#آمال_وآلام 11و12
مجاهد يوسف
محمد مرق في الليل داك جاب ليهو عربية وقبل يمشي بدرية قالت ليهو أبقى عشرة علي أخوانك يا محمد يا ولدي ما عندهم غيرك ياكا أخوهم وأبوهم ما تفوت منهم أكان انا ما مرقت من المرضة دي لكن ما باقي لي بمرق منها
محمد بكى وقال ليها دا كلام شنو يمة البتقولي فيهو دا انتي مالك هسي ما كويسة ودي حاجة بسيطة ما تقولي كدا
ساق أمو الدكتور واسعفوها ونامت للصباح ومحمد من قدامها ما قام لمن الصباح فتحت لقتو قدامها ابتسمت وديمعاتو تترب نزلت قال ليها الله لا يحرمني من ابتسامتك دي يمة علي ومحمد في البيت وعلي فاتح الدكان محمد ابى يخليهم يمشوا معاهو قال ليهم ما تخلوا البيت فاضي وقعدوا في المستشفى يومين ومحمد مشى للدكتور قال ليهو أمي دي عندها شنو قال ليهو كويسة عندها حصوة أنا بديكم علاج واحتمال ينزلها لكن لو ما نزلت بتحتاج لعملية تفتيت ما تخاف ساي
محمد فرح لمن لقاها حصوة كان خايف من السكري ومرض ابوهو وعمو
رجعوا البيت وبقى في الدكان مع علي وكل ما يحين وقت الدواء يجيها يديهو ليها
الدكان ماشي كويس شايل روحو شوية شوية لكن ما فيهو وفر عشان كان فاضي ومحمد كل الببيعو بجري بيهو السوق يسدد ويجيب بضاعة لحدي ما نعنش حبة لكن ما المطلوب لانو لمن ودى حاجة بدرية الدكتور صرف منو
بالليل قاعد مع روحو يفكر في الحال العليهم وقال هسي لو أمي دي احتاجت لعملية والعملية دايرة قروش أجيبها من وين والدكان قدر الفيهو ما بعمل حاجة ولو شلت منو قروش بقع أحسن حاجة انا أخلي علي اخوي شغال فيهو وأمرق اشوف لي شغل
تاني فكر يشتغل شنو لو لقى شغل بمرتب ح يقعد لاخر الشهر حتى ياخدو وأكيد ما ح يكون كتير وبكون قدر مصاريفو من مواصلات لفطور وملابس دا لو لقى وظيفة
فكر وفكر لمن نام
الصباح مشى صبح علي امو لقاها كويسة ما عندها عوجة مشى فتح الدكان وقعد لمن جاهو علي خلاهو فوقو وفات الخلوة لشيخ العاقب قال ليهو داير امشي اشوف لي شغل شيخ العاقب قال ليهو الدكان مالو يا محمد
قال ليهو الدكان يادوب بشيل مصاريف البيت وعليهو ديون بقى ما زي زمان بعد انا جيت من الخرطوم لقيتو فاضي وممشيهو بالدين بس لو سحبت منو قروش بقع وانا خايف امي دي تحتاج لعملية عندها حصوة تاعباها لكن هي ما بتظهر لي
شيخ العاقب قال ليهو عبد الله أخوها تاجر غنيان وملان قروش كلمو يدعمك شوية
قال ليهو ياخ عبد الله دا الظاهر عرف اني ما ود اختو لانو لاقيتو في الخرطوم اول ما نزلت كوركت ليهو يا خال يا خال عاين فيني ساي وفات السلام ما قالوا لي
شيخ العاقب قال ليهو امشي علي دكانك والفيهو الخير ربنا بسيويهو
وشيخ العاقب بعد محمد فات الدكان فات لبدرية في البيت وسألها من عبد الله أخوها قالت ليهو اي عرف وزعل وساق بتو مننا لانو كان دايرها لمحمد لكن بعد عرف الحقيقة زعل مننا وفات وقال ما بعرسها ليهو
شيخ العاقب اليوم التاني فات لعبد الله في بيتو كان في الخرطوم وما كلم لا محمد ولا بدرية قعد معاهو واتكلم معاهو كتير لكن عبد الله قال ليهو الناس ديل ما عندي بيهم شغلة وخلي الولد اللموهو من الشارع دا ينفعهم انا داخل علي حلف ما عندي بيهم شغلة قال ليهو أختك عيانة ودايرة عملية قال ليهو أنا حالف قلت ليك
فات لأخوانها التانيين لقاهم حالتهم زي الزفت ما فيهم الا عبد الله العندو قروش وعبد الله مع اخوانو التانيين كعب ولا شغال بيهم رجع ساي
محمد لمن عرف شيخ العاقب فات ليهم زعل وقال ليهو غلطان انا الجيت شاورتك وانا قبل كدا قلت ليك الناس الربوني ديل مستعد اعمل المستحيل عشان ارد ليهم لو شوية من جمايلهم تجي تمشي تكلم عبد الله واخوانها وتطلعني ما راجل
شيخ العاقب قال ليهو انا كان قصدي اساعدك يا ولدي ما تزعل مني الله بعلم بالنوايا
محمد اعتذر ليهو وفات البيت بعد المغرب جاهو عاطف صاحبو قال ليهو اها يا دكتور التقديم للجامعة
محمد قال ليهو ما هسي وانا والله حاليا مشغول شوية وعندي حبة مشاكل واحتمال السنة دي ما أقدم ولو قدمت بجمد السنة
عاطف ما فات من محمد الا لمن وراهو الحاصل كلو قال ليهو انا عندي ليك حل لكن مؤقت وتوعدني انك تواصل دارستك قال ليهو قول لي حلك
قال ليهو عندي اخوي الاكبر مني شغال في كسلا ملابس وبضايع بشتري وببيع وبودي الخرطوم واسمرا وخشم القربة وشغال مبسوط لو دايرني اكلمو ليك بكلمو تشتغل معاهو لحدي الجامعة ما تفتح وهو بعرفك
محمد قال ليهو الليلة قبال باكر والله يا عاطف ما عارف اشكرك كيف في دي لو خدمتني الخدمة دي
عاطف مشى البيت وشال الرقم وجاء لمحمد وقال ليهو ورح نتصل عليهو نكلمو مشوا السوق دخلوا محل اتصالات وكلم أخوهو قال ليهو جدا خليهو يجيني من بكرة
محمد جاء كلم امو بالحال كلو وقال ليها انا ما داير افوت في وكت زي دا لكن الحال بجبر أدعي لي ربنا يسهل لي دعواتك بتفتحها علي
بدرية دعت ليهو وبكت زيييين قال ليها مالك بتبكي هسي لو ما رضيانة بمشيتي دي بخليها والله وبقعد قالت ليهو لا لا امشي بس انا خايفة تجي ما تلقاني واموت قبال اشوفك يا ولدي
