#آمال_وآلام 31و32
مجاهد يوسفمحمد وأهلو قعدوا ليهم تلاتة يوم فاتوا فيهن زاروا شيخ العاقب في الفاو واطمنوا عليهو ورجعوا في نفس اليوم محمد وعبد الله أخوهو قعدوا في القضارف وقعد معاهم جابر والباقيين مشوا ووصلوا معاهم حاج اللمين لحدي بيتو وفاتوا بهناك
عبد الله قال لحاجة بدرية نحن بنقعد معاك اسبوع وبعدو تمشوا معانا الحلة تشوفي اهلنا ويشوفوكي وتقعدي معانا هناك كم يوم
حاجة بدرية قالت ليهو انا ما بقدر امشي يا ولدي واولادي في المدرسة واكان مشيت الا أجي راجعة في نفس اليوم وما بقدر علي السفر والجية في نفس اليوم انت شايفهم براك لا بقدر اخليهم براهم ولا بقدر علي السفر
لمن وصلوا اعمام محمد الحلة أمو قالت ليهم مالن مارجعوا معاكم قالوا ليها قالوا بقعدوا كم يوم بعدين الناس ديلك برا محمد ما ببقوا لقينا حالهم مايل تب واعتمادن كلو عليهو خليهو يدبر امورو وامورهم ومعاهو عبد الله وصاحبو الجا هني معاهو ما تخافي عليهم نجيضين الاولاد ديل
محمد فات كسلا وما كلم اي زول قام الصباح بدري وقال ليهم عندي مشوار برجع منو بعدين كان عندو قريشات عند محمد عمر الكان شغال معاهو مشى ليهو شالن منو وجاء راجع في نفس اليوم
جابر عرفو فات كسلا لانو شايفو ما عندو قروش في جيبو والعندو كلهن كان اداهن لحاجة ام سلمة في رفاعة ما خلى الا حاجة بسيطة ودفعها لواحد مسكين في حلتهم
اليوم داك مرقوا سوا اخدوا ليهم لفة في الحلة وما كان معاهم لا عبد الله ولا الدفع ولاقاهم راجل عجوز سلم عليهم وقال ليهو انت ولد عبد القيوم الكان رايح مو يا ؟
محمد قال ليهو ياهو زاتو يا أبوي . الراجل سكت مسافة ودموعو جرت وقال لمحمد انت ابوك الزيو منو يا ولدي والله مافي زيو في الحلة دي كساي العرايا البكف الدمعة من العين البكاية
وبعد فات منهم محمد راقب العجوز دا لمن دخل بيتو وجابر عرف في راسو في حاجة وبعد الواطة مغربت محمد تاني اخد ليهو خفسة منهم وفات للراجل العجوز في بيتو جابر مشى وراهو وقعد برة انتظرو لمن جاء
محمد جاء مارق يبكي وقال ليهو في شنو يا محمد ؟
قال ليهو والله جيت لعمنا دا سعلتو من ابوي كلمني عنو كلام كتير وكلو سمح الله يرحمو
ومحمد شال من جابر قروش وقال ليهو بديك ليهن بعد نرجع القضارف واداهو العندو كلها ولا قال ليهو داير بيهن شنو ومحمد من الحلة ما مرق بيهن وزعن چت
بعد وصلوا القضارف ولمن الجماعة فاتوا لشيخ العاقب جابر ما فات معاهم وفات كسلا جاب ليهو قروش من الكان شغال معاهم وكان داير يملا بيهن الدكان عشان شافو فاضي وعارف محمد ما عندو قروش لكن لمن رجع لقاهم جوا في نفس اليوم سكت ساي لمن يلقى ليهو فرصة والفرصة جاتو الليلة لمن محمد فات كسلا
وجابر طوالي مشى السوق وجاب ليهو بكسي أجرو ملاهو فل بضاعة وجاء رصاها في الدكان
هو وعبد الله ومحمد لمن جاء لقى الدكان ولا بندخل من كترت البضاعة
جابر قال ليهو يمين خشمك ما تفتحو علي الاقل قلت اشارك بحاجة محمد قال ليهو انت داير مني قروش ياخ
جابر قال ليهو عيب يا محمد انا عارفك وديتها وين ووالله ما بترجعها لي ان شاء الله ربنا يجعلنا في ميزان الحسنات
حاجة السارة قالت لعباس دايرة امشي القضارف قال ليها مالك خايفة علي وليداتك وللا شنو ؟ قالت ليهو ما خايفة والله عليهم ولا شي لكن المرة الربت ولدي وبقت ليهو ام دي والله ما بنتظرها لمن تجيني هي وبمشي ليها في بيتها واقعد معاها واعرفها السوتو دا الا يجازيها فوقو الله لكن نحن مهما عملنا ما بنقدر نكافيها عليهو قال ليها والله كمان مرة طيبة الدنيا كلها فوقها وعيانة كمان احسن تمشي ليها
ساقت بتها واختها بلقيسة وفات معاهم الدفع
