#آمال_وآلام 33
الحلقة الآخيرة
مجاهد يوسف
عمر الطعنة جاتو في كتفو وكانت جرحة ساي لكن الدم كان كتير وهو ما عملت ليهو حاجة لكن لمن شاف علي متأثر وخايف عليهو عمل فيها تاعباهو عشان تبقى ليهو بتوبة ولمن وصلوا الدكتور وسألهم الضربك شنو قال ليهو وقعت لي في قزازة والدكتور نضف ليهو الجرح وربطو ليهو وفاتوا البيت والزمن داك أمهم ومحمد لسة ما رجعوا وعمر قال لعلي الموضوع دا ما يمرق مننا وندفنو علي كدي بس مافي زول يعرفو بس توعدني انك تاني ما تمشي تسكر والسكر دا لا أبوي ولا عمي الله يرحمهم ما فيهم زول سكر ولا بشبهنا وأمي لو عرفت بتموت واقفة علي حيلها
علي عرف غلطتو وقال هسي لو عمر دا انطعن في بطنو وللا في قلبو ومات أكنت ح أعمل شنو أنا وهو مات بسببي وبقت ليهو بتوبة
لمن محمد وامهم جوا وشافوا يدو عمر مربوطة قال ليهم جرحتني قزازة وقعت فيها في الكورة وجرحة بسيطة ما حاجة وعلي قال لمحمد انا راجع المدرسة من بكرة دي سنة تالتة وما بضيعها وامرق تعب السنين الفاتت كلها ساي وأمهم فرحت لمن بكت وقالت ليهو عارفاك بترجع ليها يا ولدي واحسن من تضيع تعبك وتعب أبوك واخوك محمد دا ساي ومحمد زاتو فرح وقال ليهو الدكان انا بمسكو براي ولمن تفتح الجامعة بلقى ليهو حل
حاج عباس وعبد الله جوا القضارف ومعاهم شهادة محمد حقت الميلاد وفاتوا المحكمة غيرو ليهو اسمو ومشوا الوزارة غيرو اسمو في الشهادة السودانية وبقى اسمو عبد اللطيف عبد القيوم بدل محمد حسن لكن ما في زول بقول ليهو غير محمد وعبد اللطيف في الاوراق بس
مرت الايام حلوة وهادية وسمحة والكل سعيد لمن جاء عرس عبد الله اخوهو ومحمد ما خلى زول ما دعاهو ليهو حتى محمد عمر الفي كسلا والتجار اصحابو وحاج صالح واهلو كلهم الفي الحصاحيصا جوا العرس وكانت معاهم حاجة النعمة وحاجة ام سلمة وحتى شيخ العاقب مشى معاهم حضر العرس
محمد شاف املاك ابوهو كلها ونظمها وعبد الله بقى هو الماسكها والدكان حق القضارف مسكوا دفع الله ود الناير وبرضو عرس وجاب مرتو قعدها مع حاجة بدرية لكن أجر منهم الدكان ايجار قال عشان ما يدخل عليهو منو قرش وبقى كل شهر بدفع ليها ايجارها ومصاريف البيت عليهو وعلي محمد
علي نجح ودخل الجامعة برضو مع محمد لكن قرا اقتصاد ما طب
جابر عرس بت حاج اللمين وبعد كم شهر من زواجو حاج اللمين سلم الروح لباريها ومحمد حزن عليهو شديد واصلو ما نسى فضلو ودايما بقول لي اهلو لو ما حاج اللمين بعد الله ولا كنت عرفت دربكم وطوالي بترحم عليهو
بعد محمد كمل السنة الاولى ساق امو وحاجة بدرية الاتنين ومشى معاهم الحج وقال ليهن أنا بعد أكمل الجامعة داير اتخصص في جراحة القلب , المرض المات بيهو ابوهو وهن دعن ليهو زين هناك انو ربنا ينجحو ويوفقو
عبد الله اخو حاجة بدرية بعد السكر عمل ليهو كمان قمار ودر دكانو ساي في الفاضي والقمار ما خلى ليهو شي كلما يخسر يجيب قروش ويقامر عشان يرجع الخسرو في القمار وبرضو يخسر الجابن وما بقى ليهو علا البيت بس وبقى علي الحديدة لا شغل ولا مشغلة بعد ما كان مرتاح وغنيان
مشى البنك وشال منهم قرض بضمان البيت قروش كتير بس ما تاب واشتغل بيهن وفات قامر بيهن لمن كملن جت وقعد يتسلف من اصحابو وناس كتار دايرين منو قروش وبقى قاعد في البيت لا قرش ولا شغل بس منتظر متين البنك يجي يسحب منو البيت ولا عارف يمشي وين ولا يقبل وين بعد يشيلوهو منو ولمن خلاس ما باقي الا كم يوم من موعد البنك مشى ليهم قال يستسمحهم عشان يمددوا ليهو فترة السداد شوية لمن يلقى ليهو حل
ناس البنك رجعوا ليهو ورق البيت وقال ليهو ليهو القرض اتسدد كلو وسددو ود اختك شال الورق ما مصدق وما عندو اخت غير بدرية جرى القضارف فرحان عشان يشكرها ويشكر علي لمن وصل هناك قال ليها علي وين قالت ليهو في الجامعة في الخرطوم قال ليها علي ولدك دا عمل فيني معروف عمري ما بنساهو ليهو قالت ليهو ماك خالو ولا وراها المعروف العملو فيهو شنو
رجع الخرطوم ومشى لعلي لقاهو ما عارف اي حاجة لا عن البنك ولا البيت ولا القرض رجع البنك سألهم من اسم الزول السدد ليهم القرض قالوا ليهو عبد اللطيف عبد القيوم وقال لينا انت خالو وقال لينا امو اسمها بدرية
عبد الله راسو شطب قال بدرية دي معرسة راجل تاني وانا ما عارف بقى يساسق زي المجنون رجع ليها تاني في القضارف
والمرة دي لقى محمد قاعد معاها في القضارف دخل وسلام ساي ما سلم عليهو ولا كان عارف عنو شي لأنو أكان غرقان ومدمر في سكرو وقمارو ما شغال بيهم
وقال لحاجة بدرية اختو عبد اللطيف ود عبد القيوم دا منو ؟ أنا ما عرفتو وناس البنك قالوا لي دا ولدك انتي؟
محمد قال ليهو عبد اللطيف دا انا يا خال .
انتهت
