بس اكان زي المستعجل كدا وقف لي وقال لي مرحب قلت ليهو معليش بس انا بعرفك ياخ وما عارف لاقيتك وين وهو عاين فيني قوي وقال لي ما حصل شفتك ولا بعرفك ويخلق من الشبه اربعين انت شكلك مشبهني ساكت وفات في طريقو وانا بعد فات قعدت احك في راسي والله ما غريب علي وحكمة الله نسيتك كلو كلو ما عارف كيف وقعدت اتذكر في الزول دا انا شفتو وين ومن اتذكرت كسلا ساي اتذكرتك والله اكان ما أخوك أخوك ياخ دا شبه مبالغة
- أها والزول دا وين هسع
- الزول دا لو ما من تمبول من حلة جمبها وانا لي يومين بفتش ليهو والله ما لميت فوقو لكن بجي يوم السوق أكيد ويوم السوق بعد بكرة دايرك تمشي معاي وانا متأكد بنلقاهو
- والله بتبالغ يا جابر ياخ اكان على الاقل تعرف اسمو ياخ وللا من وين
- ياخ والله لحكمة بس انا مشيت منك وبعد يومين بس نسيتك كلو كلو أها دا اسموهو شنو وهسي مافي حل غير تمشي معاي تمبول بنلقاهو اكان الله هون
- نعم لحكمة ولخير ان شاء الله . خلاس نقعد اليوم دا هنا عشان الصادق دا ما معاهو زول في القهوة واحتمال الزول المعاهو يفوت اهلو وبكرة نمشي تمبول
الصادق قال ليهو خطوة حلوة انتو امشو تمبول وان شاء الله الزول صاحب عمي اللمين يجي برضو اليوم وللا بكرة والمشكلة دي تنحل
محمد بعد كلام جابر وكلام حاج اللمين اتأكد انو قرب من أهلو شديد وكان فرحان بس في حاجة معكراهو وقدر ما حاول يتهرب منها أو يزحها من راسو ما قدر وكل مرة تجيهو في بالو يشغل نفسو منها كان حاسي انو امو بدرية ما شديدة والعياء تاورها تاني وقلقان عليها شديد بس ما بقدر يرجع الا بعد يصل ليهو لخيط يريحو والايام جارية سريعة والزمن ماشي لازم ينجز سريع سريع قام ساب جابر مع الصادق في القهوة ولا كلمهم وفات لحاج اللمين في بيتو دخل وسلم عليهو وقعد معاهو قال ليهو شوف يا عمي وحكى ليهو حياتو كلها من قبال يعرف انو حاج حسن وبدرية ما أهلو ولحدي ما هو قاعد معاهو هسي وقال ليهو دايرك توريني الحلة المنها اهلي ديل وخليني امشي ليهم انا ما عندي وكت ولا قادر انتظر
حاج اللمين المرة دي بكى عديل ما زرزر بس كان زول حنين خلاس وبكاهو دا حير محمد وقال ليهو ما تشفق علي انا واشفق علي المرة الربتني وخليتها عيانة هناك وراجية جيتي ليها بفارق الصبر واشفق علي حاجة ام سلمة وولدها الصادق الدخلو بيتهم وعدوني واحد منهم مع انهم ما بعرفوني الا من ايام واشفق علي جابر صاحبي الساب شغلتو وجاء جاري من تمبول عشان شاف ليهو واحد بشبهني وريني بس الحلة القلتها لينا وتاني انا براي بتم الباقي ان لقيتهم اهلي خير وبركة وان ما اهلي بشوف تاني اعمل شنو
حاج اللمين قال ليهو انت قايل انا المبكيني شنو ؟ أنا ببكي عشان شايف لهفتك علي اهلك وانا ما قادر اعمل ليك حاجة لكن المتأكد منو تمام انو اهلك في الحلة القلتها ليك دي وانا والله ما عندي فوقها صاحب ولا شي قلت ليكم كدا ساكت عشان تصبرو لمن اتذكر الحلة اسمها شنو ومن يومداك انا قاعد اتذكر فوقها والله نسيتها كلو كلو ولا عارف اسمها شنو الحلال كتيرة والزمن طول وانا والله الحلة دي غلبتني تب تب اتذكر اسمها وانا كبرت خلاس يا ولدي ما تلومني وتاني قعد يبكي
محمد بكى علي حالو وبكى علي حالة عمو اللمين دا وقال ليهو ولا يهمك يا أبوي انت عملت العليك والزول ما بيدو شي كلنا بننسى وكتر خيرك يا ابوي ما قصرت تب والله وانا بكرة من الصباح بفوت تمبول افتش الزول القالو لي جابر وان شاء الله القاهو وان ما لقيناهو بفتش الحلال ما عندي حل تاني غير دا
حاج اللمين قال ليهو الله يعدلها عليك يا ولدي وانا بحاول اتذكر الحلة دي بأي طريقة وبوري الصادق اخوك وانا زاتي بمشي معاكم ليها