عبد الله اخو حاجة بدرية جاء القضارف عشان يسوق أولاد اختو يمشوا يشتغلوا معاهو فتح ليهو محل ومحتاج ليهو لناس يشغلهم فوقو واتذكر ديل قال يستفيد منهم وكان عارف محمد مافي وعارفو مشى يكوس لاهلو جاء لقى الدكان ملان بضاعة وقاعدين فوقو جابر وعبد الله ولا سلم عليهم قال ليهم انتو منو والمقعدكم في الدكان دا شنو ؟
قالوا ليهو انت المنو وبتسعل مالك ؟
ما جاوبهم ودخل علي حاجة بدرية لقاها مبسوطة واليوم داك محمد مشى لصاحبو عاطف اخو سامي ما كان قاعد وقال ليها ديل منو الفي الدكان ديل ؟
قالت ليهو ديل اخو محمد ولدي اسمو عبد الله وجابر صاحب محمد
قال ليها ومالهم قاعدين في الدكان كدي وعاملنو زي حقهم
قالت ليهو أدخل خليك منهم
قال ليها ماني داخل ولو عارفو قاعد ولا كنت جيت
قالت ليهو انت مالك مع ولدي دا ما كنت بتريدو الجدا شنو نسيت يوم جيت وقلت لي دايرو يعرس بتي
قال ليها انا كنت قايلو ولدك ما كنت عارفو غريب منكم ومقطوع من شدرة
قالت ليهو لقى اهلو الحمد لله وطلعوا ناس تمام جوا قعدوا معانا هنا اربعة يوم وما قصروا تب ناس طيبين وكريمين من جهة رفاعة
عبد الله قال ليها ما عندي بيهو شغلة وانا جيت اسوقك انتي واولادك تقعدي معانا وداير اولادك الاتنين يشتغلوا معاي
قالت ليهو اولادي ما بخلوا المدرسة انا دايراهم يدخلوا الجامعة ما بدورو شغلك
ولا محتاجين لحاجة منك شوف ليك ناس غيرهم
عبد الله مرق منها وساق علي ولدها بعيد واتكلم معاهو كتير براهم وفات
علي جاء لامو وقال ليها يمة انا بدور اشتغل مع عبد الله خالي
قالت ليهو الكلام دا ما تختو في راسك وخالك كان وين لمن احتجنا ليهو ما لقيناهو وشيخ العاقب فات ليهو في بيتو وراهو حالنا عمل لينا شنو ؟ وقال ليهو ما عندي بيهم شغلة . هسي جاي يسوقك تشتغل معاهو كمان اكان ما محتاج ليك ما جاك ودا اخوي وانا بعرفو اكتر منك تاني ما اسمعك تقول كدي
محمد دخل وجاء لقاهم يتكلموا قال ليهم في شنو ؟ امو قالت ليهو مافي حاجة بس عبد الله اخوي اكان هنا وساق علي دا اتكلم معاهو كلام كتير وحرشو يسيب القراية ويشتغل معاهو
محمد داير يسوق علي برضو بعيد من امو وقال ليها نحن ماشين السوق وبنجي ما بنتأخر
مشوا قعدوا ليهم في فجة براهم ومحمد قال ليهو يا علي يا اخوي انا القدامك دا ما تقول خلاس لقيت اهلي وبقيت ما اخوك وتاني ما عندي شغلة بيكم . وبعدين انت الشغل داير بيهو شنو انا شغال وهدا الدكان شغال زي العسل بعيشنا وبقرينا كلنا وما بنحتاج لحاجة ومسألة الشغل دي شيلها من راسك وعبد الله خالي دا زي ما قالت امي اكان وين لمن ابوي مات ؟ ما تشتغل بكلامو ولا يطمعك ساي والزول دا مصلحجي وما داير ليك الخير ولا لينا كلنا وبدل يقول ليك يا ود اختي شد حيلك عشان تطلع دكتور وللا مهندس جاء يمرقك من القراية اها دا فيهو خير ؟
علي عبد الله خالو طمعو وقال ليهو مافي حاجة غير الشغل والقروش بتنفعك وقال ليهو ورح معاي الخرطوم انا بديك دكان هناك وبالنص وقال ليهو سنة واحدة بس وللا سنتين بتبقى تاجر كبير وبتعمل ليك محلات حقاتك وبتشتري ليك بيت هناك والبدفرك ما برميك .
ومحمد قال ليهو فكر كويس في كلامي دا وانا اصلو ما بعصر عليك ولا بجبرك علي شي ان درت الشغل وما داير المدرسة تشتغل في الدكان بس لكن كلام عبد الله دا والكضب القالو ليك دا ما تختو في راسك وان ما داير الدكان ورح انا بفتح ليك محل في كسلا وبملاهو ليك بضاعة بيع وخت في جيبك ومافي زول داير منك شي انا امي واخوي ديل بقدر عليهم براي لكن اعرف انو دا كلو ملحوق بس كمل قرايتك اول وابونا حاج حسن لو عايش بخليك تمشي تشتغل ؟ علي قال ليهو لا وهو اكان دايرني ابقى دكتور زيك طوالي كان بقول لي كدا
محمد قال ليهو خلاس نحن ما ننساهو برضو ونقرا ونجتهد ونحقق ليهو وصيتو وكلامو وأملو الختاهو فينا
